 |
| فوٹو : ریگزار |
اے یک سفر نامہ یے کہ بلوچستانءِ شہرشالءَ بندات بیتءُ داں کوہءسلیمانءُ سندءِ بلوچ دمگاں تروتاب کنانءَ دیما روان کنت۔
ایشیءِ تہا نبشتہ کار ءِ ھیال ء ُ لیکہ، چم دیستیں جاورال، زبان ءُ زیمر،تاریخءُ لبزانک، دودء ُ ربیدگی پہناتءَ بگر داں ایندگہ سرپدی ء ُ دیدانک جوانیں وڑے ءَ پیش کنگ بوتگ انت۔
اے سفر نامہ ءِ نبشتہ کار واجہ مہتاب جکھرانی اِنت۔
واجہ مہتاب جکھرانی نصیر آباد ءِ جاہ مندانتء ُبلوچی ءِ تہا شعر، نبشتانک، آزمانک، ریزمانک ء ُ سفرنامہ نبشتہ کنگ ءِ جہد کنت۔
آئی ءَ بلوچستان یونیورسٹی ءَ بلوچیءَایم اے ءِ تہءَ اولی پوزیشن گپتگ۔
اے سفر نامہ ”ریگزار“ ءِ یو ٹیوب چینل ءِ تہا ام واجہ مہتاب جکھرانی ءِ جند ءِ توار ءَ شنگ کنگ بوہگءَ اِنت تاکہ اے رنگیں جوانیں نکان آڈیو ءِ تہا ام پہریزگ بہ بنت۔
اے سفر نامہ ءِ شنگ کنگ ءِ مئے مول ء ُ مراد ہمیش اِنت کہ کوہ سلیمان دمگ ءِ گالوار کہ سک باز جوان ء ُ شیرکن ء ُ تامدار اِنت۔ ءُ دومی ایش کہ بلوچیءِ ہماگالوارانی تہءَ کہ کسانیں دگری یے کہ لہتیں مردم گمان کنت، آئیءِہلاس کنگءِ یک جہدے۔ تاکہ ما کل ہمک ہندءِگالواراں پوہ ء ُ سرپد بہ بیں۔ءُ بلوچیءِ اے کلیں میراث یک ھسابا پہریزگءُ نزّارگی انت۔ ادارہ ریگزار
(دومی بہر)
کشمور ءَ مئیں آئغ روغ شہ کسانی ءَ است ایں۔ کندھکوٹ و کشمور ءَ بازیں نامی ایں مڑدم گوئستغ انت۔ ایشانی لاف ءَ گشندہ مرید بلیدی،نیاز بلیدی، تاج بلیدی، صابر گاجانی، نوخاف بلیدی،صوبھا بنگلانی، شاعر رحیم بشک عرف گوڑو پکیر، مندوست بگٹی، بلوچی ءِ نامداریں سُری حکیم جکھرانی ءَ علاؤہ جوانسال بگٹی ءِ آئغ روغ دہ ایذا باز بیثہ۔ حکیم جکھرانی باروا گوئشنت کہ اے نہ صرف قرآن پاک ءِ حافظ اث بلکہ سر ءِ دہ حافظ اث۔ کسو کننت کہ ہر کذیں حکیم مرکی بیثہ تہ مخلوق مچ بیثہ حذا ءَ شہ دعا لوٹث اش کہ حکیم ہندا تھی ہڑچھی کشے کش، پر حکیم ءَ مہ کش۔ مالھو خان جکھرانی کہ اورل لٹریچر ءِ یہ مزائیں زانتکارے بیثہ، آنہی سیادی دہ ہمے شہر ءَ ایں۔
کشمور ہماں ہندیں کہ ایذا سئیں صوبہ سندھ بلوچستان و پنجاب ءِ سیمسر مان کاینت، ہذیں ایذی مخلوق گیشترا بلوچی سندھی و سرائیکی جوان زاننت۔ایذا سندھ ءِ کشمور، بلوچستان ءِ ڈیرہ بگٹی و پنجاب ءِ راجن پور ءِ حد مان کاینت۔ سندھ ءِ اے علاقہ ہماں علاقہ ایں کہ ایذا بلوچی وثی جوائیں دروشمے داریث۔
کشمور بلوچی ٹوپی آنی وجہ ءَ ژہ باز نامداریں۔ ایذا من گیشتریں مخلوق ءَ را زڑدیں ٹوپی کثی ءَ دیثہ۔ پیریں مڑدم بِیش بی و بوسکی ءِ پھاغاں بندنت۔ گوئشنت کہ پیڈا کندھکوٹ ءِ بوسکی ءِ پھاغ باز نامدار اث۔ ہمے ڈولا کندھکوٹ و کشمور ءِ جوتی باز مشہور انت۔ اے جوتی آنی سرا جیغ ڈول ءَ باقاعدہ گلکاری کنغ بیث۔ اے ہڑدوئیں شہراں بازیں مخلوق ءَ را ہمے جوتی ما پاذاں دیثغ انت۔
