 |
| فوٹو : ریگزار |
اے یک سفر نامہ یے کہ بلوچستانءِ شہرشالءَ بندات بیتءُ داں کوہءسلیمانءُ سندءِ بلوچ دمگاں تروتاب کنانءَ دیما روان کنت۔
ایشیءِ تہا نبشتہ کار ءِ ھیال ء ُ لیکہ، چم دیستیں جاورال، زبان ءُ زیمر،تاریخءُ لبزانک، دودء ُ ربیدگی پہناتءَ بگر داں ایندگہ سرپدی ء ُ دیدانک جوانیں وڑے ءَ پیش کنگ بوتگ انت۔
اے سفر نامہ ءِ نبشتہ کار واجہ مہتاب جکھرانی اِنت۔
واجہ مہتاب جکھرانی نصیر آباد ءِ جاہ مندانتء ُبلوچی ءِ تہا شعر، نبشتانک، آزمانک، ریزمانک ء ُ سفرنامہ نبشتہ کنگ ءِ جہد کنت۔
آئی ءَ بلوچستان یونیورسٹی ءَ بلوچیءَایم اے ءِ تہءَ اولی پوزیشن گپتگ۔
اے سفر نامہ ”ریگزار“ ءِ یو ٹیوب چینل ءِ تہا ام واجہ مہتاب جکھرانی ءِ جند ءِ توار ءَ شنگ کنگ بوہگءَ اِنت تاکہ اے رنگیں جوانیں نکان آڈیو ءِ تہا ام پہریزگ بہ بنت۔
اے سفر نامہ ءِ شنگ کنگ ءِ مئے مول ء ُ مراد ہمیش اِنت کہ کوہ سلیمان دمگ ءِ گالوار کہ سک باز جوان ء ُ شیرکن ء ُ تامدار اِنت۔ ءُ دومی ایش کہ بلوچیءِ ہماگالوارانی تہءَ کہ کسانیں دگری یے کہ لہتیں مردم گمان کنت، آئیءِہلاس کنگءِ یک جہدے۔ تاکہ ما کل ہمک ہندءِگالواراں پوہ ء ُ سرپد بہ بیں۔ءُ بلوچیءِ اے کلیں میراث یک ھسابا پہریزگءُ نزّارگی انت۔ ادارہ ریگزار
(اولی بہر)
فروری ءِ اولی تاریک اث۔ مناں 8 وجہ ءَ کوئٹہ روڈ ءَ سربیئغی اث پر مناں نیم کلاکے دیر بیثغ اث۔ نیم کلاکے دیر من کوئٹہ روڈ ٹیپل ءَ سر بیثغاں۔ ہموذا پناہ بلوچ مئے چاری اث۔ اے مئے اولی سئیل سواد ئے پندھ اث کہ پناہ بلوچ ءَ گوں اواری ءَ کنغی اث۔
پروگرام ءِ حساب ءَ مارا اول دیرو٘ (ڈیرہ غازی خان)، تونسو٘ و کوہ سلیمان ءِ سئیل ءَ روغی اث۔ کلاں ژہ گرانیں پندھ جیکب آباد و کِھذمیر (کشمور ءِ بلوچی نام) ئیغ اث۔ گران ہمے واسطہ ءَ کہ اے روٹ سرا جوائیں سواری نیستیں۔ ہماں کہن و ڈخیں ویگن انت کہ سیٹ باز تنگ و مخلوق ءِ کھوکھارغ ءِ سوبا ژہ بو کئیث اش۔
ٹیپل ءَ ژہ جیکب آباد ءَ داں مارا علی حسن پھژ ءَ کار سرا سر کثہ۔ ایذا شہ مئے سفر ءِ اصل ایڈونچر شروع بیثہ۔
جیکب آباد ءَ پجغ ءَ گوں مارا ویگنے دست کپتہ کہ کندھکوٹ کندھکوٹ ءِ نعرہاں جنغ اث۔ دائیں سہو اث، خاصیں رش نیست اث۔ ویگن ڈرائیور ءَ مارا گندغ ءَ پذ گاڈی ءَ را ریسانی دیئغا شروع کثہ، گوئشے کہ نی درکفی۔ ویگن منشی ءَ مئے پلوا پدیئانا گوئشتہ اگر کندھکوٹ کا ایت تہ بیا ایت، نہ تہ مارا دیر بیئغ ایں ما روغ اوں۔
ما شتاوی ءَ فرنٹ سیٹ گپتہ کہ اول ءَ شہ ہورگ اث۔
ہرکذیں ما نشتغوں، ویگن ڈرائیور ءَ گاڈی بند کثو درکپتو شثہ۔ منشی اغدے نعرہانی جنغ ءَ شروع بیثہ۔
جیکب آباد ءِ کہنیں نام خان گڑھ ایں۔ اے شہر جھٹ پٹ ءَ ژہ تقریباً 16 کلومیٹر دیریں۔ اے شہر جان جیکب ءِ نام سرا کنغ بیثہ۔ جیکب آباد دہ پیلوی ءَ قبائلی علاقہ ئے۔ ایذا مزائیں قبائلانی لاف ءَ جکھرانی، کوسغ، مغیری، جمالی، سومرو، پنہور باز مشہور انت۔ اے شہرا بلوچ گوریلا کمانڈر ترکلی جکھرانی ءِ قبر دہ استیں کہ آنہی ءَ بجار ڈومکی ءَ گوں اواری ءَ انگریز پھوژ ءَ گوں پھلیجی، لہڑی و خان گڑھ ءِ ڈیہاں پھلنگی آں گوں بھڑیں جنگے داثغ اث۔ جوانسال ابراہیم بگٹی کہ بلوچی ءِ نامی ایں شاعراں ژہ یکے، آنہی ءَ وثی زیند ءِ گڈی روش دہ ہمیذا گوازینتغ انت۔
