 |
| فوٹو : ریگزار |
من وتی لوگءِ پیژگاہءَ تگرد یے چیر کُتگءُُ نِشتگ اِتاں...............دیست کہ ناکوسوبانؔ لبّجانءُُ پیداک اِنت........آئیءِ پُشتءَ چیزے گونڈو کپتگ ءُُ...........ہُکہّ.........ہُکہّ..........کنان اَنت.......... ناکو سوباؔنءَ منا دیست چم ئے رژناء بوتنتءُُ وتی ساہ ئے پمنّ آؤرت..................
ہاں ناکو سوبانؔ..........خیر اِنت مرچی تو سکّ زہر گپتگ ئے ءُُ چو جَنوکیں کاریگرءَ ئے..............؟
”ہَو...............خیر اِنت من دانکہ اے بازارءِ گونڈواں یک یکءَ مہ گِراں ءُُ ہُکہّءَ بند مہ کناں چو سر پد نہ بنت........چُنائیءَ منی ہُکہّ اُوں سکّ ہورک اِنت...........اے بازارءِ دُرسیں گونڈواں داریت................
بلے زَرملکؔ وَ بختاورے منا ہچءَ نئیلیت گُشیت تو کہ چُش کُت بزاں من پہ تئی واستہ مُرتگاں..........پداتو اوں زانئے من زَرملکءِ روحءَ آزاراِت نہ کناں منی چمّ دو ءُُ زَرملکؔ یکّ..............“
ناکو سوبانؔ..........من داں سر چست کُتگ ہمیش اِنتءُُ سوبانؔ ہُکّہیءِ نامءَ مشہوراِنت۔ناکو سوبانءَ را یک ہُکہّ یے مُدام کیسگءَ اِنت سربِرءَ آدینکے پِرئے...............پمشکہ ناکو سوبانءَ را اِدءِ گیشتر مردم سوبان ہُکہّیءِ نامءَ توار جننت......اِش کنگا سرءَ بَروبَر نہ اِنت سورئے اُوں نہ کُتگ۔بلے من ناکو سوبانءَ گنوکے سرپد بُوت نہ کناں............
منی دیری ایں واہگے بوتگ کہ ناکو سوبان گوں من دُچار بہ کپیت زَرملکءِ بابتءَ چیزے جُستءُُ پُرس لازُم کنان ئے.............مردم گُشنت ناکو سوبان زَرملک نامیں جنین آدمےءِ عشقءَ چُش گژدال کُتگ۔بلے منی پیروک گُشیت اے میتگءَ زَرملک نامیں مردم نبوتگءُُ انگہ نیست۔ پدا ناکو سوبان ءِ قدم اے میتگءَ چے ڈنّ بہہ نہ کپتگ اَنت..................
سوباؔن زَرملک چی یے................؟
”زَرملکؔ کندیلے“
کُجا اِنت.................؟
”بہشتءَ“
تو چی یے ئے.....................؟
”من..................من بالویے“
گُڈا تو پرچا بہشتءَ نہ رُوئے وتی زَرملکؔءِ کِرّا............؟
”منا زَرملکؔ نئیلیت“
پرچا.................؟
”نزاناں.............بس گُشیت من اَنگہ گیگ نہ اُوں ہردیں کہ گیگ باں ترا وت لوٹاہیناں.................“
ناکو سوبانؔ پاد اتکءُُ اُوشتات دَست ئے کیسگءَ بُرت وتی ہُکّہ کَش اتئےءُُ دَپے مُشوک دپ ئے کُت............ءُُ آدینکءِ تہا وتی نزّاتکگیں دیم ئے چار اِتءُُ بَروتانءَ دستے سماراِت ئے ءُُ راہ کپت...............من گُشت ناکوبہ جَل اَنگہ مہلہ اِنت...........
”اِنّاں...... اِدا تو منا گپّءَ داشتگ......ءُُ........ اُودا زَرملکءَ مناکارے پہ کنگ داتگ اَت نُوکی گیر پیداک اِنت..........بِل کہ من رواں................“
چے کارے.........؟
”سُہبی من واب اِتاں ءُُ ہُکہّ منی راستیں کشءَ ایِر اَت۔پادبرمشے رُست من چَمّ چِست کُتنت دیست کہ زَرملک اِنت تچکءَ تچک پمّن پیداک اِنت...........بلے چمّ ئے گوں منی ہُکہّءَ اتنت..........رَسگءِ شرطءَ درائینت ے........سوبانؔ ترا تمباک گوں منا دَپے بِدئے کہ منی سَر سکّ دردءَ اِنت...........من آپ بوتاں..............نزانت کہ چے بُگوشاں بس زَرملکؔءِ چمّانی تہا یک نگاہے چار اِتءُُ پدا وتی چَمّ جَہل جَت اَنت.........گُڈا زَرملکءَ مار اِت کہ سوبانءِ ہُکہّ ہورک اِنت.........دَست ئے وتی گوپتانءَ بُرت 50کلداری یے کشَ اتئےءُُ منی نیمگءَ ٹال ئے کُت..................ایشیءَ بزورءُُ بُرو پھٹانءِ دُکّانءَ یک پُڑی یے تمباک پہ وتاءُُ دو پمن بِگر...........بلے منی واستہ یک چُشیں ہُکہّ یے اُوں بِگرءُُ بیار گوں..............تمباک وَ پھٹانءِ دُکّانءَ اَست...........بَلے ہُکہّ نزاناں کُجا دست کپیت............دلبودؔ........تو نزانئے باریں اِدا ہُکہّ کئی گورا رَسیت.........“؟
اِنّاں من چے زاناں مناچے تو وت گیشتر زانئے..............
”اے وَ تئی راست اَنت“
بلے تو پہ ہُکہّ یےءَ اینچو چیا پریشان ئے...............؟وتیءَ بِدی یے............
”منی ہُکہّ بس ہُکہّ یے نہ اِنت“
گُڈا چی یے......؟
”آدینکے.........پُلّے...........بالویے............کندیلے............بہشت یے ہم............گوں زَرملکءَ سمبالگ نہ بیت.........اے ہُکہّءَ گِندئے..........؟اے منی ہمسرو اِنت............ہمے روچءَ کہ من پیدا بوتگاں من ہُکہّ یے تلب کُتگ گڈا منی سارت ساہگیں ماتءَ باریں چہ کُجا اے ہُکہّ آؤرتگءُُ منی گوانزگءِ سرجاہءِ چیرا اِیر کُتگ........... ترا باور کنت..........؟ہما روچءَ بِگر داں روچءِ مرچی من اَچ وت سَہتے جتا ہم نہ کُتگ....................
پدا اے ہُکہّءِ تہا منی رَنگءُُ رُوگنیں واب بندی اَنت جنین آدمےءِ گوپتانءَ چوں دَور دات ئے کناں........................“
بس اَمینچو گُشتے ءُُ پُشت ئے مانداتءُُ شُت...........پدا آیک دراجیں مُدّتے گوں من دُچار نہ کپت۔
اناگہ یک روچے منی سرکبرستانءَ کپت دیست کہ ناکو سوبانؔ اِنت چَمّ ئے اَرسین اَنتءُُ کبرےءِ سَرونءَ اوشتاتگءُُ رنگ رنگیں ہُکہّ سَرئے ایِر کنگا اِنت.........................
٭٭٭٭
Post a Comment