ایذا بلوچی ثقافت ءِ بازیں رنگ گندغ ءَ کاینت۔ بلوچی میوزک ءَ پہ نامداریں رکاٹ کنوخ " آزات میوزک سینٹر" دہ کشمور ءَ اث۔ نی شئیت ٹیکنالوجی ءِ بدلی ءَ آں بند بیث بی۔ مناں جوانی ءَ گیر کئیث کہ مڑدماں " آزات میوزک سینٹر" ءَ را ترجیح داث۔
اے سندھ ءِ ہماں علاقہ ایں کہ ایذا بلوچی نڑ سر زیندغیں۔ بلوچی ءِ زغریں ساز و سروزاں را ایذا شہ نامے ملثہ یا گوئشے کہ ایذی پیداش انت تہ مئیں چھنا اے ٹونک رذ نئیں۔
ایذی مخلوق ساز و زیمر ءِ باز شونقین ایں۔ من وثی زندگی ءَ اولی دھک ءَ حقیقت ءَ گشندہ ہمیذا دیثہ کہ آں تاج بلیدی اث۔ مناں جوانی ءَ گیریں ہرکذیں تاج بلیدی شئیرا گوئنڈ کنغ اث یا آنہی ءَ را شئیر شمشغ اث تہ آنہی ءَ را بازیں مڑدم ہمانہی دھن سرا شئیرا گیر دیئغ اثنت۔ داں روش نی ءَ ایذا بلوچی اورل لٹریچر ءِ زیندغیں کتاب تھرانا ماروغ انت۔ ایشاں گوں اگر کسے نندی تہ مئے بلوچی کتابانی لافا بیثغیں نہ صرف شعری رذی بلکہ حوالہ جاتی یا تاریخی غلطی دہ سدھا کنغ بنت۔
مست توکلی ءِ عاشق تہ من گؤشاں کوہلو کاہان بنت یا مونت مگر ایذا من بازیں دیثغاں۔ ہماں تاں شئیریں کہ ہمے مڑدماں را گیر نئیں۔ رندی شئیر بنت یا نیم عہذی شئیر ایذا بازیں مخلوق ءِ دل ءَ لیک انت۔ جوانسال بگٹی ءِ ہماں تاں شئیریں کہ ایذا مخلوق ءَ را گیر مویث۔
ایذا کمال ٹونک تہ ایشیں کہ من وثی ڈیہہ ءِ بلکہ لوغ ءِ شاعرے باروا و آنہی شعر باروا ایذا آختو زانتہ۔اکریں ادبے، میوزکے، نیچرے عاشق بنت پر من نہ دیثغ انت۔
ایذا شہ بلوچستان ءَ پہ پٹ فیڈر کینال درکفیث، کہ ڈیرہ بگٹی، صحبت پور، جعفرآباد، نصیر آباد و جھل مگسی ءِ بازیں ڈغارے آباد کنت۔
ڈیرہ بگٹی ءِ مخلوق گیشترا کویٹہ روغ ءَ پہ اے دگ ءِ سرا آئغ رؤغ کنت۔ہذیں شہرا ڈیرہ بگٹی ءِ مزائیں مخلوقے گندغ ءَ کئیث۔
کشمور شہر ءَ پجّغ ءَ گوں رکشہ والہاں ویگن ءَ را چیاریں پلواں ژہ بیڑثہ۔ گیشترا کل ڈیرہ موڑ ڈیرہ موڑ ءِ گوانکاں جنغ اثنت۔ ما دہ وثی بیگاں گہلینان ءَ یکے ءَ زوار بیثغوں۔
اے شئیت اولی دھک اث کہ من کشمور لافا کرش پلانٹ دیثہ، اے پمن حیرتے ٹونکے اث پچے کہ من کشمور ءَ کوہ و درنگ نہ دیثغ اثنت۔ پناہ صاحب ءَ شہ پول کثوں تہ گوئشت ئی کہ اے کوہاں ڈیرہ بگٹی ءِ علاقہ ءَ ژہ کھارنت او ایذا بھوریننت اش۔ رکشہ ءَ مارا ڈیرہ موڑ ءَ ایر کثہ۔ ما وثی بیگ زڑتو انگر آنگر نغاہ چرینتو دیثہ۔ ایذا نوخیں جہانے آباد اث، ہوٹل، ٹرک، مسیت الغرض ہروشی زند ءِ ہر چیز ایر اث۔ گوئشے کشمور شہر لافا یہ نوخے شہرے آباد اث۔
