 |
| گنتر گراس | فوٹو : ریگزار |
اگاں تو نبشتہ کارے ئے ءُ چار مردم ترا اِزت ءُ شرپ بکشّیت گڑا بزانکہ اِے مردم تئی ناں بلکیں تئی نبشتگیں چیزانی کدر ءَ کن انت ءُ ترا شرپ بکشگ ءَ اَنت۔
باز نبشتہ کار اے ھیال ءَ نہ کنت۔ آ نزانت کہ اِے شان ءُ شرپ چہ کجا اتکگ ءُ من ءَ رستگ۔ پد ءَ آ وت ءَ نبارت گوں، ءُ نام داری ءِ پُشت ءَ انچش تچیت کہ دگہ جاھاں اوں دَؤر کنان بیت ءُ دز مانجنی کنت۔ بلے پد ءَ یک انچیں وھدے کیت کہ ھمے دزمانجنی نبشتہ کار ءَ زوالی ءِ ژِیمب ءُ کورچاہے ءَ انچش دَؤر دئے اَنت کہ نبشتہ کار نہ زانت اِے لٹ چہ کجام نیمگ ءَ اتک ءُ من ءَ لگ اِت۔
انچیں کسھے گنتر گراس ءِ است۔ گنتر گراس جرمنی ءِ مزنیں نبشتہ کاراں چہ یکے ءُ آ ھما وش بھتیں نبشتہ کار انت کہ وتی اولی گِدار دَ ٹن ڈرم ءَ گوں سک نام دار بیت۔ گنتر گراس وتی نامداری ءَ گوں سیاست ءِ پڑ ءَ ایر کپیت ءُ سیاسی گلے ءَ ھوار بیت۔ پد ءَ گوشیت کہ ھرچی بیت بہ بیت من ئِے گنتر گراس دروگ نہ بنداں۔ گنتر گراس ءِ اِے نام داری چہ لبزانکی نام داری ءَ جتا بیت۔ نوں مردمانی چماں گنتر گراس یک پِیرے بیت ءُ مردم آئی ءِ مُرید۔ بَلے گنتر گراس ءِ زندگی ءِ یک انچیں راستی یے اوں بیت مردم آ راستی ءَ سھی نہ بنت ءُ گنتر گراس اِے گپ ءَ تاں مزنیں وھدے ءَ چیر دنت۔
اناگہ ءَ یک روچے گنتر گراس وتی سرگوست ءَ نبیسیت ءُ سرگوست ءِ چھاپ ءُ شانگی ءَ چہ پیسر ھالتاکے ءَ گلگدارے دنت ءُ گوشیت کہ من یک وھدے ءَ ناتسی جرمنی ءِ ٹولی ایس ایس وافن ءَ گون بوتگاں ( اے ناتسی سرکار ءِ گزبناکیں ٹولیاں چہ یک ٹولے بیت)۔ دومی جھانی جنگ ءِ وھد ءَ منی دل ءَ بوتگ کہ من آپ دوز ءَ بھرتی بباں بلے پد ءَ منی سر ایس ایس وافن ءَ کپتگ۔
جنگ ءَ گنتر گراس ٹپی بیت ءُ امریکا ءِ فوج آئی ءَ دزگیر کنت۔ گنتر گراس گوشیت ھمے وھد ءَ نوں من زانتگ کہ ناتسی سرکار ءِ نیت چونیں نیتے۔
پد ءَ گنتر گراس چہ بندی جاہ ءَ آزات بیت۔ مزوری کنت۔ عکسکاری کنت۔ 1958 ءَ گنتر گراس ءِ جوان تریں گِدار دَ ٹن ڈرم چھاپ بیت ءُ چھاپ بُوّگ ءَ گوں اے گِدار مزنیں کساسے ءَ بَھا بیت۔
جرمنی ءِ مردم گنتر گراس ءِ سر ءَ پَھر بند اَنت کہ اِے راستی ءِ چیدگ اِنت۔ کس نہ زانت کہ گنتر گراس ایس ایس وافن ءَ بوتگ۔ گنتر گراس کہ وھدے وتی سرگوست ءَ اے گپ ءَ پدّر کنت گڑا نگدکارانی یک رُمبے آئی ءَ چو زردُکی گودِر (گوبز) ءَ پِر رچیت۔ گنتر گراس ءِ لوٹوک اوں چہ گراس ءَ دلپروش بنت۔ گنتر گراس گوشیت کہ من اینچو وھد ءَ بے توار بوتگاں۔ بلے اِے یک راستی یے۔ راستی تاں چِکّہ وھد ءَ چیر دَیگ بیت۔ پمیشکا اِے راستی ءَ روچے ناں روچے دیم ءَ آیگی ات۔
