رجانک: جلاب آسکانی
ناکو فیض محمد بلوچ ایران کسرکند ءَ واجہ شے محمد ءِ لوگ ءَ 1918ودی بوتگ۔
واجہ ءِ پت روزگار نہ بوگ ءِ سوب ءَ چہ ایران ءَ درکیت مند ءِ سیم سر ءُ مشرکی بلوچستان ءَ کیت ءُ جاہ منند بیت
داں دَہ 10 سال ءَ واجہ مکران ءِ ھند ءُ دمگ جیونی ، گوادر ، مند ءُ تمپ ءَ گوازین اِیت۔
ھمے وھد ءَ فیض محمد وتی گوھار مریم کہ اُمرئِے چہ پیز مھمد ءَ مستر بیت ھمیشی لوگ ءَ لیاری روت ءُ نیند اِیت
فیض محمد سَے برات ءُ گوھارے بنت محمد حسن، محمد حسین ءُ دوشنبے
مات ءِ نام زَر بیبی بوتگ ءُ سیادی ئِے گوں ایران ءَ بوتگ۔
فیض محمد ءِ مستریں برات محمد حسن ھانی ءُ شے مرید ءِ داستان ءَ وتی توار
ءِ گوما گوش اِیت بلے آ توار ءَ کہ فیض محمد گوں تنبورگ ءَ کشّ ایت ءُ گوش
اِیت برات ئِے کشّ اِت ءُ گوشت نہ کنت۔
بلے چش کہ نیزگاری ءِ سوب ءَ واجہ تمبورگ ءَ یلہ کنت ءُ مزوری ءَ لگّ اِیت۔
فیض محمد گوں برات ءَ کیماڑی ءَ مزوری کنگ ءَ ساڑی بیت۔
بلے ھمیں مزوری ءِ وھد ءَ واجہ فیض محمد گزل ءُ لچہ گوش اِیت ءُ مزّوراں واجہ ءِ توار سک وش بیت ءُ گوشدار اَنت ئِے
واجہ ءَ بلوچی ءُ پارسی ءِ تہ ءَ زھیرونک ءِ ساز گوں دل ءِ تاراں سورینتگ اَنت۔
ھمے شوک ءَ واجہ فیض محمد یک مزنیں نامے بکشات۔
واجہ فیض محمد ءَ گوں تمبورگ ءَ وت ءَ چاگرد ءِ تہ ءَ منّارینت کہ آ مزنیں گوشندھے۔
ءُ روچ مروچی ھم واجہ ءِ زھیرونک ھست اَنت ءُ گوشدارگ بنت واجہ ءَ گوں ھبّ ءُ واھگ ءَ زھیرونک ءُ تمبورگ وتی پجار جوڑ کتگ۔
یک نیمگے فیض محمد ءُ دومی نیمگ ءَ مرید بلیدی ءَ ، مست توکلی ، جام درک ،
ھانی شے مرید ، ملا پازل ، ملا کاسم ، مھناز ، گراناز، شھداد ءُ ایدگہ ءَ
لچھکارانی لچھکاری زندگ کرتگ۔
ما ھمیں سرپد بہ اِیں کہ مئے دود ءُ ربیدگ ھمیشانی سوب مرچی زندگ اَنت۔
فیض محمد بلوچ ءَ باز دری ملکاں ھم وتی اِزم پیش داشتگ ءُ منّارینتگ ءُ ھرجاگہ واجہ ءِ ازم کامیات بوتگ۔
واجہ فیض محمد ءِ باز گوشتگیں سوت آبدہ پروین ، مھمد اَلی شیکی ، سلیم
جاوید ، پروین ھانم ءُ دگہ باز ءَ ھم وتی توار ءِ گوما گوشتگ اَنت ۔
مِسر(مصر) ءِ کابل ءُ بے مٹّیں زال بول گوشندہ (اُم کلثوم ) ءِ گوما ھم واجہ ءَ شرپ رس اِتگ۔
فیض محمد ءَ پارسی ءِ لبز ءُ گال باز کامرز کتگ بلے گوشندھی نہ کتگ ئِے ۔
