 |
| فوٹو : ریگزار |
روانا روانا گاڈی جکثہ۔ ڈرائیورا گواں جثہ " چلیں جی پُل ڈاٹ والے مسافر اتریں۔" اے گاڈی ئے تاک آٹومیٹک اث پوانکہ وث بختہ۔ڈرائیورا مئے بیگ کشتو مارا داثغ انت۔ اژما علاوہ دہ یک دو مسافر ایر کپتو وثی راہ گپت اِش۔ نی پیلو ئا شف اث۔ چھلا ریش ئا را الوداعی نگاہا گندانا ما ایر کپتو انگر آنگر دیثہ، مارا ہچ پل نظر نیاختہ۔ ما وثی ایر کفغ ئے حال شوکت توکلی ئارا داثغ اث۔ شوکت توکلی دہ پجغ ئا گوئر اث۔ نی ما پل ئے پولغ شروع کثغ اث کہ اے ڈاٹ ئے پل تاں ہندیں۔
شوکت فون آختہ کہ ما تاں ہندوں۔ ما یک دوہمی ئا گندغا نیوں۔ یک دوہمی ئا را ہندانی پاراں دیئغوں کہ تاں ہندوں۔ آں ہوٹل نام، دکانے جثغیں بورڈ، مزائیں بل بورڈ الغرض رووخیں سواریانی ڈس دہ داثیں۔ ہمے نیاما دو رکشہ والا بھیٹا کنانا روغ اثنت۔ ایشانی تاشینغ ئے آواز ئا شہ مان کاخت کہ اے جنگی جہاز انت او ایشانی نیاما ڈاگ فائیٹ ئے جزغیں۔ہمیشانی تاشینغ سوادا کنانا ما بورڈے چکھا اولی دھکا " پل ڈاٹ" دیثغ اث۔ اے دیثو دل ہندا آختہ کہ نی کم از کم ما ہماں ہندوں کہ ہموذا مارا بیئغی ایں۔ نی پولانا پولانا شوکت توکلی ئا دہ مارا دیثہ۔ دُراہی، بھانکر، حیر کل حیر مہرا پذا ماہڑ سئیں مڑد شوکت توکلی ئے 125 ئا زوار بیثغوں۔
شوکت توکلی وش وشی ئا موٹر سائیکل ئا بھائینغ اث۔ وختے وختے کمیں ریس داثینی تہ موٹر سائیکل ئے پٹغ وجہا ژہ کلیں وزن مئیں سر کاخت پچے کہ پذا من نشتی اثاں۔موٹر سائیکل آں رنگا دہ دو مڑدم ئیغیں مگر ما بلوچ ہڑچی زڑت کنت زیرونی۔ اے نرازیں 125 ئا پہ سئے مڑدم مزائیں وزنے نئیں۔ کچھی ئا تہ مخلوق موٹر سائیکل چکھا پنچ پنچ مڑدم زیرنت۔دوہمی تہ لیکو لافا دہ نیاینت۔راجن پور و کشمورا موٹر سائیکل ٹیکسی ئے ہندا کارا کننت۔ یعنی یہ موٹر سائیکل چکا شش مڑدم زیرنت ، او ہرمڑدم ئا کرایہ گرنت۔ اگر موٹر سائیکل ئے انجنئیر وثی موٹرسائیکل ئے ہمے حالا گندی تہ لازمیں ٹونکے کہ اے نازرکیں شئے چکا ظلم ئا گندی آنہی دل ترکیث۔ حیر من وثارا سک کثو داشتی اثاں۔ہمے واسطہ کفغ ئے ہچ خاصیں چانس نیست اث۔
نی اے روڈ آں روڈ، اے سیر آں سیر کنانا شوکت توکلی موٹر سائیکل ئا بال دیانا روغ اث۔موٹر سائیکل چکھا ما بٹاں دہ جنانا روغ اثوں۔تہاریں شف لافا روڈ کندھی ئا جثغیں بتی روڈ ا روخ کثی اثنت۔ ما چھو پریانی ڈولا بال کنانا شوکت توکلی اوتاک ئا سر بیثغ اوں۔
