گوادرالم ءَ مانیت .... حنیف دلمرادؔ

گواد ر مروچاں سک نامدار انت کہ آؤدا مزنیں بندن یے چین ءِ کمک ءَ جوڑ بوھگ ءَ انت۔ بندنءِ 40درصد کارو َ بوتگ بلے 

درصد کار انگت ءَ پشت کپتگ۔ آئیءِ سوب سیاسی،معاشی ءُ چاگردی است انت۔

گوادر بندنی درگت ءَ مدام ارزش دیگ بوتگ۔ کوھیں دور ءَ ھم گوادر ءِ بندن ءِ تہا تجارتی ءُ عسکری چست ایر گندگ بوتگ انت ءُ  مروچاں ھم اے درگت ءَ ایشی ءِ اگاں ارزش یے است گڑا آھمیش انت 1990ءِ دیک ءَ بگر داں 2001ءَ چہ بندات بوتگیں نوکیں صدی ءِ تہا ھرچ حاکم ءَ ایشی ءِ ارزش ءِ گپ جتگ۔ اگاں دراہیں سیاسی ءُ ملکی سروک گوادر ءِ دیمروئی ءَ پہ چو ھدوک انت گڑا الم ءَ گوادر ءِ ارزش یے است انت۔ بے ھچ ءَ کس چوش جاک نہ کنت۔بلے گوادر ءِ انچوش کہ ما گوشت کہ تاریخی بستارے ھم بوتگ گڑا آبستار الم ءَ چارگ ھم بیت انت۔ما اگاں 1498ءَ پرتگالی (کہ ایشاں بلوچ راجدپتر ءِ تہا فرنگی نوشتہ کن انت)اتک انت گڑا آزرباری ءُ روایرکپتی ہندوستان ءَ شت انت نوکیں بندن ءُ تجارت ءِ راہ ءُ درانی شوھاز ءَ پرتگالی آں ہندوستان سک باز دوست بوت۔ بلے اے وھد ءَ پرتگالی ہندوستان ءِ سیمسراں کہ سربنت اے دور ءُ زمانگ ءَ بلوچ عرب،ترک ءُُ اے دگہ ایشیائی راجانی وت ماں وت سیاسی ءُ تجارتی رابطہ بنت ھمے وڑ بلوچ ءِ افریقہ،عرب ءُ ہندوستان ءَ گوں ھم ھمے  وڑیں نزیکی بنت۔پرتگالی چوش کہ ہندوستان ءِ میزان میزان ءَ گرگ ءَ سوب منت بنت گڑا رند ءَ پپرتگالی آنی مزنیں مشکل عرب بنت ھمے سوب  بوت کہ آ خلیج ءِ فارس ءَ رندی سالاں گوں عرباں جنگ دینت ءُ  عرباں مزنیں تاوان یے دیان ءَ عرباں چہ ہندوستان ءِ تجارت ءَ در کن انت ءُ ھمے راہ ءُ رنداں وتی دست ءَ زور انت عرباں گوں جنگ دیگ ءُ پروش ءَ رند پرتگالی بلوچستان ءِ مکران ءِ تیاب دپ ءَ دیم کن انت اے زمانگ ءَ حمک جیہند ہوت کلمت ءُ تیسی ءِ بنجلاں نندان  ءُ تیوگیں بلوچ تیاب ءِ سرءَ حاکم بینت انت۔بندر عباس ءِ حداں بگر داں سندھ ءِ ٹھٹھ ءِ بنداں داں واجہ ءِ حاکمی بیت انت۔

