گُباریں دل
وتی بستار ءِ شوھاز ءَ دَراتکہ چہ وتی شہر ءَ
گُباریں دل
گُباریں منزلانی راھسر ءِ راھی
اے راہ ءَ باز ابیتکی اِنت ءُ تہناھی
گُباریں دل وتی ھمراھی ءَ کسّے ببر
بلکن
ابیتکی پہ ترا نہ گیگی یے بیاریت پہ بے وانکی
یا تہناھی ءِ زمزیل تئی پاداں بہ پیڑاں گون وتی زلپاں
ببئے بندیگ تو اے راھسرانی '' سنگِ میل '' آں گون
در ءَ شوھاز وتی بستار ءَ دہر ءِ درائیں گَٹّاں گُؤل
سباہ ءِ لنکک ءَ دزگِر ءُ ماھ ءِ سینگ ءَ تو پُؤل
گباریں دل
گباریں منزلانی راھسر ءِ راھی
تئی بستار چی اِنت
قد چی اِنت
چے تئی رنگ اِنت
جھان ءِ ہر وڈیں رنگ اِنت
کہ تئی رنگ ءَ گون ھمرنگ اِنت
گباریں دل
تئی آسودگیں روچانی پُشت ءَ گُژن گوازی کنت
مچار سَر زاہر ءَ
من ہر رُو گشت ءَ گُژن گوازی کنت۔
Post a Comment