وھدیکہ واجہ گوں نور مھمد سارنگی نواز ءَ دوچار کپ اِیت گڑا نور مھمد واجہ ءِ توار ءَ کہ اِش کنت ءُ دادئِے دنت ۔
ھمے وھد ءَ کراچی ءَ ریڈیو پاکستان ءِ چیر دست بلوچی آڈیشن ءِ چست ءُ ایر ءَ بوگ ءَ بیت۔
گڑا سندہ ءِ سرجمیں اِزمکار ءُ پنکار اے مراگش ءَ بھر زیرگ ءَ ساڑی بنت
ءُ نور مھمد سارنگی نواز واجہ فیض محمد ءَ ھم ریڈیو اسٹیشن بارت ۔
آ وھد ءَ فیض محمد ءِ اُمر 20 سال بوتگ بزاں ورنا بوتگ۔
گیلانی ءُ زیڈ اَے بُکاری ءِ نگاہ وھدیکہ پیز مھمد ءَ کپ اَنت گڑا آ چہ نور مھمد ءَ فیض محمد ءِ بابت ءَ جست کن اَنت
ءُ نور مھمد گوش اِیت کہ آڈیشن واستا آورتگ بلے اے وھد ءَ ایشی ءِ تیاری کنگی انت۔
زیڈ اے بُکاری گند اِیت ءُ سرپد بیت کہ فیض محمد ابید تیاری کنگ ءَ جوان اِنت۔
گڑا فیض محمد ءَ ابید دگہ تیاری ءَ اسٹیج ءِ سر ءَ وش اتک کن اَنت۔
ھمے وڑ ءَ فیض محمد اولی رند ءَ اسٹیج سر ءَ زاھر بیت ءُ گوں وتی تمبورگ ءُ کشّوکیں توار ءَ مردماں وتی توار ءِ شیدا کنت۔
ھما انداز ءَ فیض محمد بندات ئِے کنت کہ چہ واجہ ءِ تمبورگ ءُ الھاناں مردم چاڑ ءُ مدھوش بنت۔
چہ ھمد ءَ فیض محمد ءِ اولی پدانک بندات بیت۔
اے گپ 1938-40 ئیگ بیت تکریبن ، داں چیزے وھد ءَ ھمے وڑ ءَ واجہ ھمد ءَ ترزنگاری ءُ گوشندھی سر ءَ کار کنت
باز مھپل ءُ دیوانانی براہ جوڑ بیت۔
چہ ریڈیو پاکستان کراچی ءِ نیمگ ءَ فیض محمد بلوچ ءَ 80 کلدار ماھے پگار رس اِیت۔
وھدیکہ پاکستان کوئٹہ شال ءِ تہ ءَ وتی ریڈیو اسٹیشن ءَ جوڑ کنت گڑا واجہ
بلوچستان ءِ سرڈگار ءِ نیمگ ءَ وتی منّارینگ ءِ واستا دیم پہ شال ءَ روت ،
چہ ھمد ءَ ترزنگاری ءُ گوشندھی ءِ سر ءَ نوکری کنت۔
اد ءَ واجہ ءِ پگار ودّ اِیت ءُ ماھے 225 کلدار کنگ بیت ۔
وھدیکہ شال ءَ جھمند بیت گڑا وتی مستریں چک ھیر مھمد ءَ شال ءَ کار اِیت ، بندات ءَ کواری روڈ ، پد
ءَ شیک اُمر روڈ ءُ رند ءَ منوجان روڈ ءَ مدیمی واستا لوگ بند اِیت۔ ،
ھرچ ءُ درچ ئِے گیش بنت ءُ نہ رسگ ءِ سوب ءَ چک ئِے ھم کار کنگ ءَ بندات کنت ۔
ایشی ءَ ھم زوت ریڈیو پاکستان ءِ واستا نوکری رس اِیت ۔
ھمے وڑ ءَ اشانی گزران کمو شرتر بیت۔
آئی ءِ دگہ چکے چشکہ ترزنگاری ءِ پڑ ءَ مزنیں نامے ھست ئِے تاج مھمد تاجل کراچی ءِ تہ ءَ وتی مات ءِ گوما جھمند بوتگ اَت۔
