 |
| فوٹو : ریگزار |
اے یک سفر نامہ یے کہ بلوچستانءِ شہرشالءَ بندات بیتءُ داں کوہءسلیمانءُ سندءِ بلوچ دمگاں تروتاب کنانءَ دیما روان کنت۔
ایشیءِ تہا نبشتہ کار ءِ ھیال ء ُ لیکہ، چم دیستیں جاورال، زبان ءُ زیمر،تاریخءُ لبزانک، دودء ُ ربیدگی پہناتءَ بگر داں ایندگہ سرپدی ء ُ دیدانک جوانیں وڑے ءَ پیش کنگ بوتگ انت۔
اے سفر نامہ ءِ نبشتہ کار واجہ مہتاب جکھرانی اِنت۔
واجہ مہتاب جکھرانی نصیر آباد ءِ جاہ مندانتء ُبلوچی ءِ تہا شعر، نبشتانک، آزمانک، ریزمانک ء ُ سفرنامہ نبشتہ کنگ ءِ جہد کنت۔
آئی ءَ بلوچستان یونیورسٹی ءَ بلوچیءَایم اے ءِ تہءَ اولی پوزیشن گپتگ۔
اے سفر نامہ ”ریگزار“ ءِ یو ٹیوب چینل ءِ تہا ام واجہ مہتاب جکھرانی ءِ جند ءِ توار ءَ شنگ کنگ بوہگءَ اِنت تاکہ اے رنگیں جوانیں نکان آڈیو ءِ تہا ام پہریزگ بہ بنت۔
اے سفر نامہ ءِ شنگ کنگ ءِ مئے مول ء ُ مراد ہمیش اِنت کہ کوہ سلیمان دمگ ءِ گالوار کہ سک باز جوان ء ُ شیرکن ء ُ تامدار اِنت۔ ءُ دومی ایش کہ بلوچیءِ ہماگالوارانی تہءَ کہ کسانیں دگری یے کہ لہتیں مردم گمان کنت، آئیءِہلاس کنگءِ یک جہدے۔ تاکہ ما کل ہمک ہندءِگالواراں پوہ ء ُ سرپد بہ بیں۔ءُ بلوچیءِ اے کلیں میراث یک ھسابا پہریزگءُ نزّارگی انت۔ ادارہ ریگزار
(سئیمی بہر)
نی یورو ڈیرہ موڑ کشمورا شہ رائی بیثغ اث۔ مئیں خیالا کشمور ءِ اے ہندا را ڈیرہ موڑ ہمے واسطہ ءَ گوئشنت کہ ایذا شہ ڈیرہ غازی خان ءِ سواری درکفنت۔ اے گاڈی جیکب آباد و کشمور ءِ گاڈی ءَ شہ باز جوان اث۔ نئیں کڑکاٹے کنغ اث نہ کہ اسپیڈ باز بیئغ سوبا ژہ ایشی اندرا ژہ دنزے درکفغ اث۔ آں سواری تہ جزغا کمین اثنت کہنیں پکّھا ڈولا آوازا باز کنغ اثنت۔ ہند ہندے ءَ دگ اگر کھربڑ بیئغ اث تہ گاڈی ئے جہل بڑز بیئغ سوبا مخلوق ءِ جہلی بڑزی دتّانانی مانائغا ژہ یہ عجیبیں آوازے پیدا بیئغ اث۔اے رنگیں (یورو) سواری اگر جیکب آباد و کوئٹہ لائن سرا آرغ بنت تہ من گوئشغاں ما دؤری بوں۔ ہر دو روشا پذ شال ءَ مئے سئیلے ضرور بیث۔ مئے پلوا لالچی ایں ٹرانسپورٹ کمپنی نزاناں تاں ہندا ژہ تنگ سیٹ و نادراہ کنوخیں گاڈی آں کارنت۔
مئیں کشا یہ دراژ ریشیں مڑدے نشتی اث۔ آنہی ءَ را موڑی ءَ نیم سیرے کچّھا منگ پھلی گون اثنت۔ آنہی سنگت مئیں براورا پذی سیٹ چکّا نشتی اث۔ نی اے ٹونک من جوانی ءَ زانتغ اث کہ ہماں آفس ءَ نشتغیں مڑدئے کار سیٹ الاٹ کنغ اث، چھو ہاسٹل وارڈن مخلوق ءَ را کوٹھی آں الاٹ کنت۔
