 |
| تاج بلوچ | فوٹو ریگزار |
ہور گیابانءَ گواریت
تاج بلوچ
زانئے……؟
دوشی ہوراں گیابان ءَ گورتہ
ہوراں گورتہ
تہ گوہر گوں بگءَ لڈّءُُ بار کُتہ
رِنداں چہ لاشارءَ جنکے سانگ کُتہ
چاکر شیئر جتہ گوہرامءَ چنگ
مریدءَ کوہیں کینگ آپ کُتہ
آپ چہ شیپاں گرداں بوتہ
کؤر
ماں دریاءَ رِتکہ
جمبر دریاءَ رودینتہ
گیابانءِ ریکاں
جمبر تاں گڈی ترمپءَ دُشتہ
دوشی
ہوراں گیابانءَ گورتہ
ءُُ منا یاد اتکہ میتگ، کؤرءِ لمب
روچانی روچ
کؤرءِ اے دستءُُ آ دستءَ بیلانی دورءَ چہ گدار
ہال نہ اہوالےءُُ نئیکہ گساں تاہیر
بس ہر شپ وپس ئے
ترمپانی آواز
گسءِ کمبانی سرا
ترپ،ترپ……ترپ ترپ…… ترمپانی آواز
ہمک ترمپءِ پُشتءَ
مُرگانی توار
کُچکءِ ہولاسگ
چِرچِر……چِرچِر…… چِرتانی سلوات
گیابانءَ
ریکانی شمءَ
چو کہ ماں کمبانی شماں
ہورءِ ترمپاں اوسپان کُتہ
دوشی ہورءَ گورتہ گیاباناں
ءُُ پدا سرلٹ تاں مُرگاپءَ
سیسیگاں ساز جتہ
کبگاں ملانءَ شہرے آباد کُتہ
بیدامءَ پل رودینتہ
ءُُ چنالءَ بو آتار کُتہ
گیاباں
دوشی ہوراں میسینتہ
سوریں ترمپاں جیگ تا دامن میسینتہ
نوکاپ کُتہ
٭٭٭٭
Post a Comment