مبارک قاضی | فوٹو : ریگزار
ریگزار ءِ گَم
مبارک قاضی
ریگزار ءِ گَم ءَ کئے بزانت
دل چہ قرناں زبہر انت پہ امیت ءِ یک سرجمیں شینکےءَ
ارس ءِ ترمپے نہ گواہیت زہیرءِ زرءِ جُلگہیں دیدگانی تہا
لُنٹاں تلکار بستگ ودارءِ ہلاہوشیں مَستانیؔءِ
رِیک ءِ تالانیں دامن زبہر انت چہ دردانی استین ءِ نوک آپےءَ
زار پہ کئیفانی زرّینؔ ءُ جُڈّیؔ ءِ کوہاں ببات
زعفران گونگیں شیشگاں برات کار انت
ءُ دُزّ اِش براَنت، شاتکامی کن اَنت
چونیں بے نامیں ڈکّالے اتکگ منی دلبریں میتگءَ
مہوشیں کاڑ ءُ ژند ءُ نزوریں کماش
پُلگدیں سُوری ورناہ ءُ نازاکیں بی بی حواؔ
آپ ءِ شوہا زدَرپہ دَر اَنت ہر گورءَ
ارس شیطان ءِ آپ انت ہلاہوش دنت
ہون ءِ بھیسہ نہ منتگ گوں بیماری آں
حیف کِیّاؔ کہ وہدءَ نہ کنت سنگتی
مرچی سیاہ تاک اِنت گُرّانیؔ ءِ ملگزاریں کہیر
ہشکءُ گیمرتگنت واہگءِ شادی کؤرؔءِ بزیں سُول ءُ گَز
پیر دیمؔءِ ابیتکیں تِمر تلوسنت
کئے اے گُنگیں جنینانی درداں بزانت
راہ در بر ھیال ءِ وتی جند ءِ گیشءَ نہ انت
انگت سد آفرین اِنت،منیرؔءَ،ءُ میرؔءَ زبیرؔءَ
کہ بے چاڑ بنت، شعرے شعرے گُشنت
وت سرا وت جُش اَنت
مُپتءَ جندءَ کُش اَنت
تُنّی ئیں ریگزارءِ گَم ءَ کئے بزانت
دل پہ یک رہگوزی سُتکگیں جمبری بُٹّے تلوسیت
***
Post a Comment