![]() |
عکس: بلوچی اکیڈمی |
بلوچی زبان ءُ لبزانک ءِ جیڑہانی بابت ءَ ماں شال ءَ بلوچی اکیڈمی ءِ کارگس ءَ بلوچی ءِ ادارہانی یک مراگشے برجم دارگ بوتگ کہ آئی ءِ تہا بلوچی زبان ءَ را ماں سرکاری وانگ جاہاں وانینگ ءِ لوٹ کنگ بوتگ۔
مراگش ءِ بابت ءَ بلوچی اکیڈمی ءِ فیس بک تاک ءِ سرا شنگ بوتگیں ھال ءِ ردءَ بلوچی زبان ءُ لبزانک ءِ جُہد کاریں ادارہانی یک نیادے ماں بلوچی اکیڈمی ءِ ماڑی ءَ جم دارگ بُوت۔
اے مراگشی نیاد ءَ بلوچی اکیڈمی ءِ اگدہ داراں ہوار بلوچستان اکیڈمی تربت، سید ہاشمی ریفرنس لائبریری ملیر، عزّت اکیڈمی پنجگور، نصیر کبدانی لبزانکی دیوان خاران، انسٹیٹیوٹ آف بلوچیہ گوادر ءُ راسکوہ ادبی دیوان نوشکی ءِ اگدہ داراں بہر زُرتگ۔
مراگش ءِ باسکاں بلوچی زبان ءُ لبزانک ءِ جیڑہ، لبزانکی ادارہانی جیڑہ ءُ جنجال، بلوچی ءِ دیمروئی ءُ بلوچستان ءِ سرکار ءِ نیمگ ءَ گرانٹ ءِ کم کنگ ءِ درگت ءَ وتی حیال ءُ گپ درشان کت انت۔
دیوان ءِ باسکاں بلوچستان سرکار ءِ بلوچی ءِ ادارہانی گرانٹ کم کنگ ءِ گام ءَ کڈّن کتگ ءُ دست بندی کتگ کہ بایدیں کاگدی ءُ ڈمی ادارہانی گرانٹ ءِ دیگ ءِ بدل ءَ ہما ادارہ کہ پہ دل ءُ سِتک بلوچی زبان ءُ لبزانکءِ دیمروئی ءَ کار کنگ ءَ انت آہانی گرانٹ ءَ ودّینگ بہ بنت۔
دیوان ءِ باسکاں گوشتگ کہ سرکار گرانٹ پالیسی ءِ ردا وتی زُرتگیں گام گیج ءَ پدا بہ زوریت پرچا کہ اکیڈمیانی گرانٹانی کم کنگ گوں بلوچی زبان ءُ لبزانک ءَ دژمنی ئے۔
بلوچی اکیڈمی ءَ جم داشتگیں یک روچی مراگش ءِ باسکاں گوشتگ کہ بلوچی زبان گار بُوئگ ءِ سیمسراں سر بُوتگ بلے پاکستان ءُ بلوچستان ءِ سرکار بلوچی زبان ءَ را ڈالچار کنگ ءَ انت۔ آہاں گوں بلوچستان ءِ سرکار ءَ دست بندی کتگ کہ بلوچی ءَ را ماں اسکولاں تاں میٹرک ءَ وانینگ بہ بیت۔ ہمے وڑا بلوچی زبان ءِ ادارہ بلوچی لبزبلدانی، گالبندسازی ءُ ڈیجیٹلائزیشن ءِ کاراں گُشاد بہ کن انت کہ چریشی ءَ زبان دیمروئی کنت۔
اے مراگش ءَ بلوچی زبان ءُ لبزانک ءِ ادارہانی نیام ءَ ہم کاری ءُ گوں یکّے دومی ءَ نزّیکی ءِ درگت ءَ یک کوارڈینیشن کمیٹی یے اڑ دیگ بوتگ کہ آ کمیٹی ادارہانی نیام ءَ جتائیں پڑاں کار کنگ ءِ بابت ءُ سر ءُ سوج ءُ ادارہانی گرانٹانی گیش کنگ ءِ توجیل ءِ بابت ءَ گام گیج زُوریت۔
Post a Comment