لبزانک، راہبند ءُعطا شاد | منیر مومن

فوٹو : ریگزار

  

مردم کہ چماں پچ کنت، آئیءِ چاریں نیمگاں۔۔حصار اَنت۔۔۔دیوال اَنت۔۔۔پگری حصار۔۔اخلاقی لِیک۔۔قانودی دیوال۔۔ ربیدگی نوان۔۔۔ اے درسیں اِدارہ وتی وتی رہبند یا سسٹمانی تہا اَنت۔۔۔ءُُ ہر رہبند مردم ءَ وتی جوڑ کتگیں لِیکے ءِ حساب ءَ کار گیپت۔۔ مردم ہچ جاگہ اینچو تہنا نہ بیت کہ وتی اند ر ءِ مردم ءِ بابتءَ بہ جیڑیت،وتی ڈکّھ ءُُ تکانسریاں۔۔۔وتی ارس ءُُ بچکنداں پہ معنایے بشوہازیت۔۔انسان چہ ودی بوہگءَ تاں مرک ءَ ہمے رہبندانی دستءَ انت۔۔بلئے ہر مردم ءَ لہتیں انچیں جست است کہ آئیءَ کنگی اَنت۔۔

اے سسٹم ءُُ رہبند کہ مئے چپ ءُُ چاگرد ءَ تالان اَنت۔۔ اے مشین اَنت۔۔ایشانی تہا بس actionفیڈ اَنت۔۔گڈا مردم چے بکنت۔۔؟کجا برؤت۔۔؟انسان ءَ وَ انچیں جاگہے انچیں کُنجے ءِ حاجت بیت کہ اودا وتی جستاں ایر کت بکنت ءُُ آہانی زگریں پسہاں بپولیت کہ آہانی سرءَ اے مشینی رہبندانی سان ءُُ ساہگ مہ کپیت۔ پہ درور بگشان۔۔ اگں کسّےءَ لہتیں جست گوں وتی مہذبءَ است، گڈا آچون بکنت۔۔۔؟ پرچا کہ مہذب ءِ کرا پسہانی یک درچے است ءُُ موجود اِنت، کہ ہر جست چہ ھمدا سیراپ کنگ بیت ءُُ دگہ نوکیں پسہے ءِ جوازت در کپت نہ کنت۔۔۔ھمے پیم اگں کسے ءَ وتی راجی دودمان ءَ جیڑہ ے است۔۔ بلئے پسہ ادا ھم چہ پیسرا گشگ، گیشینگ ءُُ مینّ کنگ بوتگنت۔۔ہر نوکیں جست گوں کوہنیں پسہے ءَ دونگ بیت۔۔ مہذب، دودمان، ملک، قانود  ہر تک ءَ کہ بچارئے۔ ندارگ ہمیش انت۔۔ ہر ادارہ ءِ واستہ المی انت کہ آ وتی پسہاں بہ گیشینیت۔

نوں لبزانک ھما یکیں جاگہ اِنت کہ اود ا مردم وتی زگریں جستے ایر کت ءُُُ آئیءِ اسیلیں پسہے شوہاز اِت کنت۔۔انسان چہ لبزانکءَ پمیشکہ بے حاجت بوت نہ کنت کہ اے آئیءِ زات ءِ زگریا originalدارگ ءِ گڈی پناہ گاہ اِنت۔۔۔انسان چہ رہبنداں تچیت، ہمدا کئیت ءُُ پناہ زوریت۔

عطا لبزانک ءِ مردم اِنت۔۔ شئیر ءِ مردم اِنت۔۔ اے گپ باز تاھیر بکش اِنت کہ عطا گیر آرگ بوگا اِنت۔۔ در جنئگ بوّگا اِنت۔۔۔ بلئے عطا ءَ گیر آران ءَ مارا اے ہم گیر آرگی اِنت۔۔ کہ عطا چوں جیڑگ بوّگا اِنت؟ ائے جیڑگ ءُُ گیر آرگ ءِ رپک ساچشتی ءُُ لبزانکی اَنت۔۔؟یا ما وتی حصارانی تہا عطا ءِ جیڑگ ءِ جہد کنگائیں۔۔؟ کسے گشیت کہ عطا مزنیں شاعرے، اے ھاترا کہ عطا ءَ زبان ءِ ھزمت کتہ۔۔۔ (بلے واجہ اے و تئی راجی سسٹم اِنت کہ وتی زبان ئے ترا دپ ءَ داتہءُُ اے گپ ئے پرماتہ)

دگہ سنگتے  گشیت کہ ”عطا بے مٹیں شاعرے، اے ہاترا کہ آئیا ایر دست ءُُ بزگانی پلہ مرزی کتہ۔۔۔(ادا پدا واجہ تئی راجمانی ءُُ پگری سسٹم ترا ھبر پرماہگءَ اِنت) من حیراناں کہ منی شائر ءُُ لبزانت کدی ھبر کنت۔۔۔؟

اگں مئے گیر آرگ ءِ رپک ایش انت۔۔۔گڈا اے ساچشتی ءُُ لبزانکی وڑ ءُُ ڈول نہ انتءُُ من ءُُ تو عطا ءُُ عطا ءِ ساچشت ءَ آرگ ءُُ ہمے سسٹمانی میار کنگائیں۔۔۔ہما سسٹم کہ لبزانک مارا چراہاں رکینیت۔۔ ھمے سبب اِنت کہ داں روچ ئے مروچی ما نزانیں کہ 

