اے نبشتانک ءَ چہ ساری من اگاں پٹانی گوشکندے میار آں، گْڑا بلکیں شْما منی نبشتانک ءِ مول ءُْ مراد ءَ سرپد مہ بئیت:
پٹانے ءِ لوگ ءِ کَش ءَ سرکاری شوکیں پَٹّے"زمین" اَست اَت۔ پٹان دلمانگ اَت کہ اے زمین ءَ وتی نام ءَ بہ کنت بلے آ چہ سرکار ءَ تْرسگ ءَ اَت۔ گڑا آئی ءَ گوں وتی سنگتے ءَ شور کت کہ من چْشیں کارے ءَ دلمانگ آں بلے من ءَ تْرس ایت۔ سنگت ءَ شون دات کہ شپو شپ چار ءُْ پنچ وتی برادری ءِ مردم بہ زیر ءُْ ھمے زمین ءِ چْنڈ ءَ چار دیوال ءِ توک ءَ بہ کن وھدے کہ دیوال تیار بیت گڑا بیا ءُْ من ءَ واب ءَ چہ پاد بہ کن من وت وڑے ناں وڑے کن آں۔
شپ کہ بیت پٹان ءَ شش بلاھیں سہرگ ایں لالہ ایں پٹان زْرت ءُْ چار تاں پنچ کلاک ءِ توک ءَ ھمے سرکاری زمین چار دیوال ءِ توک ءَ کت۔ پد ءَ پٹان ءَ وتی سنگت توار جت۔آئی ءَ ڈبّہ یے اِسپیتیں رنگ گوں بْرشے ءَ آؤرت ءُْ زمین ءِ سر ءَ نبشتہ کت: (ہم قائد اعظم کو پشاور آنے پر خوش آمدید کہتے ہیں)۔ ھمے ڈول ءَ پٹان ءَ وتی سنگت ءِ سوجانی پد ءَ سرکاری زمین چہ سرکار ءَ پْل اِت۔،،
اے انگت گوشکندے اَت۔ بلے.........وھدے کہ منی ناکو (زال ءِ پت) مْرت گڑا منی وسِرک علی ءَ شپو شپ وتی چار کار داریں مْلباری پرمات اَنت ءُْ پت ءِ لوگ ءِ پْشت ءَ یک بلاھیں گیسی مْرگی کْڈّی بست ءُْ تیار کت۔ پرچا کہ آئی ءَ زانتگ کہ منی پت ءِ وصیت ءِ توک ءَ مارا بزاں بیست ءُْ سئیں برات ءُْ گوھاراں! ھاک ءُْ پْر رس ایت۔
چْشیں غیر قانونی کار ءُْ بار بازینے ءَ کتگ! لھتیناں پسّیل، گڑا لھتے ءَ چْلّ ءُْ لھتے ءَ بیٹک بستگ بلے........ بیا کہ سیٹ اللہ بکش ءُْ آئی ءِ سیکرٹری واحد بکش چون کن اَنت کہ شپو شپ پیشکان ءِ چوک (چار راہ) ءِ سر ءَ یک کسانْکیں کیبنے بند اَنت اے کبین کدّ ءِ PCO آفیسے بیتگ اَت۔ پد ءَ سھب ءَ دوھیں پراڈاں اے پارم تیوگیں ملک ءَ بھر کت اَنت کہ بیا اِت سرکار ءِ نیمگ ءَ چہ شمارا ”جِڈّی ھاؤسینگ اسکیم“ ءَ چہ لوگ ءُْ جاگہ اگاں ناں زمین ءُْ پلاٹ رس ایت۔ اے دوھیں براڈاں! پیشکان ءَ بگر تاں گنز ءُْ جیمڑی ءَ ھر یک گریب ءُْ پکیرے ءَ چہ پنچ سد تاں ھزار کلدار گر اَنت ءُْ ایشاناں یک یک فارمے دست ءَ دینت۔ وھدے کہ سرکار ءَ ھوش کت۔ داں اے دوھیں سادگیں بلوچانی زرّاں چہ کلوڈ کلدار جما کتگ اَت۔ گڑا پد ءَ تحصیلدار گوں سپاھیاں کئیت ءُْ اے دوھیناں گوں فارمانی ھوری ءَ چو کْکڑانی وڑ ءَ گریت ءُْ گوادر ءَ مَچّ ءِ جیل ءَ بند کن اَنت۔ داں ھپتگے ءَ ایشانی شام ءُْ سْبارگ سرکاری لَٹّ ءُْ کْٹّ بیت۔ ھپتگے ءَ پد وھدے کہ سرکار ایشاں یلہ دنت ءُْ اے وتی دیار ءَ کاینت داں دوھینانی لوگانی دپ ءَ مردماں نبشتہ کتگ اَت۔ (جْڈّی گلی، زندہ باد) ءُْ مرچاں دوھیں، اللہ بخش جڈی ءُْ واحد بخش جڈی ءِ نام ءَ نامدار اَنت، بزاں سپہ دار اَنت۔
٭٭٭
Post a Comment