 حمل عسکری درگت ءَ سک تیار بیت انت ھمے سوب انت کہ پرتگالی بلوچستان ءِ تیاب دپ ءَ ھرچ وھدے کہ دیم کن انت گڑاآپروش ور انت بلے حمل ءِ پروش ءُ دست گیر کنگ ءُ برگ ءَ رند پرنگی بلوچ تیاب ءَ مدام کاینت ءُ رونت بلے گیشتریں بنداں پرنگی بلوچانی دست ءَ جنئگ بنت ھمے سوب انت کہ یک رندے آ پسنی ءِ شہر ءَ آس دینت ءُ د رکپنت شہر ءَ آس دیگ ءِ پشت ءَ ھمے نفسیات  انت کہ پرنگی آں پروش وارتگ اگاں ناں پرنگی الم ءَ پسنی ءَ نشتگ ات انت پرتگالی آنی بندر عباس ءَ دمب ءُ دگہ ماڑہ ءُ جاگہ رسنت بلے بلوچستان ءِ تیاب دپ ءَ آئیانی ھچ وڑیں چشیں آثار نہ رست ابید چہ گوادر ءِ شہر ءِ تہا (کوھنیں شہر)کہ آؤدا ایوکا یک سنگر (Check post)ئے جوڑ انت ءُ دومی دگہ لہتے سنگر باتیل ءِ کوہ ءِ سر ءَ بوتگ انت آ سنگرانی دیم تیاب ءِ نیمگ ءَ بوتگ۔ادا زانگ بیت انت کہ حمل ءِ دور ءِ ھلاس بوھگ ءَ رند ھم پرتگالی ادا نشت نہ بوتگ انت بلوچ تیاب ایوکا یک سنگر ءِ وڑ ءَ کار مرز اش کرتگ ھمے سنگر کہ سنگ بند بوتگ انت اے دراہیں سنگ 2003ءَ گوادر بندن ءِ کاربندات بوھگ ءِ وھد ءَ ٹھکیداراں برتگ انت ءُ بندن ءِ جوڑ بوھگ ءِ جاہ ءَ دور داتگ انت۔ 

اے وڑ ءَ باتیل ءِ کوہ ءِ تہا چہ آچار قدیمہ ءِ ھم ھلاسی بوتگ پرتگالی آں چہ رند مارا گوادر ءِ تہا اومان ءِ شہر مسقط ءَ چہ آؤد ئے حاکم ءِ برات واجہ سعید ءِ آیگ ءِ حال رسیتکہ آتکگ ءُُ ھمدا بلوچانی کر ءَ میار بوتگ گڑا قلات ءِ خان ءَ آ ئی ءَ را گوادر ءَ لوگ ءُ جاگہ داتگ ءُ ھمے گوشتگ یے ہ تو چوش کہ وت حاکمیں مردمے پمیشکا ما ترا در ءِ دپ ءَ دارگ ءُ چنڈے نان دیگ پہ وتارا ءُ پہ ترا عیب لیک انت پمیشکا ما لوٹ انت کہ تو گوادر ءَ برو بہ نند ءُ آؤدا کہ ھمنچو ٹیکس ءُ کاروبار بیت آزر تئیگ انت ما آئیا ں لوٹوک نہ انت اے گپ ءَ رند واجہ سعید گوادر ءَ اتکگ ءُ جہمنند بوتگ بلے اے گپ ءِ زانگ ھم المی انت کہ واجہ سعید چہ مسقط ءَ آواران ءَ اتکگ ءُ یک مزنیں وھدے آ آواران ءِ دمگ ءَ یک قلات یے ءَ بوتگ آ ئی ءَ رند آ قلات ءَ شتگ ءُ پدا 

گوادر ءَ  مدامی جہمنند بوتگ۔

وھد ءِ گوازی ءَ گوں واجہ سعید گوادر ءَ بن بیھ کنت ءُ رند ءَ گوادر ءَ مسقط ءَ گوں رو ءُ آ کنت۔بلے رند ءَ 1947کہ پاکستان