”پلانی ہشکیں پن پچے چو بیوسی 

تئی شنگیں ملگورانی سیاہیں دامن ءَ 

چو کہ منی ارساں رچنت“

یا

مسکیں سمین ءَ کئے بدنت لہمیں گمانی پسو ءَ 

اے پیمیں مصرآں کجام فریم ءِ تہا ایر بکنیں کہ معناہے بدئے اَنت۔ ابہام دگہ ہچے نہ ِانت، بس دوری ے۔۔۔کہ لبزانک ءُُ وانوک ءِ نیام ءَ ھمے سسٹماں دیوالے ءِ وڑا بستہ۔۔۔ءُُ عطا لبزانک ءُُ ساچشت ءِ مردم اِنت۔تہ باید اِنت ما چرے سسٹماں جتا آئیا بچاریں ءُُ بہ جیڑیں۔۔۔ اگں ما اے وڑ کنگ بے سوب بوتیں گڈا ما بس راجی، پگری، راجمانی یا مہذبی ھزمتے کنیں ءُُ وتا رد دئیں کہ ما ساچشت ءُُ لبزانک گیر آورتہ۔۔۔

من کہ عطا ءَ واناں۔۔۔۔عطا ءَ جیڑاں۔۔۔منی تنہائی توانا بیت۔۔۔منی کرا عطا ءِ مستریں سپت ایش انت کہ آمنا اچ منی جند ءَ پرسگ پرمائیت منا چندے انچیں جست دنت کہ آ ہچ پسہ ءِ منتوا ر نہ اَنت۔۔۔

عطا بہ بیت یا دگہ مزنیں لبزانتے آئی ءِ جوانی ھمیش انت کہ آترا تئی دیم ءَ بوشتارینیت۔۔۔عطا پمن اے ہاترا مزنیں شائرے نہ انت کہ شئیری ٹکنیکاں زبر اِنت۔۔۔پرچہ کہ ساچشت چہ زیل، رد ءُُ پیشرد یا چہ پلاٹ ءَ باز برز تریں چیزے۔۔۔ عطا من ءَ پمیشکہ دوست بیت کہ منی درد ءَ تاگت دنت۔۔۔ عطا من ءَ پمیشکہ سک اپیل کنت کہ آ لبزانی تہا وتی بیوانکی ءَ گار بوّگ نیئلیت۔

عطا گیر آرگ کرزیت پمیشکہ کہ عطا ءَ وتا رہبندانی دام ءِ تہا دیستہ، پجہ آورتہ ءُُ پدا وتارا وتی توارءَ گوانک جتہ۔۔۔ءُُ ھمے گوانک معنا نہ بوّگا اِنت۔۔۔ چاریں آتراپاں گبارے رُستہ۔۔ءُُ کس نزانت کہ 

”مسکیں سمین تاں پلو ءَ کئیت ءُُ گوزیت“

چاگردءِ توامیں سسٹم کلیں رہبند کار ءَ اَنت۔۔۔بس انسان۔۔۔بس انسان چو مشینے ءَ بزگ اِنت۔حقیں شائر ءُُ لبزانتے ءِ گیر آرگ سک گران اِنت پرچاکہ اے کار ءِ ہوری ءَ مردم وتی جند ءَ چہ دور ءَ گندیت کہ مشینے ءِ تہا بندیگ اِ نت۔۔۔۔

لبزانک پدراہی اِنت زگریں وجودے ءِ۔۔۔یک انچیں مردمے کہ آئیا چاگرد، پگر، مہذب، راجمان ءُُ کلیں چاگردی سیت ءُُ تاوانانی دنز چنڈاِتگنت ءُُ پیداک اِنت ءُُ انچو زگر اِنت کہ اگں آدینک ءِ دیم ءَ بوشتیت، وت ہم حیران بیت کہ اے کئے انت۔۔؟لبزانک اسل ءَ ھما گاریں وجود ءِ شوہاز اِنت کہ ما وتی چاگردی، علمی، پگری ءُُ راجمانی لوٹانی چیر ءَ بار داتہ۔۔۔ ماکہ لبزانکی ءُُ ساچشتی مردماں جیڑیں گڈا مارا ہمنچو زگر ءُُ pureبوّگ لوٹیت یا ھمے زگری ءُُ purityہما لبزانت ءِ تہا شوہاز کنگ کپیت۔۔۔لبزانک کُربانی ے ہما مردم ءِ ہاترا کہ لبزانک ءِ کرد ءَ سرپد اِنت۔۔۔۔ ءُُ عطا مزن اِنت، کہ آئیا اے کربانی داتہ۔۔۔ وتا بورینتہ۔۔۔ پدا سازاِتہ۔۔۔ ءُُ پدا بورینتہ۔

دلگوش: اے نبشتانک واجہ منیر مومن ئیگ اِنت کہ چہ بلوچستان اکیڈمی تربت ءِ تاکبند "آدینک"ءِ ھاسیں تاک "عطاد شادءِ شاعری ءِ نگد" ءَ چہ زورگ بوتگ ءُ چہ بلوچستان اکیڈمی ءُ چہ منیر مومن ءِ رضا ءَ چہ "ریگزار" ءِ ویب تاک ءِ تہا شنگ کنگ بوہگءَ اِنت۔ادارہ 

٭٭