پٹ فیڈر کینال ءَ را گندغا پذ گوئشے یہ مہرئے چھیذغے پدر بیثہ۔اے پٹ فیڈریں کہ مئے ڈیہا را آباد کنت، نہ تہ گوارشتانی آسرو ءَ مخلوق زندا گوازینغ اث۔ پٹ فیڈر ءِ سرآفانی سرا چکر جنگ جدل بیثغ انت، اگر جدائی ءَ اے ٹونک گندغ بیث تہ نرم دلیں مڑدمے حون ریشی ءِ کسواں اشکنت تہ گریئیث۔ بلوچانی ڈیہا کوش ءِ سلسلہ میر چاکر ءَ شہ گر داں روش مروشی استیں۔ وختے چراگاہے سرا وختے سرآفانی سرا اے جنگ داں روش مروشی جزغیں۔ پٹ فیڈر کینال ءِ درکفغ وخت ءَ چکر حون رختہ و چکر حوں ریشی کچھی کینال ءِ دروغ و راستیں ٹکّانی سرا ڈیرہ بگٹی ءَ گرداں گیافیں کچھی ءَ جنگ جدل بیئغ انت، برادر کشی بیئغیں ایشانی کساس بازیں۔
پٹ فیڈر زند ءِ مراداں پیلو کنت، ہشکاوغیں ڈیہا سوّزڑی ئیں پسلاں روزینیث۔ زند ءِ نشانی ایں پٹ فیڈر۔
پٹ فیڈر کینال سسٹم 1963 ءَ گرداں 1969ءِ نیاما کھوترغ بیثہ۔ اے گڈو بیراج ءَ ژہ کشمور ءَ گوئر درکفغ ایں۔ پٹ فیڈر بلوچستان ءِ کلاں ژہ مزائیں ایریگیشن سسٹم ایں۔
شروع ءَ پٹ فیڈر کینال ءَ را صرف سرو٘ (ربیع) ئے اجازت اث، تربیلہ ڈیم ءَ پذا پٹ فیڈرا را سرو٘ و سانوڑی (خریف) ئے اجازت دیئغ بیثہ۔داں اے وختا سانوڑی (خریف) ءِ اجازت صرف اندرون (پٹ فیڈر ءَ ژہ گرداں سندھ ءِ بارڈر پلوا) ءَ ایں۔ اگر بیرون ءَ جاگیردارے ءِ ڈغار استیں تہ آنہیارا آف ورغا شہ کئے داشت کنت؟
نی ما پٹ فیڈرا شہ گوئستو راجن پور پلوا رائی اثیں۔ ہمیذا ڈرائیور سیٹ سرا یہ تھی مڑدے زوار بیثہ۔ نی گوئشے یہ سیٹ سرا دو سغر ظاہر اثنت، ایشاں زور داثو دروازغ بند کثہ۔ نی مان کاخت ڈرائیور جاڑے (Polycephaly) یعنی بت یک سغر دو۔
روڈ ءِ پُہل سرا یک ٹرالرے اوندھوئی ءَ وپتغو وھاوا کنغ اث۔ نی مئے یورو راجن پور ءِ پلکاں بال دیئغ اث۔
نی ما روڈ گپتغ اث۔ اے راجن پور ئے علاقہ اث۔ اے علاقہ نصیرآباد ئے بریں علاقہ کہ ہموذا پٹ فیڈر ئے آف مان نئیث ہمانہانی ڈولا ایں۔ دیر دیرا داں سوز خاتی ئے نام نیستیں۔ گوئشے اے ڈیہا را ڈکالاں جثہ۔ اے علاقہ ئے آبادی ہئور گوارشتانی سرا ایں۔ دراژیں پٹ سرا زیند ئے خاصیں نشک نیستیں، ہند ہندے چھیئے سوزغ پدھر بیث۔
ویگن وثی زوم زورا تشغیں مئے بازیں چیزانی سرا ٹونک ٹونک جاری ایں۔ اے سفرا ہماں علاقہ باروا اواری ئا ما بازیں چیزاں ڈسکس کنانا روغوں۔ ٹونکانی نیاما وختے مئیں گوشا گوئر " چِڑپ" ئے توار دہ کئیث۔ اے توار چھلا ریش ئے منگ پھلی چِھلغ ئیغ ایں۔ وخت وختے ہمے منگ پھلیانی پوست مئے جرانی سرا دہ کفنت۔ نیٹ من بیزار بیثو آنہی پلوا دیثہ کہ "پوہ بیث کہ آنہی ئے منگ پھلی چِھلغ مارا ڈسٹرب کنغیں" گندغا گوں آنہی ئا دروغیں بشکندغے داثہ او مئیں نیغا مونگ پھلی ئے لوتھ دراژ کثو گوشتی "کھانڑاں!" یعنی "ورے!".