 جوڑ بیت گڑا ناسرپد یں مردم گوادر ءَ بلوچستان ءِ بہر لیکگ وتی جاہ ءَ ایشی ءَ اومان ءِ بہر گوشگ ءَ لگ انت ءُ پدا ادئے مہلوک ھم بر صغیر ءِ سیاست ءُ چست ایراں چہ سک باز دلپروش بنت ھمے سوب  انت گوادر ءِ جہمنند ھم مسقط ءَ گوں مزنیں حب ءُ واھگ یے ھم دار انت۔گواد رءِ شہر ءِ تہا پرتگالی آنی سنگر ءِ دیم پہ دیم ءَ کمے دوری ءِ سرءَ مسقط ءِ واجہ سعید ءِ سنگر ھم دست کپیت کہ آؤدئے مردم ھمے سنگر ءَ ھم قلات گوشنت۔ اے سنگر چو گرد گرد ءَ جوڑ انت۔ مزنیں ھشت ءُ ڈوکاں گوں بستگ بلے موش ھم داتگ اش بلے پرتگالی آنی سنگر ایوکا گوں سنگاں بندن بوتگ آئی ءَ ھچ موش نیست بلے پرتگالی آنی سنگر سک برز انت پدانک جوڑانت ءُ  تبک تبک انت ھرچ تبک دار ءَ گوں جوڑ انت۔واجہ سعید ءِ سنگر ءِ تہا ءُ ڈن ءَ ٹوپ ھم ایر انت ءُ پرتگالی آنی ٹوپ ھم است انت۔

گواد رءِ کوھنیں شہر کہ شاھی بازار گوشگ بیت انت آؤدئے دکان ءُ گس گوھنیں راہ بنداں گوں جوڑ انت گیشتریں گس دو تبکی انت دار ءِ کارمرزی سک باز انت پلر ءِ جاہ ءَ زنڈیں ءُ مہکمیں دار دیگ بوتگ انت۔ پہ گوات ءَ دریگ جوڑ انت بلے برز ءِ اوتاق ءِ دیما Coridorھم دیگ بوتگ انت کہ دار انچوش جوڑ دیگ انت کہ چاروک ءَ سک دوست بنت۔

گوادر ءِ بازار ءِ تہا گس ءُ دکانانی جوڑ بوھگ ءِ وڑ ءُ بیم بیلہ شہر ءِ وڑ ءَ انت بیلہ شہر ءِ تہا ھم گس ھمے وڑ جوڑ انت بیلہ ءِ شہر ءِ تہا بکال سک باز انت ءُ گوادر ءِ کوھنیں شہر ءِ تہا خوجہ ھم جہمنند انت ءُ اے دوئیں شہرانی طرز تعمیر گوں گجرات ءِ طرز تعمیر ءَ گوں سیادی  کنت۔ایشی ءِ سوب بلوچستان ءِ گوں گجرات ءَ تجارتی رو ءُ آ انت کہ چہ ایشی ءَ بدلی اتکگ۔

