 |
| فوٹو : ریگزار |
عطا شادءِ دَستونکےءِ یک شئیر ت یے کہ:
دلءَ دوبہر بکنت، بہ آچشیت ءُُ داغ بدنت
چشیں طلب کُشیں عہدءَ را چاکری نہ گُشاں
وتی اے شئیرءِ باروا عطاگشیت:
”(اگن من)بہ لوٹتیں عہدءِ جاہءَ ”زند“، چاکریءِ جاہءَ ”دائمی، شائری، واہری“ءِ لَبز کار بست کُت۔طلب کُشءَ را ”طلب کَش یا طلب کِش“ہم کت کتگ ات۔ اے شئیرءِ تہا منی وتی زانتءِ وسءَ شرتریں لَبز ہمیش اَنت“(بلوچی دسمبر1991)
عطاءِ چرے دانکاں ہمے سَہرا بیت کہ آ وتی شئیرانی سراسک ہیدریچی کنت۔ شئیرءِ بندگءِ وہدا آئرا تراشیتءُُ بُرّیت۔ لَبزے حیالے دوست ءِے نہ بیت درءِے کنت۔ آئیءِ جاہءَ شرترینے کاریت۔ وہدے دلجم بیت کہ شئیر شرّ اِنت گُڑا بس کنت۔
لہتے مردمءِ حیالءَ شائری اَلہامی چیزیے پمیشاحیال کنگءُُ شائری کنگ ”آورد“ اِنت۔ شرّیں شئیر”آمد“اِنت کہ چہ غیبءَ مردمءِ دلءَ ایرکیت۔ ہمے ہنیگاں ستمبر1996ءِ مہتاک بلوچیءَ اشرف سربازی ءِ حالترانے شِنگ بیتگ۔ اے جُستءَ کہ پیسرا تو شائری کُتگ مرچاں پرچا نہ کنئے آ چو پسّودنت:
”بقول احمد جگر۔شائری لیبے نہ انت اے وا حُدائی دادیے۔ نوں اے وا حداءِ دستءَ انت کہ ہروہدے لوٹیت دنت یئِ ۔ ہروہدے بہ لوٹیت پچ یئِ ہم گریت۔“ دیمترا گُشیت: ہنچش کہ گُشنت ”شاعری جزویست از پیغمبری“۔ وہدے کہ شائر مہرءِ مارشتءِ گولم ءَ بُک وارت۔ آئیءِ عقل، ساروسما رَوت و آئیءَ الہام بیت۔ پیغمبرانی وڑا آئیءِ سرا وحی ایر کیت۔“اشرف سربازیءِ ہم حیالیں مردم شائریءَ وحی مَنّینگءِ ہاتراغالبءِ اے شئیرءَ ہم جننت:
آتے ہیں غیب سے یہ مضامین خیال میں
اگں ہِیرت بچارئے حُدائی داد ایوکا ”وحی“ نہ اِنت بلکیں ہما بُودءُُ جوانیءَ ہم گُشنت کہ کسےءَ چہ جَوپءَ یا دَرکسانی گون اِنت۔ ہمے پیم غیب ایوکا ”لامکان“ یا نیستی نہ اِنت بلکیں غالبءِ شئیرءِ حسابءَ غیب اَندرسما(لاشعور)ءَ ہم گشنت۔ بزاں غالب گشگا اِنت کہ شئیر چہ اَندرسماءَ مردمءِ سَماءَ کاینت۔ چوکہ سماءُُ اَندرسما ہردو مردمءِ سَسّا(ذہن)ءِ بہر اَنت پمیشا شائریءِ پیدا کنوک مردمءِ سَسّا اِنت۔
اے گپ راست اِنت کہ جوانیں شائری زور نہ بیت بلے اے ہم راست یے کہ شائری الہامی چیزے نہ اِنت بلکیں مردمءِ سساءِ کمال اِنت۔ اے حسابءَ آوردءُُ آمدءِ جیڑہءِ جِند بے مانا اِنت چیا کہ درستیں شئیر مردمءِ ساچشت اَنت۔
وتی شئیرانی سرا ہیدریچی کنگ حرابیں چیزے نہ اِنت۔ ہر شرّیں شائر اَنچوش کنتءُُ عطاشرتر چیاکہ آ زانت کہ شائری سنگینیں کاریے۔آ گُشیت:
”منی حیال اِنت کہ مئے شائریءِ زوال پمیشابوت کہ یکے تہ مئے شائراں درد نیست ماں دلاں۔ دومی شائراں شئیر گُشگءِ بدلءَ واز کنگءُُ جار جنگ بنا کُرتگ۔ اے زوال اَچ مُلاپازل،مُلا قاسم،مُلا بہادرءُُ دومی ہمے مُلّایانی زانتکاریءِ سببءَ اَہتگ۔ چونایا اے واجکاراں ہرجاگہ واز نہ کُرتگ سکّیں شرّیں شائری کُرتگ۔“(”شائری،مئے شائری“مہتاک اُلس، کوئٹہ 1962)
عطا لَبزانی گچینءَ سک حیالداری کنت پمیشا آئیءِ شائری چہ رَبیتی شائریءَ اَنچو جتا اِنت کہ بازبراں درامد جاہ کیت۔چو کہ:
ماہکان اِنت،نہ استال سباہیگ،ودیگ
بے تو،شپ روچ تہاری،تئی وابءِ مانا
عطاءِ گالوارچہ ایدگہ دراہیں شائرانیگءَ جتا اِنت بلے اے ڈَولداراِنت۔ باز گُشیت کہ عطاءِ شائریءَ وانوک سرپد نہ بنت۔ اے گپ داں حدے راست اِنت بلے پریشیءَ عطاءَ گیش وانوک میاریگ اِنت۔اگن وانوک ءِ سسّاءِ بال جَہل اِنت ءُُ عطا شاد ءِ ہَبراں پوہ نہ بیت گُڑاوانوک وت میاریگ اِنت۔ساچشتکار وتا جہل نیاریت۔ اے وانوکءِ کاراِنت کہ وتا بُرز بہ بارت۔
داں غالب زندگ اَت ہرکسءَ آئیءِ تام بُرتگ اَت کہ تئی شائریءَ کس پوہ نہ بیت۔ تو گنوکانی وڑا رَپٹئے۔ تئی شئیربے مانا اَنت۔ بلے مرچی اگن کسے چو بہ گُشیت مردم ہمائیءِ جندءَ گنوکے لیکنت پرچاکہ نی غالب اردوءِ مستریں شائراِنت! بگندئے عطاشادءَ غالبءِ تالِہہ گون اِنت۔ دانکہ زندگ اِنت آئرا ہرکس ڈوباریت۔ وہدے مریت گُڑا بلوچیءِ ”سر شائر“بیت!
دلگوش: اے نبشتانک 1996 ءَ عطاءِ مرگءَ پیش نبشتہ کنگ بیتگ ۔ءٗ چہ واجہ ناگمان ءِ منتءَ چہ ریگزارءِ ویب تاک ءِ تہا ہوار کنگ بوہگءَ اِنت۔
***
Post a Comment