مبارک قاضی | فوٹو : ریگزار
منءَ بے تو دگہ کس نیست
مبارک قاضی
!دمانے جل
دمانے جل منی چمّانی روژنائی
منی تھنائیانی عمرءِ موسم ساعتے دم کن
تئی گِترانگیں انارکاں آس گواریں کموکیں چاراں
منی آمین اِیں زِردءِ سرپتگیں یاتانی ہجگیں پُلّ
مباتاں کہربارنگیں تئی کلونٹیں نوجوانیءَ
دلوں ارمان کنت چوگژنگیں بروارؔ پہ تئی پوگسیں رکّاں
پہ ارمانے تئی آسکی دیدگاں چاراں
ہزار طوفان دلءَ کاراں
بُن اِنت اَرواہ گوں ارساں
جگرروک اِنت گوں پاہاراں
من انچیں زِرنگاہیں دروشمے چمّاں کتگ اندیم
تہاری دُوراوشتیت کُنڈےءَ لُنجیں،ندارہ کنت
منی چمّانی بے وابی منءَ پہ بش بشے چاریت
ءُ بُرزءَ دُورماں آسمانءَ جُڈیت ماہ گوں استاراں
بگل نمبین بنت روچءِ
سلاہاں دوردنت دریا
اے تہنائی کہ عمرءِ موسمءَ داتگ
گوں ہچ نیستءَ نہ بیت آسر
اے دائم ہستءُ برجاہ انت
دمانے جل منی زیمیں دلءِ بربادیءِ محرم
دلوں بندانت کہ تئی ہنّی رَجیں موردانگاں چُکّاں
خمارانی ابدمانیں زِرءَ بُکّاں
بیاں چاگردتئی گمراہیں بالادءِ
تئی ورنائیءِ آسءَ سُچاں چوکریچءُ اگریچءَ
تئی ٹہلانی منادروہی
تئی چمّانی سوگند انت
منءَ بے تود گہ کس نیست
٭٭٭
Post a Comment