یہ مزائیں ہوٹلے دیما ٹرک جکثی اثنت۔ یہ پلوے ءَ ٹو ڈی ایں کار جکثی اثنت۔ اے ٹوڈی گیشترا ٹیکسی او کویٹہ سوئی لین ئیغ اثنت۔ ہوٹل ءِ دِکّا مڑدماں شہ پر اثنت۔ کسے نغنے ورغیں، کسے دست ءَ چاہ گونیں تہ کسے سگریٹ ءَ سُوٹا جنغیں۔ روڈ چھو آفی بہغیں۔ روڈانی کندھی ءَ رکشہ والہ آنی گوانک سرا گوانک ایں "اڈہ۔۔اڈہ۔۔۔اڈہ..." چھیئے ٹوڈی والہ مڑدماں شہ پولاں کنان ءَ ماروغ انت۔ یکے گوئر ما دہ آختو پول کث ئی " آ صاحوِ کوئٹہ روے؟ بیا تھرا ہندا دیاں۔۔۔۔یہ سیٹے استیں" ما "انا" کثہ تہ آنہی وثی رہ گپتہ۔ چھیئے محنت کشیں مڑدم دستانی سرا وشّیاں بہا کنغ انت۔ لیغاریں گذ و بے حالیں چھیئے چک و زائیفاں وثی مجبوریاں بیان کنغ و مخلوق ءَ شہ پھنڈغ کوشیش ءَ کنغ انت۔ پھنڈغ ءَ گوں اواری ءَ حذا ءِ قہر و مہر ءِ ڈس ءَ دہ دیئغ انت۔ یہ آچر (اچار) والہ ئے آچرانی لوتھے گون انی کلاں گوئر روغیں، مئے گوئرا دہ آختہ۔ آچر ءِ حکمت و خاصیت بیان کث ئی تہ من زانتہ کہ کلیں نادراہیانی علاج ہمے آچر لافا ایں۔ ہمے ساعتا پناہ بلوچ ءَ مناں گوئشتہ " اے عامیں آچرے اے تھرا پرامغ کوشیشا کنغ ایں " وللہ آچر والہ کمال ءِ مڑدے اث۔ اگر ہمیشی ءَ را موٹیوشنل تقریرے دئے جیث تہ ہزاریں موٹیویشنلیں مقرراں پیدا کث کنت۔
ہوٹل ءَ ژہ کمیں دیما شثغوں تہ روڈ ءِ آں پلوا ٹرانسپورٹ کمپنی ءِ چھیئے آفس اثنت۔ ٹیبلانی سرا ٹکیٹ ٹاہوخ مڑدماں پہ ہیل اثنت۔ گوئشے کہ اے سیرے مخلوقے اث کہ چپی ءَ نشتی اث۔ مخلوق وث ایشاں گوئر شثو منتاں کنغ اث۔ یکے ءَ گوئر ما شثو دیرو٘ (ڈیرہ غازی خان) ءِ دو ٹکیٹ کنائینتہ تہ مارا گیر آختہ کہ شاعر سعید تبسم مزاری ءَ گوں مئے حال حوال شہ رائی بیئغا است اث کہ آں دہ دیرو٘ مئے پھجی ءَ کئیث۔ پناہ صاحب ءَ نمبرے کڑکینتہ تہ سعید ءَ گوئشتہ کہ آں دیرو٘ تہ کئیث پر مئے سنگت بیث نوی، پچے کہ روٹ جدا اث۔ نی ما دو سیٹ گپتغ اث۔ ڈرائیور ءِ پشتی سیٹ سرا ما بھڑیں قبضہ یے کثہ کہ نواں تھی کسے شیرا بئیث۔
اے مئیں سفر ءِ تجربہ ایں کہ ٹرانسپورٹ وآلہ چھو مہلنجے ڈولا مُختے ناز اندازاں کننت۔ ایذا دہ ہمے بیثہ۔ ما ٹیبلا نشتغیں لونڈ سغریں ناخو ءَ شہ پول کثہ کہ "مارا نماز دہ پڑھغی ایں، حالا دئے چہ وخت رائی بئے؟ " آنہی ءَ گوئشتہ "وخت تہ براوریں بس ترا پنج منٹ استنت، باز دیرا مکھن" لونڈ سغریں ناخو ءِ ٹونک لافا کمیں بیزاری دہ مان اث۔ اے آفساں گوئر گیشتریں مخلوق ءِ سر لونڈ اثنت۔
پنج منٹ چھے ما دو منٹ لافا حذا راضی کنغ ءِ کوشیش کثہ۔ مسیت ءِ نمازی آں وثی نماز اشتو مئے سواد کثہ۔ نی جلدی جلدی سیاہیں گاڈی کہ یورو گوئشنت اش، آنہی پلوا زوم زورا بھیڑثیں کہ نواں مارا بلی برو، و مئے بیگاں باڑت ولایت ءَ کشی۔
ما شثو اول ہماں منشی حاضری پر کثیں کہ واژہ! گند ما پنچ منٹ لافا آختغوں، نی بیا تہ جزوں۔ ما چھیئے ورغ چھرغ ءِ ترپڑ گپتو ڈرائیور ءِ پشتی سیٹا نشتو شئیرے جثیں:
لاری لور
گواثا چور
(روان انت)
Post a Comment