اوذا اولا شہ عمران لہڑی او یک دو دوہمی مڑدم نشتی اثنت۔ پذا سردار سلیم جان بزدار، حمید لیغاری دہ آختغ انت۔ داں دیرا کچہری و مئیفل کثغ انتیں۔شوکت توکلی ئا مئے بھڑیں چیٹ کثغ انت۔ پیلویں روش پندھ کنغ سوبا وھاو ئا مارا کاہاری ئا گپتغ اث۔نغن ورغا پذ تہ وھاو اغدے بازی گیڑت۔ سنگتاں گوئشتہ کہ شف لُڈثو شثہ بیا کہ نی وھاو ساہی یے کنوں۔
ما شوکت توکلی ئے اوتاک ئا وپتغو وھاو اثیں۔ من کڑو بیثو دیثہ، سنگت زونکی اث۔ من دست دیم کثو گڑتغاں تہ دیثو سنگت ہاغہہ اث۔دوشی اوتاکا ژہ باقی سنگت گڑتو وثی لوغاں شثغ اثاں۔ پناہ بلوچ، من و عمران لہڑی ہمیذا اثیں۔ نی روش بیئغا گوئر اث۔ مرگ و سہدار وثی کذامانی سرا گوئشے ذکر و فکرا کنغ اثنت یا وثی زوانا مخلوقا را روش بیئغ ئے حالا دیئغ اثنت۔
ڈیرہ غازی خان ئا را بلوچ دیرو٘ دہ گوئشنت۔ دیروّ بلوچی زبان ئے لبزیں دیروّ لوزی معنا شہرئے غیں۔ بلوچانی بازیں شہرانی نام دیرّو سرا ایں۔ چو کہ دیرو مراد جمالی دیرو اسماعیل خان دیرو بگٹی وغیرہ۔اے شہر پاکستان ئے گیست مزائیں شہرانی لافا اواریں۔ او بلوچانی مستریں چیار پنچ شہر نیاما نام کئیثی ۔پانزدہمی صدی عیسوی ئا سردار حاجی خان میرانی بلوچ ئا سندھ دریاہ ئے روش ٹبی تک ئا اے شہر وثی بچ میر غازی خان ئے نام سرا بستہ۔ گوئشنت کہ 1887 ئا دریاہا ہماں کہنیں شہرا را بھِکاں دیانا واڑتہ۔ کہنیں ڈیرہ غازی خان استیں ڈیرہ غازی خان ئا ژہ روش ٹکی پلوا تقریباً 15 یا 16 کلومیٹر دیر اث۔ نوخیں ڈیرہ غازی خان تقریباً 1900 ئے زمانغ ئا باقاعدہ پلاننگ ئا گوں استیں ہندا بندغ بیثہ۔
ڈیرہ غازی خان ئے روش ٹب ئا کوہ سلیمان،روش ٹک ئا سندھ دریاہ ایں۔ ایذا بڑزیں کوہ سراں گوں اواریا میدان، کوہ و دریاہ استنت۔ اے علاقہ زمستان ئا ساڑت و گرمی ئا گرمیں موسمے داریث۔
ڈیرہ غازی خان ئے علاقہ ئا قدرتی وسائل چھو کہ تیل، گیس و تھی دہ درکفنت۔ پاکستان ئے ایٹمی پروگرام واسطہ ئا یورینیم دہ ڈیرہ غازی خان ئے علاقہ ئا ژہ کشغ بیثہ۔ سخی سرور ئے پلوا روئے تہ ایذا کوہاں را بھورینغ ئے مزائیں کرشنگ پلانٹ جثی انت۔ ایشی ئا ژہ علاؤہ ڈی جی سیمنٹ ئے کارخانہ دہ ایذہ استیں۔ ہمے ڈولا الغازی فیٹ ٹریکٹر ئے کارخانہ اے شہرا را یہ صنعتی شہرے جوڑ کنت۔