گوادر ءِ حاصیں چیز ماہیگ ءُُ حلوہ انت کہ نوکیں مردم پہ ھمیشاں سک ھدوک انت۔جہمنند یں مردم ماھو ر گوپگ،ماہیگ گرگ،میل ءُ یکدار جوڑ کنگ،حلوہ ءُ دگہ وش تام جوڑ کنگ ءِ کاراں گلائش انت۔گوادر شہر ءِ وتی یک مزاج یے جوڑ انت، وش تبیں مردم انت،21می کرن ءِ گوادر ءِ رنگ ھما انت کہ 15می صدی ءَ وبتگ۔بلے جست ھمیش انت کہ گوادر گوں مزنیں جیڑہاں چتور وتارا رکینیت۔گوادر ءِ تیاب دو بہر انت دیمی زر ءُُ پدی زر انت دیمی زر ءَ بندن portجوڑ بوتگ ءُ ریلوے لائن روگ ءَ انت ءُُ پدی زر ءَ گوادر میرین ڈرائیور ءِ نام ءَ یک مزنیں دگ چہ کوھنیں گورنر ہاؤس ءَ پیداک انت کوہ باتیل ءِ نیمگ ءَ اے دگ کوھنیں دگ ءِ سرا جوڑ بوھگ ءَ انت بلکیں ایشی ءَ پہ تیاب ءِ دپ گچین کنگ بوتگ۔اے دگ ءِ جوڑ بوھگ ءَ چہ تیاب تنک انت گرماگ ءَ تیاب ءَ پہ ساہ زورگ ءَ ھم جاہ نیست چول ھمے دگ ءَ سر کپ انت ءُ دومی نیمگ ءَ صداں سالاں چہ ماہیگر نوں چہ ھمے ماہیگ گرگ ءَ ھم زبہر بنت پرچاکہ دگ ءِ آیگ ءَ رند آ وتی یکداراں ھچ جاہ داشت نہ کن انت پرچاکہ تیاب ءَ دگ انت ءُ آپ ءِ تہا اوشتاتگیں یکدارانی پرشت پروش ءِ ھم تر است انت ماہیگرانی جاک ءُ سلوات ءَ رند سرکار ءَ یک جیٹی یے ھم جوڑ کرتگ بلے گوادر ءِ کوھنیں ماہیگر احمد ندیم گوشیت کہ اے مئے درد ءَ نوارت پرچا کہ اے جیٹی ءُ دگ ءِ سوب ءَ چہ ایوکا مئے ماہیگری اثر مند بیت انت بلکیں Enveisnmentءَ ھم مزنیں تاوانے رسیت۔ ریڈیو ایف ایم ءِ پریزنٹررحمن مراد گوشیت کہ پولکار ءُُ نوشتکار مارٹن وھدے گوادر ءَ اتکگ ات گڑا آئیءَ گوادر ماسٹر پلان ءِ سرا دست ایر کرت ءُ  پیسرین ڈرائیو ءِ درگت ءَ گوشت کہ”اے دگ چو سیاہ مارئیگ ءَ گوادر ءَ وارت“دگہ اہم گپ ایش انت کہ میسرین ڈرائیو گوادر ءِ Bast Buildingءِ صغت ءَ ھم ھلاس کنت پرچا کہ میل ءَ یکدار جوڑ کنگ ءِ صغت ھم ھمے دگ ءِ ھرجان بوت کنت اوستہ کارانی دار تراشی ءِ بنجل ھم ھلاس بنت کہ آ باتیل کوہ ءِ دپ ءَ انت۔ 

اگاں ھمے دگ ءِ سرا فکر جیڑگ بہ بیت گڑا اے پہ ھندی مہلوک ءَ جوان ھم بوتگ ات۔ بلے دومی نیمگ ءَ گندگ بیت کہ اے دگ ماہیگر،لانچ ءِ صغت، دار تراشی ءِ بنجل ءُ دگہ جاہاں ھوار ما حولیات ءَ ھم نقص دیگ ءَ انت گڑا الم ءَ مردم ھمے گوشنت کہ مارا نہ لوٹیت۔

گوادر ءِ شہر ءِ تہا ھچ بدلی نہ آتکگ ھما دگ ءُ راہ انت ھما گس انت ھما ملا بند انت ءُ ھما کوھنیں مانش ءِ ادیر ہ انت۔ بلے گوادر ءَ چہ ڈن بزاں فشریز ءِ کارگس ءُ ہاسٹل ءَ چہ ھما دیم شہر وداتگ نوکیں گس جوڑ بوتگ،نوکیں مردم اتکگ انت،کیچ،پنجگور ءُ دگہ دمگانی بلوچ رسنت۔بلے نوں بژنی گپ ایش انت کہ گوادر چین ءِ دست ء۔ دیگ بوتگ ءُ چین مزدور ھم چہ وتی ملک ءَ کار ایت۔ چین ھما مردماں ادا کار ایت کہ آچین ءِ تہا بندیگ (بزاں مجرم قیدی انت)انت۔اے قیدی آنی کساس 60لک انت لہتے گوشیت کہ چی دو کروڑ پوریا گرچہ وتی ملک ءَ بلوچستان ءَ کار ایت،اے گپ پہ بلوچستان ءِ مہلوک ءَ دلپدریں ھال انت،اے جیڑہانی پسو ءَ سیاسی مردم دات کن انت۔ گوادر ءِ تہا دیمروئی ءَ گیش ہاؤسنگ پروجیکٹ گیشتر گندگ ءَ کئیت۔ادا چہ زانگ بیت کہ پاکستان ء، یک مزنیں بہرے گوادر ءَ آیگ ءَ پہ دلمانگ انت۔

