( بَالو ءِ نام ءَ )
من ءُ ''بَالو'' کہ وہدے کشک یے رَپتاں
نہ زانت کہ زندگی ءِ رنگ چی اِنت
نہ زانت کہ واھشانی چونیں اُزراں
نہ زانت کہ کندگانی درد چی اِنت
نہ زانت کہ گریوگانی چے بَد ءُ شَر
نہ زانت کہ جیڑگانی چے بیت آسَر
من ءُ بالو کہ وہدے کشک یے رَپتاں
ھمک دمک ءَ ھمک دیوال ءِ پُشت ءَ
تئی یاتانی تُوتی ھمکلام اَت
ءُ چاریں نیما امروز ءَ ھمک روچ
مُریدیں دل چو جُونے ءَ تلام اَت
ماں سِنگ ءُ آھن ءِ ماڈی ءَ بُرزیں
چہ زیماں دیدگ ءِ وابے حرام اَت
وتا گون کندگا اَت لہم لہم ءَ
دل ءِ دیوانگی ءَ سد سلام اَت
چے پئیمیں واب دیستگ دیدگاں مئے
چے پئیمیں پگر جیڑئے سنگتاں مئے
چے پئیمیں گَم نہ سَگّ اِت ھمبلاں مئے
ھمک جنگل ما گُؤل اِت چو کپوت ءَ
ھمک راھسر ما پؤل اِت چو گنوک ءَ
ھمک گیابان ءِ دلبند ءَ ھمک شپ
ما نِشت ءُ ماہ جبین ءِ گَم کماتاں
وتی چہ اندر ءَ بُوتیں شکستہ
بَلے اے درد کسّ ءَ ھال نہ داتاں
ھمے گیابان ءِ پیچ اِیں راھسریے ءَ
اناگاہ زندگی ءَ مسکراہ کت
تمامیں دروشمانی رنگ رَپتاں
وتی پہ ھانی ءِ شوھاز ءَ وئیل اِیں
گنوکیں شے مُرید ءِ ارس رِتکاں
مروچی کہ وتی جیگ بند ءَ چاراں
ھمک نیما تماشایے بِنا اِنت
اگہ اُزریے بیاراں باں ملامت
بَلے اے رنگیں ھاموشی گناہ اِنت
زمانگ ھر وڈیں ایلنگ بندیت
بَلے اے مھلبیں مئے ھاک پہمیت
منا چہ پیسرا تو بُوت ءِ زندگ
ترا چہ رند انگہ مُرتگاں من
تئی وابانی آسر زندگی اَت
منی پگرانی آسر مُردگی اِنت
گُباریں زندگی ءِ دَنزیں دَمکاں
من رژن ءِ پدگِریں گاریں سپاھیگ
Post a Comment