اے شہر ءِ بلوچ سیاست لافا مزائیں کردارے بیثہ۔ آل انڈیا بلوچ کانفرنس ءِ اعزاز دہ اے شہرا را گون ایں۔پوانکہ اے شہرا را اولی بلوچ لیڈرانی مہر دہ نصیو بیثہ۔ چھوکہ میر یوسف عزیز مگسی، عبد العزیز کرد و تھی بازیں۔
جیکب آباد اے وخت ءَ دہ وثی مزائیں اہمیت داریث۔ اگر کوئٹہ ءَ ژہ رائی بئے تہ اے پلوا مزائیں اگر شہرے استیں تہ آں جیکب آباد ایں۔ بلوچستان ءَ پہ جیکب آباد ءِ دان و سبزی منڈی وثی یہ مزائیں اہمیتے داریث۔ ہمے رنگا قبائلی حوالہ سرا دہ بلوچستان اندرا دہ جیکب آباد ءِ وڑے نہ وڑے ءَ اثرے استیں۔
جیکب آباد ءَ بلوچی زوان ءِ بازیں شاعر گوئستغ انت، و اے وخت ءَ دہ بلوچی ءِ مزائیں شاعرے استیں(گو کہ اے شاعرانی شاعری ءِ انداز مئیں خیالا بلوچی نہ ایں۔۔۔یا من کلیں شاعراں نزانغاں). ہمے ڈولا اورل لٹریچر ایذی مخلوق ءَ وثی سینغاں داشتہ۔ سردار بقا محمد جکھرانی باروا دہ ہمے گوئشنت کہ آنہی ءَ گوئر بلوچی لٹریچر ءِ مزائیں مڈی یے زوانی یاد اث۔ اے شہر ءَ نواب محمد اکبر خان بگٹی ءِ لوغ دہ استیں۔ مالکی نہ بیئغ سوب ءَ نواب بگٹی ہاؤس ءِ حال دہ میر چاکر ءِ ماڑی ڈولا ایں۔ بگٹی ہاؤس کویٹہ روڈ سرا ایں۔
جیکب آباد بلوچستان ءَ را بازیں سہولتاں گوں اواری ءَ ڈاڈھر ءَ شہ جھٹ پٹ ءَ داں صحت ءِ سہولتاں دہ داث۔
الغرض جیکب آباد و بلوچستان پہ یک دوہمی ءَ لازم و ملزوم انت۔
مُوڑی ءَ نیم کلاکے پذ ویگن رائی بیثہ۔ ویگن ءَ آواز ءَ ژہ مان کاخت گوئشے اے جہازے بیث کہ بس نی بال کنغا گوئریں۔ جزان ءَ جکان ءَ ما صدام ءِ شہر ٹھل ءَ سر بیثغوں۔ صدام حسین ورنا ایں مڑدے، آں وثی وس و واک ءَ بلوچی زوان و ادب ءَ پہ جہدا کنغ ایں۔ بلوچی ءِ بام رنگ ءَ پہ صدام ءِ دہ جہد مان انت۔ درین ادبی میڑو٘ ءِ پلیٹ فارم سرا ءَ 2020 ءَ بلوچی زوان و ادب دیم برغا پہ صدام حسین ءَ مزائیں جہدے کثہ۔ (مئیں خیال ءَ درین ادبی میڑو سری یک دو ماہ ءَ پذ بالکل غیر فعال ایں۔)
ٹھل پجغا گوں ما ٹریکٹراں را جثغیں گلاسی لاؤڈانی سرا وڑیں وڑیں بلوچی و سندھی گلوکارانی سوت اشکثغ انت کہ دف پرا وجغ اثنت۔ گوئشے پیلویں شہر ڈرائیورانی رحم و کرم سرا اث۔
ٹھل ءَ شہ ما ہروخت ءَ گوئستغوں۔ اے شہر ءَ من سواری ءَ ژہ اصل دہ ایر نہ کپتغاں۔ گوئستغیں سال یعنی 2020 ءَ صدام حسین و سنگتاں درین ادبی میڑو٘ ءِ یہ پروگرامے ایر کنغ ءِ ارادہ ءَ کثی اثنت مگر کرونا ءَ نہ اشتہ۔ اے شہر ءَ من اگر کسے پجہ کاراں تہ آں صدام حسین ایں۔
ٹھل ءَ ویگن ءِ ڈرائیورانی وخت ءِ سرا جنگ بیثہ۔ مئے ویگن ءِ ڈرائیور ءَ یہ ویگن والہ ءِ رندا ویگن تاشینتو گپتہ۔ پذا اے مڑدا بھڑیں دعویٰ یے داثہ، زاں و بذ تہ ڈرائیورانی گوئشے زند ءِ بہر اث۔ پناہ بلوچ ہمے دوئینانی نیام ءَ کپتہ، ایشانی حیر کث ئی۔
پذا اغدے یہ ویگن ءَ مئے ویگن میڑینان ءَ گپتہ، ایذا گوئشے چھو جنگی جہازانی جنگ ءِ نظارہے مان کاخت۔ ایذا آں ویگن ءِ ڈرائیور ءَ شہ مان کاخت گوئشے مئے ویگن ڈرائیور ءَ را کشیث۔ اے جنگ داں کندھکوٹ ءَ جزان ءَ آختہ۔ ایشانی حیر دہ پناہ صاحب کثہ۔ من تہ بس سفر ءِ ایڈونچر ءَ ژہ چساں زیرغ اثاں۔
نی ما دو وجہ نزیخ ءَ کشمور ءَ سر بیثغوں۔
(روان اِنت)
Post a Comment