گوادر مدام سیاسی،ادبی ءُ علمی چست ایرانی بنجل بوتگ۔سید ظہور شاہ ہاشمی ءَ بگر داں رحمن مراد،کے بی فراق، اے آر داد ءُ دگہ ہزاراں مردم گوادر ءَ ودی بوتگ کہ اے ھما مردم انت کہ وھد ءِ ترند ءُ تیلانک ءَ ھم چوش مات کوہ ءَ مک انت۔ کامریڈ قیوم ءِ نام ءَ اگاں قلم مہ لیک ایت گڑا اے گوں نوشتہ کنگ ءَ ظلم یے بیت انت۔گوادر مردم خیر بوتگ گوادرءَ مدام جیڑ اتگ،گوادر ءِ مجگ علم انت،زانت۔ گوادر ءِ تیاب ءُ پچیں پٹ ءِ رنگ ءَ گوادر ءِ مردمانی ھیال ھم انچوش جہلانک انت من اگاں شاعرے بوتگ اتاں گڑا الم ءَ گوادر ءِ توسیف ءَ شعرے نوشتہ کرتگ ات بلے قلم ءِ وتی نگیگی  انت قلم ءِ تب ءَ سرپد بوھگ گرانی انت قلم ایوکا لبز درشان ایت۔

گوادر ءِ کش ءُ کرا ھم گوادر ءِ رنگ ءَ انت گوادر ءِ باتیل کوہ اگاں مزنیں گوست ءُ است یے دارایت گڑا باتیل ءِ دیم پہ دیم ء۔ میدی ءِ کوہ ھم گوں چاروک ءَ ھم لسان بیت۔کش گور ءِ دَمگ وشیں ڈور، سوریں ڈور،شمبے سماعیل ءُ پدا میدی ءِ گوریچان ءَ ڈگارو،زیارت،مچی، نگور ءُ رودر آتکی نیمگا سر ءِ بندن مزنیں کسہ دار انت۔ گوادر ءِ تہا استیں گوست ءِ کسہ ءُ پدا نام وتی پشدر ءَ تاریخی سیادی آں درشان کن انت، نام کہ رد وانگ بہ بنت گڑا معنی ھم رد بنت انچوش کہ گوادر Gwaderاگاں Gawaderوانگ بہ بیت،باتیل اگاں باطل وانگ بہ بیت گڑا چے پشت کپیت رد وانگ ءَ چہ اے گڑا بلوچ ءِ ڈگار ءِ سرا  پشت نہ کپ انت یک دگہ رد وانگ ءُ رد سرپد بوھگ یے میدی ءِ کوہ ءِ درگت ءَ ھم است انت میدی ءِ کوہ ءَ کوہ مہدی وان انت کہ اے چہ بن ءَ رد انت میدی دگرے ءُ مہدی دگرے۔

اے زانگ المی انت کہ میدی یک تہذیب یے بوتگ انچوش کہ میٹریاز Mediasءِ دور ءُ باریگاں مروچیگیں عراق،ترکی،ایران ءِ اَدا داں میو یاز ءِ سلطنت بوتگ ءُ ایشی ءِ اثرات مئے دَمگ ءَ ھم رستگ انت ءُ دومی میدی وت یک کسب ءُ کارے ھم است انت ھما مہلوک کہ ماہیگری یا تیاب ءُ زِر ءَ گوں سیالی دارایت آ ھم مید گوشگ بوتگ ءُ ایشی ءِ گواھی ءَ سکندر اعظم ءِ تاریخی لکھوک Aryansوت ھم دنت آ وتی کتان Alexander the greetءِ تہا ھم بلوچسان ءِ تیاب دپ ءَ میٹریاز آنی ذکر ءَ کنت ءُ پدا اے کوہ کہ میدی نام ءَ انت ایشی ءِ سر اPre Historyما قبل تاریخی دمب ھم گندگ بوتگ۔ اے کوہ ءَ گوں عربانی امام مہدی ؒ ءَ گوں ھوار کنگ سک نا انصافی ءُُ ناسرپدی یے،لکھ وڑ اگاں شر کنگ ءُ گیشینگ بہ بنت گڑا جنجال ھم کم بنت۔میدی ءِ کوہ ءِ سرا ذکری بلوچانی زیارت جاہے ھم است انت کہ پنچ شمبے ءُ آدینگ ءِ روچاں مردم ھمدا رونت زیات،ذکر ءُ ترءُ تاب کن انت۔

