 |
| عکس: بلوچی اکیڈمی |
بلوچی اکیڈمی ءِ شست ءُ ششمی جنرل باڈی دیوان ماں شال ءَ اکیڈمی ءِ کمپلکس ءَ جم دارگ بُوت۔
دیوان ءَ اکیڈمی ءِ سالانہ کارگزاری رپورٹ ءَ ہوار مالی ءُ انتظامی کارانی بابت ءَ باسکاناں سرپدی دیگ بُوت۔
دیوان ءِ شست ءُ ششمی دیوان ءَ اکیڈمی ءِ مجلس ءِ نوکیں باسک گچین کنگ بُوت انت۔
ہیبتان عمر اکیڈمی ءِ کماش ، محمد صدیق بلوچ نائب کماش، عرفان جمالدینی کارگُشاد، ذاکر قادر شنگکاری کارگُشاد، محمد صادق مالی کارگُشاد ءُ سنگت رفیق، ممتاز یوسف، ایڈوکیٹ چنگیز عیسیٰ ءُ شکیل بلوچی مجلس ءِ باسک نامینگ بُوت انت۔
جنرل باڈی دیوان ءَ ڈاکٹر بیزن سبا ءَ سالانہ کارگزاری ءِ باسکاناں سرپدی دات۔
آئی ءَ گوشت کہ گوستگیں سالانی وڑا اے سال ءَ اکیڈمی ءَ بلوچی زبان ءُ لبزانک ءِ جتائیں سرحالانی سرا سی ءُ یک کتاب چھاپ کتگ۔ ایشی ءَ ابید بازیں لبزانکی ءُ علمی مراگش ٹہینگ بُوتگ۔
آئی ءَ گوشت کہ بلوچی زبان ءَ نوکیں ٹیکنالوجی ءُ ضرورتانی رِدا بلوچی زبان ءَ نیچرل لینگویج پراسیسنگ (این ایل پی) ءِ بندات کُتگ۔
بلوچی اکیڈمی ءِ باسکاں بلوچی ءِ ادارہانی گرانٹ ءِ کم کنگ ءِ بلوچستان سرکار ءِ گامگیج ءَ را ایر جت ءُ گوشت کہ اے گامگیج بلوچی زبان ءُ لبزانک ءِ دشمنی انت کہ بلوچی زبان ءُ لبزانک ءِ جُہداں ہمگرنچیں ادارہانی مالی گرانٹ ءِ کم کنگ ءِ گامگیج واتر زورگ بہ بیت۔
بلوچی اکیڈمی ءِ نوکیں گچینکاری ءَ گچین بوتگیں اگدہ دار ءُ باسک | عکس : بلوچی اکیڈمی
شست ءُ ششمی دیوان ءَ باسکاں اے گپ ءِ سرا دل پدردی درشان کُت کہ بلوچی زبان ماں سرکاری اسکولاں وانینگ نہ بُوئگ ءَ انت۔اکیڈمی اے گامگیج ءَ بلوچی زبان ءِ ایر جنگ ءِ یک پندلے سرپد بیت ءُ چہ بلوچستان ءِ سرکار ءُ واک داریں ادارہاں لوٹ کنت کہ اسکولاں بلوچی وانینگ بہ بیت۔ میٹرک ءَ بلوچی نصاب ہوار گیجگ بہ بیت، بلکیں بلوچی ءَ سرجمیں بلوچستان ءَ نصابی زبان بزاں میڈیم آف انسٹرکشن ءِ زبان قرار دیگ بہ بیت۔بلوچستان ءِ سرکار ماں اسکول ءُ کالجاں ایدگہ مضمونانی وڑا پہ بلوچی زبان ءِ وانینگ ءَ جتائیں ٹیچر دارگ بہ داریت۔ بلوچی اکیڈمی چہ حکومت بلوچستان ءُ محکمہ تعلیم ڈیپارٹمنٹ ءَ لوٹ کنت کہ پہ بلوچی نصاب ءِ وانینگ ءَ اولی جماعت ءَ بہ گر داں میٹرک اُستاد دارگ بہ بیت۔
بلوچی اکیڈمی ءِ دیوان ءَ لوٹ کنگ بُوتگ کہ بلوچستان ءِ سرکار بلوچی زبان ءَ را ڈیجیٹلائز کنگ ءَ مالی کُمک بہ کنت۔
باسکاں گوشت کہ نوکیں ٹیکنالوجی ، اے آئی ءُ چیٹ جی پی ٹی وڑیں دریافتاں پہ بنی آدم ءِ آئوکیں نسلاں یک مزنیں گام گیجے سرپد بیت۔ اے وڑیں ٹیکنالوجی انسان ءِ ہمو روچی زند، آئی ءِ دود ءُ ربیدگ ءُ زبان ءِ سک باز اثر مند بیت کن انت پمیشا اکیڈمی اے جہت ءَ گامگیج زُوریت۔
Post a Comment