اگر گوئشے کہ اے شہر پاکستان ئے چیاریں مزائیں صوبایانی نیاما ایں تہ دروغ نئیں، پوانکہ اے شہرا ہر صوبہ ئے مڑدم گندغا کئیث۔اے شہرا ژہ تقریباً ہر صوبہ ئے سواری دہ درکفیث۔ اے شہرا یہ یونیورسٹی ئے دہ استیں۔گوئستغیں یک دو سال پیشا اے یونیورسٹی لافا سنگتاں بلوچی ڈپارٹمنٹ کشغ ئے کوشیشے دہ کثغ اث، مگر دائیں یونیورسٹی ئا بلوچی ڈپارٹمنٹ شروع نہ بیثہ۔ اے کار کنغا گوں ہماں وخت ئے بلوچستان یونیورسٹی ئے بلوچی ڈپارٹمنٹ شعبہ بلوچی ئے چیئرمین حامد علی بلوچ دہ اوار اث۔
ڈیرہ غازی خان ئے بلوچ دو زوانا گالوارکننت یکے بلوچی او دومی سرائیکی۔ بلوچانی مستریں شائران چہ یکے اللہ بشک بزدار آں دہ ھمے شہرئے نندوخیں۔ ایذی بلوچ قبیلہانی لافا لیغاری، کوسغ،بزدار، مزاری، لنڈ، گورچانی،کھیتران، دریشک کیسرانی ، ھوت کورائی دودائی، میرانی ،رند و تھی قبیلہ است انت۔ نامی این بلوچ کلاسیکل شائر مست تئوکلی سموا پھجیا دیروئے دہ عاشق اَث۔ آنہی زیندئے مزیں بہرے دہ ھمیذا گوئستہ ۔سردار فاروق لغاری مرھوم چہ ھمے ڈیہا پاکستان ئے صدر بیثو گوئستہ۔
ڈیرہ غازی خان بلوچستان ئارا سبزی و فروٹ منڈی ئے مزائیں سہولتے داث۔ مشرقی بلوچستان ئا گرداں مغربی بلوچستان (مستونگ، منگچر، قلات، خاران و تھی بازیں علاقہ) ئے سبزی و فروٹ بہا بیئغا پہ ایذا کاینت۔ ایذا بروکرانی مزائیں کوٹھی انت۔ آں نہ صرف چھیئاں بہا کننت بلکہ زمیندارانی تعام و قیام ئے بندوبست دہ کننت۔ ایذی پولیس وخت وختے کہ بلوچستان ئے زمینداراں را تنگ کنت تہ ہمے کوٹھی والا زمیندارانی واژہی دہ کننت۔پاکستان ئے دوہمی منڈیانی حساب ئا ایذا بلوچستان ئے زمینداراں ژہ زر باز کمیں گرغ بیث۔
ایذی مخلوق باز محنتی ایں مخلوقے۔ گرمی ئے موسما "تھادل" ایذی خاصیں سوغاتے۔ ایذی مخلوق تھادلانی بہا کنغا پہ گیشترا بلوچستان ئے پلوا کاینت۔ نصیرآباد ڈویژنا ایشانی تھادلے مزائیں اسٹالے مان کئیث۔ ایشانی تھادل حقیقتا باز مشہور و نامدار انت۔
نی سنگت فریش بیثغ اثنت۔ وشیں وھاو ریشغا پذ گوئشے زی ئیں پندھ ئے کسر براور بیثغ اثنت۔ شوکت توکلی ئا مئے بھڑیں چیٹ و خذمت کثغ انت۔ شوکت ئے مہر ما وثی گنڈھا بستغ انت کہ مہر گار کنغی چھی نینت۔
نی ما شوکت توکلی ئے اوتاکا نشتو بٹاں جنغ اثوں و دیمی پروگرام ئا ٹاہغ اثوں۔
٭٭٭
(روان اِنت)
Post a Comment