میدی ءِ کوہ ءِ چپی نیمگا سر ءِ بندن انت بلے ھمے نیمگا میدی ءِ بن ءَ یک کورے ھم است انت کہ آئی ءَ را جہ منندی مہلوک شد ات ءِ کوگوشنت۔اے کور چہ دڑامب ءَ وسطہ مکران کوہ ءِ سلسلہءِ کوہاں چہ کئیت ھمے جاہ ءَ میدی ءِ بن ءَ تیاب ءَ ایر رچیت کوہ ءِ بن ءَ ءُ شد ات ءِ کورءِ کش ءَ یک زیارت جاہے است کہ ادا ھم ذکری ءُ دگہ بلوچ پہ زیارت ءَ کاینت اے گوں وت ناہ کار انت مردمانی مزنیں ٹولی کیت ھمدا ذکر ءُ زیارت کن انت۔ ناہ وت ما وت بہر کن انت ءُ پدا رونت بلے روگ ءِ وھد ءَ اے مردم لہتے ناہ زورانت ءُ راہ ءَ روگ ءِ وھد ءَ اے دیم ءُ آدیم دور دینت آیانی ھیال انت کہ ادا جن ءُ دگہ مہلوک باز انت ءُ آھم لوٹول انت اے ناہ ھماہانی ھم بہر انت۔ 

مور ءُ مدگ ھم چن انت ءُ ور انت ھمے کور ءِ چپی نیمگا لہتے چات ھم است انت ءُ ڈگار ھم گندگ بنت،ھر سال ناہ ءِ ھیرات بوتگ۔چو ری نامیں جاگہ کہ مروچاں سربندن ءِ اسٹاف انت 1980ءَ داں تیاب ءِ آپ بوتگ۔سرءِ شہر ءِ تہا سر ءِ کوہ ھم است انت کہ ایشی ءِ کش ءَ ھم سر ءِ پیر ءِ نام ءِ سر ءَ یک زیارت یے است انت ادا مردم وتی چکاں سرساہ ءَ کارنت۔ سرساھگ ءَ رند ھمدا ھیرات کن انت دعا ءُ ذکر کن انت۔کہدہ حمید عصا گوشیت کہ سر ءِ انوگیں آبادی کساس 30ہزار انت،یونین کونسل سربند ءُ گراب ھوار انت۔1992پیشکان ءُ سربند یک یونین کونسل یے بوتگ۔1992ءَ رند سُر ءُ پیشکان الگ الگ یونین کونسل جوڑ بوت انت۔گوادر میونسپل کمیٹی ءُُ پسنی ماورماڑہ،جیونی ٹاؤن کمیٹی بوتگ انت۔2013ءَ سردو،سربندن ءَ گراب یونین کونسل بوتگ انت۔2005ءَ سُنٹ سر ھوار بوتگ۔

