 |
| فوٹو کریڈٹ Pexels |
مروچی دل ءَ اومان کتگ کہ وتی حیالانی مَہری ءَ لبزانک ءِ دراج ءُ شاہگانیں دنیا ءَ پہ دلجمی بہ تاچیناں۔ بلے من زاناں کہ اے دنیا یک مزنیں دنیایے۔۔۔ اے دنیا ءَ ہزاراں بلیک ہول اَنت کہ مردم ءَ پِلّکگ ءَ ہچ آسر ءَ نہ کن انت۔۔۔۔ پہ اے دنیا ءَ ایر کپگ ءَ یک ناں بلکیں ہزاراں زندگی من ءَ ءُ منی حیالانی مَہری ءَ بہ رسیت ما لبزانکی اے دنیا ءَ یک بچیلے ءِ سفر بکنیں ہم پہ مزنیں گپے بیت۔۔۔۔
لبزانک ءِ دنیا ءَ باریں چنچو مردم ایر کپتگ ءُ ہمے دنیا ءِ مجانی تہا گار بوتگ پرچا کہ ادا گوریچ، شمال، سیاہ گوات، گوات ئِے سئے سران، باریں دگہ چنچو شرتگ، چنچو نپت ءُ بِیر کپیت۔۔۔۔ کزا یکے اے دنیا ءِ تہا وتی نام ءِ چیدگانی مِک کنگ ءَ سوب مند بیت۔ بلے اے سوب مندی ءِ ہاترا مردم ءَ یک دلجمیں ھُب ءُ واھگے، صبر ءُ اوپارانی جہلانکیں زِرے گون بہ بیت۔۔۔ ادا آچش انت کہ آچ شان اَنت۔۔۔ ادا دست ءُ پاد ناں بلکیں دل ہم تراول بنت۔۔۔ چم تِیری مِیری کن انت۔
لبزانک ءِ یک چیزے من ءَ دوست بیت کہ ادا سیمسر نیست، ملک نیست، ادا تہنا ساچست حبر کنت۔ نجیب محفوظ ءِ زبان ءَ وَ من سرپد نباں۔۔۔ بلے نجیب محفوظ ءِ ساچشت کہ من ءَ سر بیت من سرپد باں کہ نجیب محفوظ ءِ نبشتگیں کسہ ءِ پژدر ءَ چے ہست۔ ہمے رنگ ءَ من حوان رلفو ءِ زبان ءَ نزاناں نئیکہ من آئی ءِ ملک دیستگ، بلے آئی ءِ ساچشتی دنیا ءَ من سفر کنان ءُ کایاں۔۔۔ ہمے وڑا کافکا ءُ بورخیس ءِ دنیا انت۔ بورخیس ءِ حیالی دنیا بہ بیت کہ حیالی کتابجاہ۔۔۔۔ بلے من اودا آئی ءِ ساچشتانی وسیلگ ءَ شت کنیں۔ من بورخیس ءِ دنیا ءَ اساطیراں گوں حبر کت ہم کناں۔ پرچا کہ اے لبزانکی ڈاک ءِ تہا من ءَ اے دوچار کپ اَنت۔
من ایم اے لٹریچر ءِ تہا کتگ۔ بلے ایم اے کنگ ءَ پد گمان بیت کہ لٹریچر چشیں چیزے نہ انت کہ کورسانی کتابے ءِ تہا آرگ ءُ بلیک بورڈے ءَ ترا وانینگ بہ بیت۔ مارا چنچو مزنیں ناول پہ وانگ ءَ دئیگ بوتگ کہ ما پدا ایشانی سرا بیائیں ءُ گپ بجنیں۔ نودربراں اے ناول ونت کت نہ کتگ انت۔ من دیستگ کہ آ برے منی کِرّا برے دگرے ءِ کِرّا شتگ انت، برے آیاں گوگل ءَ سرچ کتگ کہ اے ناول ءِ سمری چے انت۔ پمیشکا من گشاں کہ لٹریچر ءَ مردم ہما وہد ءَ ونت کنت کہ آئی ءَ گمان بہ بیت کہ من ءَ ہم حیالانی دنیایے ہست۔ نوں بگندئے ہمدا چیزے دز بجنت ءُ لبزانک ءِ پراہ ءُ شاھگانیں دنیا ءَ وتی حیالانی تحت ءِ روان ءَ بہ نندیت ءُ سفر بکنت۔
چیزاں دگہ مردم چوں چارنت؟ آ چیزانی بابت ءَ چے جیڑنت؟ اے کار ءَ ہما بزان انت ءُ ہمایانی تب۔۔۔ بلے چیزاں من چوں چاراں، من ہمیشانی بابت ءَ چے جیڑاں۔۔۔ اے منی دنیا انت۔۔۔ دنیا ءِ مزن مزنیں گِدار کہ آیاں نوبیل داد گپتگ۔ بلے باز وہد ءَ من ءَ ہمے گِدار پہ وانگ ءَ دوست نہ بوتگ انت۔ ہمایاں نوبیل داد نہ گپتگ آ من ءَ دوستر بوتگ انت۔
مروچی لبزانک ءِ تب بدل بوتگ۔ زی ئیں گدار نویس ءَ گِدار ءِ تہا گونڈ گونڈیں چیز ءُ وتی کارستانی ڈیل ءُ داب پیش داشتگ۔ مروچی آ وڑ نہ انت۔۔۔ گستاؤ فلابئیر ءِ گِدار مادام بواری ءِ تہا گونڈ گونڈیں چیز انچو پیش دارگ بوتگ انت کہ نونیں ناول نویس ایساں سرگوز کنت پرچا کہ نونیں گِدار نویس ءِ دیما دنیا مشرف عالم زوکی ءِ گِدار "پوکے مان کی دنیا" ءِ دنیا انت۔
(روان اِنت)
Post a Comment