عکس: ڈاکٹر محمد علی | ریگزار
بلوچ راجی جُنز ءِ کلمی سپاھیگ
ڈاکٹر محمد علی( چاوش بلوچ )
ساجدنور
یات نہ بیت کہ کجام سال اَت،بلئے ھمے روچ ءَ کیچ ءَ سک ہور اَت،کوہِ مراد ءِ سرا بگر داں گوکدان ءُ میری کلات ءَ جمبر سیاہ سیاہ اَت۔
من ءُ اولڈ ہاسٹل ءِ چوکیدار دلپل ہاسٹل ءِ برانڈہ ءِ چیرا اوشتگ ات ءُ ہور ءَ ندارہ کنگا اَتیں۔
دلپل گپی مردیے اَت،کسہ ءَ اَت کہ پِلاں سال ءَ چو ہور بوتگ،پِلاں سال ءَ اے وڈ ہور ءَ گورتگ۔
ھمے ہور ءِ تہا اولڈ ہاسٹل ءِ گیٹ ءَ مردے پُترت،چوٹ ے دست ءَ اَتاں گیگ گیگ ءَ گام جنان ءَ پیداک اَت۔
دلپل ءَ درائینت:
'' اے محمد علی اوں شریں سادگے،ہور اِنت مردم کمیں گاماں تُرند کنت،۔۔۔۔
محمد علی ۔۔۔او محمد علی ، تچان کن بیا،چو وا تو الکاپی ءَ میّس ئے۔۔۔۔دلپل ءَ ھمے مرد توار جت۔۔۔
من پجہ نیارت،مرد منی ءُ دلپل ءِ کرا اتک اُوشتات۔۔۔
'' من پہ وتی کارے ءَ سینٹرل جیل ءَ اتکگ اتاں کہ ہور ءَ منا گپت،ھمے واستا ہاسٹل ءَ اتکاں کہ پجاروکے مردمے بیت مردم کمیں ھمدا جلیت دانکہ ہور ہلاس بہ بیت'' مرد پہ تہمبل دلپل ءَ گون گپ ءَ اَت۔
دگہ پجاروکے نودربرے اَتک گڈاں ہمیشی ءَ گون شُت،۔۔
دلپل اے مرد کئے ات؟ من جست کت۔۔۔
''ایشی ءَ تو نہ زانئے شاپکی یے،محمد علی اِنت، شال ءَ وانگ ءَ اِنت،دلبریں بچکے،سکیں گریبیں مردمے۔۔۔دلپل ءَ پسہ دات ءُ ما پدا گوں ہور ءَ دلگوش بوتیں۔
بلئے رندا گوں ڈاکٹرمحمدعلی ءَ منی پجاروکی بوت۔
اے گوست ءِ یک کسانیں ترانگے اَت۔
مروچی من ڈاکٹر محمدعلی ءِ بیرانی ءِ ھال ہش کت داں سک پدرد بوتاں۔
ھمے زمانگ ءَ ڈاکٹر محمد علی کہ پسنی ءَ ات ہر دو روچ ءَ پد ما الم ڈیک وارت،ھال اھوال کت،منا مدام پہ کندگ گشت ے تئی سرا ایف آئی آر روچ ماں روچ گیش بوھان اَنت۔۔۔
پسنی ءِ سنگتاں کہ بی این ایم جوڑ کت پسنی ءَ ''مذاحمتی سیاسی زرمبش'' تُرند بوت،جاور ھم کمیں نگیگ بوتاں۔
یک روچے شھید ڈاکٹر منان بلوچ ،شھید عابد شاہ ءُ دگہ لھتیں سنگت پسنی ءَ اتکاں بابا بوہیر ءِ اوتاک ءَ مئے کسانیں گندونندی دیوانے بوت،شھید نصیرکمالان،شھید صدیق عیدو،اھوالکار جاوید سعید ھم دیوان ءَ نندوک اتاں۔
ھدامرزی ڈاکٹر محمد علی ءَ بلوچستان ءِ جاورھال،بلوچ ءَ سرا آؤکیں جیڑھ،زر،زمین،بلوچ پوریا گر ءُ بلوچ ءِ مذاحمتی زرمبشءِ سرھالانی سرا گپ ءُ تران کت۔
من ھما روچ ءَ زانت کہ ڈاکٹر محمد علی بِلّے سرکار ءِ ملازم اِنت بلئِے یک پکا ئیں بلوچ ے ۔۔۔۔
رندا کہ ہر مراگش ے بوت ڈاکٹر محمد علی ءِ کمک گون اَت،سرکار نہ وش بوت پگارے بند کت،بھتام جت ے کہ تو آجوئی لوٹوکیں مردمانی کمک ءَ کنگائے،ڈاکٹر ءِ نوکری شت۔۔۔
چہ انسداد دہشت گردی آمیدگیس ءَ 3 سال ءِ سزا بوھگا پد،من ،راشد حیدر ءُ کیپٹن رحیم داد دزگیر کنگ بوتیں ،جیل ءَ کیز ءُ بند کنگ بوتیں۔
آمیدگس ءَ پیشی ءِ وہدا من ڈاکٹر محمد علی یکبرے دیست نیشنل پارٹی ءِ کارگس ءِ دیما ساھگ ءَ نشتگ اَت( دیم ءَ اے ٹی سی کورٹ ات )۔
سلام ءُ دروت ءَ پد گُشت ے من سنگت ے ءِ ضمانت ءِ کاگدانی جم دئیگ ءَ اتکگاں۔
چاوش بلوچ ءِ نام ءَ روتاک توار ءَ ڈاکٹر ءِ بازیں نبشتانکے شنگ بوتگ،آئی ءَ مدام بلوچ مزاحمت،بلوچ زمین ءُ بلوچ ءِ جیڑھانی سرا نبشتہ کتگ۔
'' پارلیمانی سیاست اور بلوچ جہد آزادی '' ءُ '' بلوچ جہد آزادی،کامیابیاں اور نئی حکمت عملیاں'' اے ڈاکٹر محمد علی ءِ نبشتہ کتگیں کتاب اَنت کہ آئی ءَ چاوش بلوچ ءِ کلمی نام ءَ نبشتہ کتگ اَنت۔ ایشی ءَ ابید روتاک توار ءَ چھاپ بوتگیں آئی ءِ نبشتانک سدانی ھساب ءَ اَنت۔۔۔
ڈاکٹر محمد علی ڈانڈال ڈلسر شاپک ءِ جاہ منند بوتگ۔
بلوچانی تھا اے رنگیں ہزاراں کارست است کہ آ ھاموشیں رنگے ءَ بلوچ ءِ بلوچ ءِ زمین ءِ واستا وتی بہر ءِ کار ءَ کنگا اَنت بَلئے بلوچ جُنز ءِ نوکیں مردم آہاں پجاہ نیاراں ،آہاں زاہری رنگ ءَ گند اَنت ءُ '' منفی رائے قائم '' کناں ۔آئی ءِ کردار کشی کن انت ۔ ءُ پدا بژن ایش انت کہ ہمے گلانی کہنیں ءُ مستریں سنگت آہاناں سرپد یا اپ ڈیٹ ام نہ کن انت کہ اے سنگت یک جہدکارے۔
ڈاکٹر محمد علی بلوچ ھم راجی جنز ءِ یک کلمی جہدکار یا سپاھیگ ے بوتگ۔
٭٭٭
Post a Comment