گوادر ءَ زیارت،درگاہ،ٹھکانہ ءُ دگہ جاہ سک باز انت انچوش کہ میدی ءِ کوہ ءِ سرءَ امام مہدی ؒ ءِ ٹھکانہ نامدار انت ھمے وڑ میدی ءِ چپی نیمگا شد ات کور ء، کش ءَ زیارت ءُ ہدا گوادر ءِ باتیل ءِ کوہ ءِ دیما شہر ءِ کش ہدی زر ءَ واجہ سید حسن ءِ ٹھکانہ کوہ ءِ تہا انت کہ یک مزنیں غارے کوہ ءِ تہا روگ ءَ انت کہ سیاہ ءُ تہار انت۔سید حسن ءِ منجار الہٰی بخش ءَ گوشت کہ واجہ سید حسن ءِ وتی ادیرہ کراچی ءَ انت ءُ ادا اے کوہ ءِ بن ءَ آئی ءِ ھمے ٹھکانہ بزاں نند جاہ انت ءُ یک زالبول یے چہ مسقط ءَ کئیت انت کہ آئی ءِ نام حیرک انت آسید حسن ءِ منجار انت۔سید حسن ءِ ٹھکانہ ءِ دیم ءَ جہلی نیمگا یک دگہ ٹھکانہ یے حضرت غوث اعظم ءِ نام ءَ انت الہٰی بخش اھل ءَ ھمیش یے منجار انت ءُ گوشیت کہ ادا شیخ عبدالقادر جہلانی اتکگ۔بلے ھمے جاہ ءَ کہ اے دو نندجاہ انت (سید حسین ءُُ غوث اعظم)ادا غار سک باز انت مہلوک گوشیت کہ ادا ھفت غار انت کہ کس نہ زانت کہ اے کجا در کپ انت،ایشاں چہ سما کپیت کہ گوادر سربندن ءُ ایشانی کش گور ءِ مردمانی نہ ایوکا تجارتی رو ءُ آ بوتگ انت بلکیں ادئے مردم دیر ءُ  دراجیں ملکاں ھم شتگ انت ءُ ھما ملکانی مٹ ھمے دمگاں ھم اتکگ انت،انچوش کہ مئی،جون ءُ جولائی ءِ ماہاں چہ سربند گوادر ءُ ایشی ءُ کش گور ءَ چہ مہلوک کیچ شتگ انت کیچ ءَ آمین بوتگ اے مردماں چے وتی تیاب دپ ءَ ماہیگ،سوریں ماہیگءُ دگہ چیز برتگ انت ءُ آھودا چہ ناہ زرتگ ءُُ آتکگ انت اے مردماں کیچ دمگاں گران جتگ داں سئے ماہاں نشتگ انت بلے حنیف راز کہ سر ءِ ورناہیں شاعرے آ گوشیت کہ اے ربیت نوں پرشتگ مردمانی ھما دود نوں کٹ اتگ انت۔مہلوک چہ وت ءَ گیش نہ انت چہ وتی شہراں کم در کپ انت ڈگار ارزش داریت،ڈگار بہ بیت یاتیاب، کور بہ بنت یا کوہانی دمگ، ھرچ دمگ ءِ مہلوک وتی وتی تب یے دارایت ءُُ ھمے تب ءِ پشت ءَ آشاعری کنت، کسہ کار ایت وتی چاگرد ءِ شری ءُ  ھرابی ءِ قانوداں جوڑ کنت ءُ پدا دودانی یک سلسلہ یے بندات بیت انت۔معاشی ءُ چاگردی درگت ءَ دوئیں مردم چہ یک دگر ءَ بستگ بوتگ انت۔ 

انچوش کہ کیچ ءُُ نگور یا دشت ءِ مردمے کہ گوادر ءُ سُر ءَ کہ اتکگ گڑا آئی ءِ لوٹ چہ تیاب دپ ءِ لوٹ ءَ دگہ بوتگ انت ءُ ھمے وڑ ء۔ تیاب دپ ءِ مردم ءِ ھم وتی لوٹ ءُ  گذران بوتگ،گوادر آکبت ءَ کجا رؤت ایشی ءِ درگت ءَ گپ بوت نہ کنت بلے اے گوشگ المی انت کہ ھما گوادر یا سربندن کہ صداسالاں آئیاں یک کلچرے رودینتگ آنوں کجا دیم کنگ ءَ انت۔ اگاں 60لکھ چینی بیت یا دوکروڈ دگہ مہلوک بیت گڑا گوادر کجا پاداں داریت۔بلے راستی ھمیش انت کہ گوادر ءِ ھرچ دور ءُ زمانگ ءَ ارزش بوتگ گوادر ءِ مدام تجارتی،سیاسی ءُُ عسکری ارزش مردم ءُ حاکماں مار اتگ ھمے سوب انت کہ پرتگالی،عرب ءُ دگہ کاینت بلے لس ادا پاداں داشت نہ کنت آیانی پاد ءِ نہ دارگ ءِ ھال ءَ کس ایمن نہ بیت انت پرچاکہ آدور دگہ بوتگ انت ءُ مروچی دور دگرے دور ءُ باریگ نہ اوشت انت نہ وفا کن انت۔مروچی دنیا نز آتکگ اے نز آیگ ءِ پشت ءَ Communaetionءِ نوکیں نظام انت ٹیکنا لوجی ءِ نوکیں پٹ پول انت اگاں گوادر لوٹ ایت کہ گوادر بہ مانیت گڑا الم ءَ گوادر ءَ یک رندے پدا Brain Stormingکنگی انت ورنا ءُ زالبولاں وتی کرد دیما برگی انت اے کرد چہ کریمکءِ ھوٹل ءَ نندگ ءُ ھدا بخش ءِ حلواہانی ورگ ءَ دیما نہ ئیت اے کرد چہ جیڑگ ءُ عمل ءَ دیما کئیت،کار ءُ کسب، وانگ ءُ زانگ ھما راہ انت کہ ترا گاری ءَ نئیل انت۔

