فوٹو : ریگزار
پشکپتگیں ندارگ
مُلا مرادؔ بلوچ
برز برزیں ماڑی یانی نیامگ ءَ دمکے روان اِنت۔ اے کش ءُُ آ کش ءَ تبک تبکین ماڑی مک اَنت۔ایشانی دون لُڑتگ ءُُ ھشت اِش درا اَنت۔ مردگیں بے تواری یے ءَ ھمدا ھنکین کُتگ۔ھور ءَ گورتگ آپ چہ بتانگانی لمباں انگت ءَ ترمپ ترمپ ءَ دمان ءُُ ساھت زمین ءَ پِٹان اَنت۔
دمکے ءِ کُنڈءَ جان ءَ پُرّیں ماسی یے کوراسی ءَ نشتگ۔۔۔۔۔شپءِ دیریں پاسے کِنزان انت لوھیگے ماسی ءِ دیم ءَ ایر اِنت دپ یئِ گِپتگ۔
دیم ءَ پیرے ءِ کبر اِنت دروازگے پچ بیت پیریں مُنجار در کئیت جان کش ایت کیئت ءُُ ماسی ءِ کش ءَ نندیت دستاں آئی جیگ بند ءَ راہ دنت ماسی لوھیگ ء ِ دپ ءَ پچ کنت بانکلینکانی باپ چِست بنت ندارگ ءَ تامور کن اَنت۔
یک جنینے ءَ گونڈویے گون اِنت چہ گِستائیں دمکے ءَ گوازان اِنت پیر ءِ گِندگ ءَ پاداں داریت چہ دوُر ءَ دست ءُُ دیم کنت پدا وتسرا گپ جناں بیت راہ کپ ایت۔
پیر ءِ مُنجارماسی ءِ کش ءَ نشتگ بانکلینک ورگ ءَ اِنت۔۔۔۔۔۔نزیک ءَ لوگے ءِ دروازگ توار کنت لہتیں گونڈو در کئیت۔یکے۔۔۔۔ دو۔۔۔۔ سے۔۔۔۔چار۔۔۔۔بازیں گونڈویے درایان بنت۔۔۔۔۔۔
دراھیں گونڈوآنی دیم،مُود،مچاچءُُ بُروان سُہر سُہراَنت چم اِش کَلہے پچ اَنت۔۔۔۔۔۔۔تچ اَنت اے دست ءُُ آ دست ءَ لیب کن اَنت۔
دمک تہار اِنت دمک ءَ آ دیم مزنیں شہرے۔۔۔۔۔۔لیٹ روک اَنت۔۔۔۔۔گاڑی موٹلانی روآ اِنت مردمانی مُچی اِنت۔
اَناگاہ ءَ گونڈویے دومی ءَ تیلانک دنت ماسی ءِ لوھیگ ءِ سرا کپ ایت لوھیگ شکُون بیت۔ماسی کوکار کنت۔۔۔۔۔پاد اَتک ءُُ گونڈواں تاچینت ءُُ گپت نہ کنت۔۔۔۔۔گونڈو روانتءُُ دمکے ءَ اندر بنت۔
کچکے کئیت بُن ءَ ریتکگیں بانکلینکاں پہ لِلّک چِنان کنت کشّ ءَ کَنڈے ءَ ھور ءِ داشتگیں سِلیں آپاں وتی تُنّ ءَ پروشیت سرا ایر کنت واب کپیت۔
ماسی دراھیں شپ ھمدءَ نندیت۔۔۔۔۔آئی واب جاہ آپ ءَ گِپتگ، ھور کہ گوار ایت ماسی ءِ واب جاہ آپ ءَ پُر بیتءُُ آئی واب گار بیت۔
پیرءِ مُنجار گوں پاد ءِ ژلانگوکاں پدا دروازگ ءَ پُتریت ءُُ دروازگ ءَ بند کنت۔
ھمدءَ پاد برمشے ءَ کُچک وتی سرا چِست کنت اے دیم آ دیم ءَ بو کشیت ءُُ پدا اے واب ءُُ پرا واب بیت۔
ماسی ھمدءَ چہ واب ءِ زور ءَ وت ءَ دو تَل کنت گُشان ءَ پِر دنت ءُُ واب کپیت۔
سُہب ءَ روچ برمش دنت دمک ءَ تہاری بُرّاں کنت ماسی پاد کئیت لوھیگ ءَ سرا کنت رؤت وتی واب جاہ ءِ آپاں شُلنچ ایت۔۔۔۔۔ پیر مردے سر کشیت ماسی ءَ گوانکے جنتءُُ وتارا دمکے ءَ اندر دنت۔ ماسی چکّ ءَ ترینیت داں دوشیگیں دُرائیں گونڈو گوں سُہریں دیم،مُود، مچاچ،بُروانءُُ کورویں چماں کندگ ءَ اَنت پیر مرد آھاں سکین دیگ ءَ اِنت۔
٭٭٭٭
Post a Comment