منیر مومن | فوٹو : ریگزار
دستونک
منیرمومنؔ
مِسک ءُ ابیریں ملگوراں دستے شنگیں دستے پیچ
آس بلوریں دیدوکاں شَہمے شنگیں شَہمے پیچ
دانکہ گوانزگ آگاہ اَنت دانک ارماں تران کننت
زرّ ءُ تِلاہیں لیلواں پاسے شنگیں پاسے پیچ
تاس شکونیں اہداں مئے بلّے ہارے زوریت رؤت
تُنیگّیں کُل اِکراراں رو چے شنگیں روچے پیچ
اوست ءِ تنداں دون کتنت پہ تئی ودار ءَ بیواب اَنت
پرشتہ میئمیں روشنداں برمشے شنگیں برمشے پیچ
بورماں کِسّہ نال بہ بنتءُ زہم ماں شیئرءَ برمش بدنت
وہدءِ گیامیں کوہ دیماں ہلکے شنگیں ہلکے پیچ
دیستگ منیرؔ تو دائم گوں درچکءُ داراں ہمزیل ئے
بیوانکی ءِ ہنکیناں شئیرے شنگیں شیئرے پیچ
٭٭٭
Post a Comment