بلوچی زبان ءِ سرا اے آر داد ءُ پھلان یک کردئے واجہ انت بلے ھرچ مرگ پہ بال وت انت ناھر کھرانی  ءِ چاگردی جہداں ھم کس ذال چار کرت نہ کنت ریڈیو ایف ایم ءَ وھدے من نومبر 2016ءَ مہمان بوتاں گڑا من رھمن مراد ءِ جستاں چہ مار ات کہ گوادر جیڑگ ءَ انت۔ 

بلے گوادر ءَ میسرین ڈرائیو ءِ رنگ ءَ چو سیاہ مار ءَ پیچان اے دگ ءَ اگاں کس یے داشت کنت گڑا آورنا انت ورنا باندات انت ءُُ اے ھما باندات انت کہ اے ھم نوکیں دنیا ءَ را سرپد کنت کہ میدی کئے انت ءُ مہدی ؒ کئے انت باتیل ءُُ باطل چی انت اگاں گوادر ءِ تنک ءُ تہاریں بازار ءِ تہا یک کارگس یے دیما بلوچی زبان ءَ بورڈ ے نوشتہ انت گڑا الم ءَ زانگ بیت کہ گلزار گچکی ءِ وڑیں زانتکار ءُُ بجار گوڑھی ءِ وڑیں دیر چار است انت۔گوادر ءِ کرد ستاہ کرز ایت کہ آنوشکی ءِ عبداللہ جان جمالدینی ءَ یات کنت ءُ بلوچاں چہ چاریں کنڈاں جم کنت، اے عمل آئیءِ جیڑگ ءُ آکبت ءَ ھمے رنگ ءَ زندگ بوھگ ءِ جہد انت۔گوادر الم ءَ مانیت بلے المی ایش انت کہ بلوچ دنیا ءَ ھرچ کجا انت آ گوادر ءَ وتی گس ءُ نندجاہ سرپد بیت گوادر ءِ است ءَ وتی وجود ءِ راستی بزانت،گوادر ءِ مہلوک مروچی سرپد انت بلے کراچی ھم آئیءِ دیما مزنیں درورے کہ آشہر مروچی کجا سر انت کراچی ءِ تولگی لین مروچی تغلق لین جوڑ بوتگ گڑا میدی ءِ کوہ چون مہدی ءِ کوہ جوڑ نہ بیت بلے بلوچ ءَ پہ المی انت کہ آ وتی نشات ثانیہ Renasenceءِ دور ءَ بندات بہ کنت نشات ثانیہ اے راج چہ تہاری ءِ شپاں در کرت کنت انچوش کہ یورپ ءَ جیڑ اتگ گڑا بلوچ چون جیڑ ات نہ کنت بلوچ چون ترک ءُ کرد ءِ ھمبرابری کرت نہ کنت اگاں گوست ءَ ترکی (Asiaminor)ءِ کر ءَ ٹرائے ءِ وڑیں ویل بوتگ انت گڑا برج ءِ کلات ءُُ چھونا ممباسا ءَ روگ ھم بلوچ ءِ عقل ءُ زانت ءُُ بامردی ءِ درورانت۔    

***