چکاس | فرانز کافکا | امیر دوست

فرانز کافکا | فوٹو : ریگزار

 

چکاس

فرانزکافکا

رجانک : امیردوستؔ

من یک نوکرے آں۔ بلئے ہچ کار پہ منی کنگءَ نہ کپتگ۔ من یک تُرسوکیں انسانے آں۔ من وتا دیمءَ بَرگءِ جُہد نہ کناں۔ باور بکن من وتا دگے مردمانی سرپءَ اوشتارینگءِ تَوکلءَ اوں کُت نہ کناں۔ ہمے منی بیکاریءِ مَستریں سبب اِنت۔ بلئے چو ہم بُوت کنت کہ ایشیءَ را گوں منی بیکاریءَ ہچ سیادی مہ بیت۔ بلئے بزاں منا ہچ کارءِ…… ہاترا توار پِر کنگ نہ بیت۔ دگہ مردماں توار پِرکنگءُُ لوٹائینگ بیت۔ چناہا آ چہ من گیشتر جُہد اُوں نہ کننت۔ آہاں وتی اے وڑ توار پِرکنگءُُ لوٹائینگءِ واہشت اوں نیست۔ بلئے پمّن برے برے ایشیءِ تلبءُُ حاجت بے کساس بیت۔

من نوکرانی مزن کوٹیءِ تہا یک دارےءِ سرءَ تچک باں ءُُ دیوالءِ دیمءِ شیشگاں روک روکءَ چارانءَ واب کپاں۔ کمّیں دیرا پد من بُست کناں بلئے زُوت پدا واب کپاں۔ برے برے من یک شراب جاہےءَ رواں اودا تَہلیں بئیر بہا بیت۔ کدی کدی من زہرءَ زہر وتی گِلاسءَ چپّی کناں۔ بلئے چنائیں وہداں من آہاں پہ گَلے نوشاں۔ منا اودءِ نندگ باز وشّیں لذتے دَنت۔ پیسرا منا چُشیں تُرسے نیست اَت کہ اودا منا کسّے گِندیت، دومی ایش کہ اودءِ کسانیں تاکچہءِ دپءَ من وتی لوگءِ بُرزی تبکءِ تاکچہاں گِنداں۔۔۔۔۔۔۔۔۔ 

بلئے ہر نِدارگے کہ منا گندگ کئیت آئیءِ تہا بس برانڈہءِ تاکچہ گندگ کاینت۔ چِدا آ برانڈہ گندگ نہ بنت کہ آ داں منی مالکانی کوٹیءَ سر بنت۔ من جیڑ اِتگ اَت کہ منی چارگءِ تہا کمّی یے است۔ بلئے پدا دلجم بوتاں کہ اے وڑ نہ اِنت۔ چیاکہ یکرندے منی جُست کنگءَ ابید ہم یک مردمےءَ آ تاکچہءِ سہرا بُؤکیں نِدارگءِ باروا چندے انچیں حبر کُت کہ آ منی چمدیستءِ وڑءُُ پئیمءَ اتنت۔ اے وڑآئیا منی دیدوکانی سلامتی منا باور کنائینت۔ آ لوگءِ تاکچہ کدی کدی پچ بنت۔ برے برے اے پئیم ہم بیت کہ آہانی تہا یک نوکرے ڈنّءَ سر کشّیتءُُ چاریت۔ آ کمّیں دیر تاکچہءِ سیمّانی سرءَ وتی سرینءَ جہل کنتءُُ اُوشتیت۔ منی جندءِ ذات گوں آ نوکراں شُناسا نہ اِنت۔ ہما نوکر کہ بُرزءِ تبکءَ کار کننت آہانی وپتءُُ واب منی کوٹیءَ نہ اِنتءُُ دگہ جاہے وپسنت ۔۔۔۔۔۔۔۔۔۔ 

یکرندے من وہدے شراب جاہءَ سر بوتاں، چاراں یک مردے منی کُرسیءِ سرءَ نشتگ اَت۔ منارا آئیءِ نزّوکءَ رؤگءُُ چارگءِ تَوکل نہ بُوت۔ من پدا پہ دروازگءَ واتراِتاں۔ آئیا منی نام توار کُت۔ گڑا منا مالوم بُوت کہ آ ہم یک نوکرے اَت۔ گوں آئیا من یکرندے پیسرا اوں جاگہےءَ دُچار کپتگ اِتاں۔ بلئے آ وہدی منیءُُ آئیءِ نیامءَ ہچ حبرءُُ حال نہ بوتگ اَت ۔۔۔۔۔۔۔۔۔۔۔۔۔۔

تَو پرچا تچگ لوٹ ئے؟ بیا اِدا بہ نندءُُ شراب بُور۔۔۔۔۔۔۔۔۔۔۔۔۔ زرّاں من وت دیاں ۔۔۔۔۔۔۔۔۔۔۔۔۔ من اودا نِشتاں۔ آئیا منا وڑ وڑیں جُستءُُ پُرس کُت۔ بلئے من آئیءِ ہچ جُستءِ پسّہ دات نہ کُت۔ باور بکن من آئیءِ ہچ جُستءَ سرپد نہ بوتاں ۔۔۔۔۔۔۔۔۔۔۔۔۔ اناگاہ من گُشت۔۔۔۔۔۔۔۔۔۔۔۔۔ منی حیالءَ ترا اپسوز بوّگءَ اِنت کہ تَو منا مپتءَ اِدا نندارینتگ۔۔۔۔۔۔۔۔۔۔۔۔۔ نُوں منی رؤگ شرتر اِنت۔ من پاد اتکءُُ اوشتاتاں ۔۔۔۔۔۔۔۔۔۔۔۔۔ آئیا وتی دست ٹیبلءِ دیمءَ چکّرینتءُُ منی کوپگ گِپتءُُ ژَپ اِت۔۔۔۔۔۔۔۔۔۔۔۔۔ بُوشت۔۔۔۔۔۔۔۔۔۔۔۔۔ آئیا گُشت۔۔۔۔۔۔۔۔۔۔۔۔۔ اے بس یک چکّاسے اَت۔ ہر مردم کہ اے جُستانی پسّہءَ نہ دَنت، آ اے چکاسءَ سوبمند بیت ۔۔۔۔۔۔۔۔۔۔۔۔۔

٭٭٭