ھمود ءَ یک بیکری ءَ نوکری کنگ ءَ اَت ، وھدیکہ پت ءَ شال ءَ لوگ بست گڑا آئی ءَ ھم وتی مات زرت ءُ شال ءَ اتک۔
فیض محمد بلوچ ءَ وتی چک تاج محمد ءِ بینجو دربرائینگ وتی زمہ ءَ زرت۔
تاج محمد تاجل ءَ وھدیکہ ریڈیو پاکستان کوئٹہ اسٹیشن ءِ سر ءَ زھگانی
مراگش ءَ بھر زیرگ ءِ موہ رس اِت گڑا آئی ءَ اے مراگش ءَ شری سر ءَ نپ چست
کنگ ءِ جھد کت ءُ وتی اولی مراگش ءَ وت ءَ سوب مندئِے نزیک ءَ رسینت ءُ
مردمانی دل ءَ کدوئِے بست ۔
تاج محمد تاجل گوش اِیت کہ ، فیض محمد بلوچ
کراچی ریڈیو ءَ کار کنگ ءَ رند حاجی ولی محمد پریس ءِ دکان ءَ کار کتگ ،
آئی ءِ دوزواہ سید ظہور شاہ ھاشمی آئی ءِ ھمراہ بوتگ دوئیناں شور کتگ کہ فیض محمد بلوچ ءِ سوتاں ریکارڈ بہ کن اِیں
گڑا گوں مکامی کمپنی ءِ
واھند ءَ دزبندی کن اَنت بلے آ اول سر ءَ رازیگ نہ بیت وھدیکہ 500 کلدار
سوب مندی ءِ زمانت ءَ ایڈوانس ئِے دے اَنت گڑا آ رازیگ بیت ۔
فیض محمد بلوچ وتی گروپ ءِ ھمراھی ءَ سوتاں ریکارڈنگ کنائین اِیت۔
اے سوتانی تہ ءَ مشکت ءِ مھرک ، پٹانی دل پہ ، سک ٹاپ بنت ءُ نام ئِے دیم ءَ آرگ ءِ سوب جوڑ بنت ۔
بزاں فیض محمد ءِ مشھوری ءِ اولی سوب مندی ھمد ءَ بندات بیت۔
اولی کامیاتی ءَ رند کمپنی ءِ ھدابند وت دومی ریکارڈنگ ءِ واستا دزبند کنت گڑا آئی ءِ دزبندی ءَ پد فیض محمد دومی ریکارڈنگ ءَ کنت ۔
چہ بلوچی گوشندھانی رد ءَ فیض محمد ءِ مزنیں نامے ، آئی ءِ ترزنگاری ءِ دروشم بے مٹ ءُ بے دَرور بوتگ
آئی ءِ ترزنگاری ءُ سازچینی ءَ تمبورگ داں گڈی سیم سراں سر کتگ۔
زھیرونک فیض محمد ءِ پجّار جوڑ بوتگ ، اِشکیہ ءُ رزمیہ ءِ لچھکاری ءِ داستان زھیرونک ءِ رنگ ئِے داتگ ءُ گوشتگ اَنت ئِے ۔ ’’
تاسکین بچانی مرگ گران اِنت‘‘
اِے سوت جت ئِے ءُ وتی جاگہ ئِے بنائینت ۔
کراچی یونیورسٹی ءِ پروپیسر رمضان بامری فیض محمد ءِ راجی ءُ کومی ھدمت ءِ سر ءَ گوش اِیت
کہ چہ بلوچستان ءِ ھکومت ءِ نیمگ واجہ فیض محمد ءِ درگت ءَ مراگش ھجبر
برجم دارگ نہ بوتگ ، البتہ ایرانی ھکومت ءَ فیض محمد بلوچی ھدمات یات کتگ
اَنت ءُ دو ھاسیں مراگش ئِے اِیر کتگ۔
اے مراگش ایران ءِ شھر ایران شاہ ، چھبار ءُ راسک ءَ برجم دارگ بوتگ اَنت۔
اے بھر ءِ تہ ءَ نور مھمد نورل ، استاد ستار بلوچ ءُ عزیز بلوچ ءَ را ایران ءَ وش اتک گوشتگ اَت اَنت
ایشانی ویزّا ھم اتگ اَت اَنت بلے سیمینار ءِ تہ ءَ شریداری نہ کت اِش ۔
