مہتاب جکھرانی | فوٹو : ریگزار
کوہ سلیمان ( سفر نامہ )
(پنچمی بہر)
مہتاب جکھرانی
ما داں دیرا نشتو شوکت توکلی ئے اوتاکا نشتو بٹ جثغ انت۔ ایذا وثی پروگرامے ٹاہثو کینسل کثیں کہ نی مئے پروگرام ایذی مڑدانی دستا ایں۔ من پیشی بہر لافا چھڑو ڈیرہ غازی خان باروا گوئشتغ اث، اے بہر لافا من کوشیش کناں کہ ڈیرہ غازی خان ئا بلوچی زوان و ادب ئے باروا ٹونکا کناں۔ من نودربرے آں پوانکہ بازیں ٹونکانی آرغ ممکن نئیں ۔ من بس وثی زانت حسابا یہ جہدے کناں۔
ڈیرہ غازی خان ئے سر ڈغار ادب حسابا دہ وثی کوہ سلیمان ئے کوہانی ڈولا سوز او دریاہ ڈولیں روانی ئے داریث۔ ہر مڑدم کہ بلوچی زوان و ادب باروا زانت، آنہی ئا را ضرور اے سما دہ بیث کہ بلوچی ادب سینغ در سینغ گوئرما آختہ۔ اگر چھیئے نوشتہ بیثہ، دہ گوئرما نیاختہ۔ بلوچی زوان ئا را کلاں شہ پیشا جوانیں وڑے ئا پھلنگی آں دیما آڑتہ۔بیث بی اے کار آنہاں وثی سیث و فاعدہے سوبا ژہ کث بی مگر اے ٹونک دہ منغی ایں کہ ہمے انگریزانی کارا بلوچی زوان ئا را فاعدہ داثہ کہ مرشی بلوچی زوان ہماں زوانی رزا براوری ئا جکثہ کہ آنہانی نوشتہی تاریخ کہنیں۔ بلوچی زوان ئے اول اولی کار لانگ ورتھ ڈیمز، ٹی جے ایل میئر و تھی انگریزاں ایذا یعنی ڈیرہ غازی خان ئے سرڈغار ئا شہ شروع کثہ۔ ایشاں نہ صرف بلوچی کلاسیکل شئیر اوار کثغ انت بلکہ بلوچی ردانک (نثر) ئے سرا دہ کار کثہ۔ایشاں ہمے مواد مچ کثو ہندستان ئے بازیں ادارہ و ہنداں شہ چھاپ کنائینتغ انت کہ داں روش مروشی ہماں کتابانی اہمیت استیں۔
ہمے ڈولا لالہ ہتورام ئا بلوچانی قبائلی دفتر ئا اواری ئا بلوچ زیند ئے بازیں پہناذ "بلوچی نامہ" اندرا آڑتغ انت۔ اے کار دہ آنہی ئا راجن پور و ڈیرہ غازی خان ئا کثہ۔ایشاں ژہ علاوہ لالہ ہتورام ئا اے علاقہ باروا دہ نوشتہ کثہ۔
کچھی مخلوق گوئشیث کہ کچھی ئے ڈغار ئے ہماں تاں ہندیں کہ اوذا مست توکلی ئے رند مہ بنت، مگر اے ٹونک ئے دہ ہر کسا را سما ایں کہ مست ئے دلا سمو ئا گوں اواری ئا ڈیرہ غازی خان ئا پہ دہ مزائیں مہرے اث، ہذیں تہ آں بار بار دیرو ئا کئیث او وختے آئغا گوں امتحاناں ژہ دہ گوئزیث۔
بلوچی زوان ئے اگر شاعرانی ٹونک کنغ بیث تہ ڈیرہ غازی خان ئے بہرا مزائیں شاعرے آختہ۔ ایذا شعر و شاعر ئے مزائیں عزتے و قدرے۔ نہ صرف شئیر بلکہ ساز و سروز ئے عاشقانی ڈیہہ ایں دیرو٘۔ ایذی کہنیں شاعر بلکہ نوخیں شاعر دہ بلوچی زوان ئے شاعرانی نیاما جوائیں شاعر شمار بنت۔ شاعرانی لافا چِگھا بزدار،لدھا بزدار، حافظ محمود بزدار،سمائل لاشاری،پلیہ کھوسغ، سکندرکھوسغ، رحمٰن بزدار، موارہان بزدار، پیر بشک بزدار، امیر محمد بزدار،ملک نورن بزدار،عبداللہ درانی و بلوچی ئے تی بازیں شاعر بیثغ انت۔ اے زمانہ ئا بلوچی ادب ئا پہ کسے ءَ اولی قلم زڑتہ پہ نثر و نظم ہڑ دو ئا آں دو نام انت یکے مومون بزدار دوہمی اسحاق ساجد بزدار۔ اے دوئیں مڑد بلوچی اکیڈمی کوئٹہ ممبر اثنت۔ دراھیں زیندا گوں اکیڈمی اواری یا کار کثیش. شیذ دیما یہ نامے میر مٹھا بزدار کہ آنہیا اے وطن ئا مزاحیہ شاعری کثہ داں مروشی آنہی مٹ نے۔
ایشاں شہ ابید حاجی خدابخش بزدار اے وطن ئے اولی مڑدمیں کہ آنہیا ناول "چیذغ" نوشتہ کثہ. ناول ئا شہ علاوہ بلوچی وش کندانی کتاب بلگار دہ ہماں مڑدے نامی ایں کتابے. حافظ شکلانی معروف حافظ چشتی ئا بلوچی عربی فارسی اردو چھیار زبان ئا شاعری کثہ حافظ ئے شاعری چھاپ دہ بیثہ۔
ملک محمد پناہ، ڈاکٹر واحد بشک بزدار، سلطان نعیم قیصرانی، غلام قادر بزدار، ڈاکٹر غلام نبی ساجد اے کلاں بلوچی ادب سرا کار کثہ۔ایشانی لافا بازیناں شاعری دہ کثہ.