نی ما دہ چھیئے ورچھر کثغ اث۔ مارا چھیئے ہارغ گون اثنت۔ آنہانی گٹک ہمے نیت ئا چھغل داثغ انتیں کہ اے ہشکیں ڈیہا رزنت و ڈیہا سوز کننت۔
ضلع راجن پور ئا من یہ زمانغے پیش ئا دہ آختغاں۔ شاعر سعید مزاری ئے نزیخیں سیادے کہ ابا ئے جوائیں سنگتے، آنہی ئا گوئر من شفے گوازینتغ اث۔ اے شاید 2013 ئے سال اث کہ اسلام آباد ئا شہ گڑتی ئا شفے ہمیذا گوازیتغ اثوں۔ من دیثغ اث کہ راجن پور ئے یہ پلوے ئارا دریاہ ئے سیلاب مخلوق آرا تنگ کنت او دوہمی پلوا ڈکال۔ من ہماں روشاں دریاہ ئے سیل دہ کثغ اث۔ہماں بند دہ دیثغ اثوں کہ سرکارا مخلوق ئے جان و مال رکھغا پہ بند بستغ اث۔
بلاں اے علاقہ ڈکال و سیلاب جثغیں ڈیہے بی مگر ادب حوالہ سرا اے یہ زرخیزیں ڈیہے۔ اگر من رذ نیاں تہ بلوچی زوان سرا اول اولی کار دہ اے ڈیہا ژہ لانگ ورتھ ڈیمز و تھی بازیں پٹپولکاراں شروع کثہ۔
ما یہ کلاسیکل دور ئے شاعرے نام اشکثہ۔ جیوا کیڑد یا جیوا کرد، مئیں خیالا ہماں دہ اے علاقہ ئے مڑدے اث۔ اے وختا دہ اے ڈیہا بلوچی ئے نامداریں شاعر استنت۔ یکے تہ من پجہ کاراں سعید تبسم مزاری ایں۔ دوہمی ورنائیں شاعرانی نام دہ اشکثیں۔
ہمے ڈولا ایذا روجھان مزاری شہرا داں روش مروشی ئا مارکیٹ لینگویج بلوچی ایں۔ اے شہرا من وثی پیشی سفرا شثغ اثاں۔سیاسی حوالہ سرا دہ اے علاقہ ئے وثی مزائیں اہمیتے استیں۔
اے علاقہ ئا سرائیکی زبان و ادب ئے دہ مزائیں کارےبیثہ۔سرائیکی زوان ئے صوفی شاعر خواجہ غلام فرید دہ اے علاقہ ئیغیں۔ ہمے ہندا مقبرہ دہ است انی۔ چھو کہ سرائیکی زوان و ادب سرا مئیں خاصیں اسٹڈی نئیں پوانکہ من ہچ گوئشت نکناں۔
ایذا ہڑند قلعہ ئا اواری ئا دوہمی کہنیں ہند دہ استنت کہ من صرف آنہانی باروا اشکثہ۔ راجن پور ہماں ہندیں کہ ایذا کوہ، پٹ و دریاہ استنت۔ سیلاب و ڈکال دہ اوارنت۔
سوری کئور کہ سنی سوران ئا ایں۔ اے کئور حمل رند ئے مزارا گوں مڑغ سوبا ژہ نامدار بیثہ۔اشکثوں کہ ہمانہی ئے ہم نامیں سوری کئورے ایذا دہ استیں۔
ہرکذیں میر چاکر ستگھرہ ئا روث تہ جت نشتغیں رندا را تنگ کننت۔ کاشذ کنغا پذ میر چاکر کئیث جتاں گوں مزائیں جنگے داث۔گوئشنت کہ جنگ ئے پڑ جتانی حوناں ژہ تھر بیث۔ اگر من رذ نیاں تہ ہماں علاقہ دہ راجن پور لافا ایں کہ آں ہندا را کِن گوئشنت۔
اے علاقہ ئا بلوچی، سرائیکی، پنجابی و تھی زواناں ٹونک کنوخیں مڑدم نندوخ انت۔
نی روش ٹبثغ اث۔ چھلا ریش ئا مونگ پھلی واڑتو زونکی بیثغ اث۔آنہی ئے ہورگیں لوتھ مئیں پیروھانڑ دامن سرا ایر اث۔ من پلاسٹک ئے ہماں لوتھ زڑتو تاکڑی ئا درا اشتہ تہ جہازی شوکاٹے کثو بال گپتہ۔
(روان اِنت)
Post a Comment