گنتر گراس گوشیت کہ من 15 سال ءِ اُمبر ءَ بوتگاں کہ پہ وشی ءُ رزا آپ دوز ءَ کار ءَ شتگاں بلے من ءَ نہ زرتگ اش۔ پد ءَ دو سال ءَ پد من ءَ توار کنگ بوتگ کہ ملٹری سروس ءَ کار بکن۔ آ گوشیت کہ من وھدے ڈریسڈن ءَ کہ شتگاں نوں من ءَ سما بوتگ کہ من ایس ایس ڈویژن ءَ اتکگاں۔ ایشی ءَ چہ پیسر گنتر گراس ءَ مدام گوشتگ کہ من فلیک ہیلفرے آں۔ بزانکہ من ھما ورنایاں چہ یکے یاں کہ آ پہ زور ناتسی فوج ءَ بھرتی کنگ ءُ کار گرگ بوتگ انت۔
اسل ءَ اے دروگے بوتگ۔ وھدے گراس کہ راستی ءَ پدر کنت۔ بازیں مردمے چہ گنتر گراس ءَ دلپروش بیت۔
بازیں نگدکار گراس ءَ گٹ گیر کن انت کہ تو برو وتی نوبیل داد ءَ پد ءَ نوبیل کمیٹی ءَ بدئے، تو نوبیل داد ءِ لائک نَئے۔ اے بابت ءَ اردو ءِ مزن نامیں آزمانک کار ءُ گِدار نبیس انتظار حسین وتی نبشتانکے ءَ نبیسیت کہ اگاں راستی ءَ بچارئے، مردم پرے ھاتر ءَ زھر نہ گپتگ اَنت کہ یک نبشتہ کارے ناتسی سرکار ءِ فوج ءَ بوتگ، بلکیں آ پرے ھاتر ءَ زھر گپتگ انت کہ گنتر گراس ءَ سیاست ءِ میدان ءَ اتکگ ءُ وت ءَ راستی ءِ چیدگ ءِ رنگ ءَ پیش داشتگ کہ من دروگ بندیں مردمے نیاں، بلے آئی ءَ دروگ بستگ ءُ وتی راستی چیر داتگ۔
نبشتہ کار سیاست ءَ بَھر بزوریت یا مزوریت۔ اے بابت ءَ مزن مزنیں نبشتہ کاراں وتی گپ جتگ اَنت۔ کسے گوشیت کہ نبشتہ کار سیاست ءَ بَھر بزوریت ءُ کسے گوشیت کہ ناں، نبشتہ کار وت ءَ سیاسی گلاں چہ دُور بداریت۔ آ یک نبشتہ کارے ءِ بستار ءَ زندگ بہ بیت۔
اِے یک راستی یے کہ لبزانک چہ چاگرد ءَ، چہ زندگی ءِ سُر ءُ پراں ڈن دگہ چیزے ءِ نام نہ اِنت۔ چاگرد ءَ ھر وڑیں سُر ءُ پُرے بیت آ زندگی ءِ رنگ ءُ داباں مَٹ کنت۔ (اِے سُر ءُ پُر المی نہ اِنت کہ پہ زندگی ءَ شَرّی یے بیار اَنت بلکیں ھرابی یے اوں آؤرت کن اَنت) چاگرد ءِ سُر ءُ پُراں گوں لبزانک ءِ دنیا ءَ اوں سُر ءُ پُر بیت۔
منی ھیالاں یک نبشتہ کارے ھچ وڑیں سیاسی گلے ءِ بَھر مہ بیت۔ اگاں ناں آئی ءِ جند ءِ ھما نبشتہ کاری ءِ اندری آزاتی کہ آئی ءَ نبیسگ ءِ وھد ءَ آجوئیں رنگے ءَ گون اِنت ءُ نبیسگ ءَ لاچار کنت، آ ھمے سیاسی گل ءِ رھبندانی تہ ءَ کیت ءُ دم توس بیت، ءُ دومی گپ ایش اِنت کہ نبشتہ کارے یا ازم کارے اِے گپ ءَ بزانت کہ من ءَ اگاں چار مردم شرپ بکشگ ءَ اِنت، پرچا شرپ بکشگ ءَ اِنت؟ اگاں تئی نبشتہ کاری ءُ ازم کاری ءِ سبب ءَ ترا شرپ بکشگ بُوّگ ءَ اِنت گڑا نبشتہ کار ءُ ازم کار ءِ باید اِنت کہ وتی نبشتہ کاری ءُ ازم کاری ءَ گیشتر مھکم ءُ زیبا بکنت۔ اگاں ناں تو " پِیرے " بُوّگ ءِ واب ءَ گندئے گڑا اِے گپ ءَ بزان کہ مُریدانی دست ءِ کینچی ءُ مگراز تئی بانزلانی چِنَگ ءَ اوں دیر نکن اَنت۔..
٭٭٭
Post a Comment