ایشاں شہ ابید کریم بشک زوراخ بزدار اے وطن ئے آں نام ایں کہ آں بلوچی شاعری کنت، آنہی شاعری اندرا بلوچی کلاسیکل رنگ دہ استیں دوہمی نوخیں دورشم دہ استیں. دیرہ غازی خان ءَ اگاں کسے ءَ تؤ بلوچی کہنیں شاعری خاص مں چگھا بزدار توکلی مست و رحمن باروا اتھارٹی گوئشے تہ آن مڑدم زوراخ بزدار ایں. زوراخ بزدار ئا اے وطن باروا باز نوشتہ کثہ، ایشی درشک ایشی دود ایشی کوہانی بڑزغ ایشی موسمانی ایشی دمب و دنگانی باروا ہمو چیزے کہ گوئشے ترا باز کمیں آنہی باروا زوراخ بزدار ئے نبشتانکے ترا گندغا کئیث.حقیں ٹونک تہ ایشیں کہ ایذا آئغا شہ پیشا ایذی بازیں چیزانی باروا من زوراخ بزدار ئا شہ آنہی فیس بک پیج و تھی ویب سائٹانی چکھا دیثغ اث۔
دومی مڑدمانی نیام یک مزائیں نامے کہ آنہیا شہ سوا کوہ سلیمان نا پیلویں ، آں چاچا اللہ بشک بزدار ایں۔ آنہیا وثی شاعری بابت وجہا صدارتی ایوارڈ گفتہ۔ چاچا اے روشاں شاعری ئا اواری ئا بلوچی رھبند، سنڈیمن سسٹم، او اے وڑیں چیزانی سرا کارا کنغیں۔
ہمے دیروا اگاں سیذ خان کسو مہ بی تہ گڈا اے وختے کسو نا پیلو دہ استیں بے تام دہ استیں پچیکہ اے وختے مزیں نامے۔ ہمے ڈولا شاعر نور بخش بزدار، شاعر پلیہ کھوسغ، شاعر حمید بزدار، شاعر پھیری چانڈیہ، شاعر میرو لیغاری، شاعر رحیم جان بزدار، شاعر حمید لیغاری، شاعری محبوب لیغاری، شاعر الہی بخش لنڈ، مفتی عرفان کھوسغ خیرو دھماں قیصرانی، سلام چاکری، وقار بزدار، دین محمد معروف دینے شاعرا شہ سوا عطامحمد بزدار، استاد عطامحمد بزدار، شاعر شوکت توکلی، علی بشک کلوئی، بشام لیغاری، قمر بزدار، او عدنان بزدار اے وطن ءِ نامی ایں شاعر انت. ایشاں شہ بازینے من دیثہ، چھیئے نام زاناں و چھیئے باروا ایذا اشکثوں۔
ایذا بازیں ورنا شاعری ئا گوں اواری ئا ردانک (نثر) دہ نوشتہ کننت۔ چھو کہ حمید لیغاری، وقار بزدار۔زوراخ بزدار۔
حمید لیغاری و وقار بزدار ہماں مڑدنت کہ ایشاں گوں مئیں حال حوال گیشتریں۔ وقار بزدار بام رنگ ئے ایڈیٹر دہ استیں۔ وقار ئا گوں مئیں تقریباً ہرّو چیار پنچ دھکا حال حوال بیثہ۔ ہذیں دگا دہ وقار ئا گوں یکو رابطہ ئا اث۔
بلوچی زبان باروا اگاں بلوچ سُری آنی کسو مہ بی تہ اے نا انصافی یے بیث، پچیکہ شاعری ءِ مزائیں بہر ہمیشاں سینغا گونیں و نڑ و سُرا بغیر بلوچی بلوچی شاعری و زیمر ناپیلویں۔
اے سری آنی نیاما مزائیں نام سری قاسم ، سری درویش، سری ماما، سری حفیظ، سری ظفر اے آن نام انت کہ آنہاں وطن ئے شاعری سرا مزیں جہدے کثہ.ہمے ڈولا زوراخ بزدار دہ سر داریث، یعنی زوراخ بزدار اے ڈیہہ ئے زوراخے۔اے ناماں شہ درا دہ بازیں نام استنت کہ آں سَر آتکغ انت۔
من و عمران لہڑی نشتو پناہ بلوچ و شوکت توکلی ئے دریں گالاں نغوشغ اثوں کہ شوکت توکلی ئارا فون کالے آختہ "مہماناں بیار" دوہمی پلوا سردارے ٹونک اث۔
٭٭٭
(روان اِنت)
Post a Comment