واجہ عبداللہ بلوچ ادارہ صقافت ءِ ڈاریکٹر وھد پہ وھد بلوچستان ءِ بلوچی
ءُ براھوی گوشندھاناں شال ءَ لوٹائینتگ ءُ وڑ وڑیں مراگش برجم داشتگ۔
آ
گوش اِیت کہ ناکو فیض محمد بلوچ ءَ ءُ مرید بلیدی ءَ بلوچ ءِ سکاپت دود
ءُ ربیدگ زندگ ءُ رژناہ کتگ اَنت ءُ باز بژن ءِ ھمراھی ءَ گوش اِیت کہ ما
اے گوشندھانی پجّار نوکیں پدریچ ءَ نہ کنائینتگ۔
ءُ ناں مراگشی رنگ ءَ مراگش ءُ سینمار برجم داشتگ ‘‘
ریڈیو اسٹیشن ءِ ڈائریکٹر بشیر بلوچ ءَ وت فیض محمد ءِ گوشتگیں سوت ءُ
داستانانی ریکارڈنگ یکجاہ کتگ اَنت انگت ریڈیو اسٹیشن ءِ تہ ءَ ھست اَنت۔
بلے اسلام آباد لوک ورثہ ءِ تہ ءَ آئی ءِ چہ داستاناں ھچ مجموئہ نیست چشکہ بژنے زانگ بیت
نور محمد نورل ، عزیز بلوچ ، محمد شفیع بلوچ ، ستار بلوچ ، جاڑُک ریکی ، سبزل سامگی
نور خان بزنجو ، عارف بلوچ ، رمضان زیدی ، رمضان ٹاپی ، مراد پارکوھی ، اختر چِنال ، رحیم بلوچ
رحیم بخش ناز ، بشیر بلوچ ءُ بلوچستان ءِ دگہ گوشندھانی گوشندھی ءَ کَے سرپد نہ اِنت۔
چہ فیض محمد بلوچ درگت ءَ وھدیکہ نور محمد نورل گوں تران بوت گڑا واجہ ءَ
درائینت ، کہ فیض محمد مئے استادانی رِد ءَ ھوار اِنت ءُ یک مزنیں استادے
بوتگ من چہ واجہ ءَ باز در برتگ ۔
وھدیکہ من اول سر ءَ شال ءَ اتکگ آں
گڑا واجہ ءَ وتی لوگ ءَ من ءَ برتگ ءُ آ وھد ءَ گیشتریں گوشندہ ءُ مھمان
ناکو فیض محمد ءِ گور ءَ اتکگ اَنت۔
ناکو فیض محمد یک پھکدل ءُ وش روئیں انسانے بوتگ۔
یکے اگاں گوں وتی اِزم ءَ مھر بہ کنت آئی ءَ ھرکس ءَ گوں مھر بیت۔
آئی ءَ گوں ساز ءُ زیمل ءُ ترزنگاری ءَ سک مھر بوتگ ءُ سکیں ساپدلیں مردمے بوتگ۔
آئی ءِ نیندگ پادآیگ گوں سنگتی ءَ بندوک بوتگ اَنت۔
ٹاؤن ھال کوئٹہ ءَ نیب ءِ دور ءِ تہ ءَ فیض محمد بلوچ ءِ سربراھی ءَ یک مزنیں مراگشے برجم دارگ بوتگ اَت
فیض محمد ءَ اولی بر ءَ کہ چشیں مزنیں مراگش ءَ نور محمد نورل ءِ پجّار کنائینت۔
ھمود ءَ میرگُل خان نصیر گوں دوچار کپ اِیت آئی ءَ اے گوشندہ باز دلبڈی دات ۔
فیض محمد ءَ دو سِیر کتگ ، ھیر محمد، نور محمد، تاج محمد تاجل آئی ءِ چکّ اَنت۔
تاج محمد تاجل ءُ ھیر محمد ریڈیو سٹیشن ءِ گوما بوت اَنت چونکہ نور محمد
اے روچاں کراچی نادراہ جاہ ءَ دَر ءِ نیگھبان (گیٹ کیپر) ءُ واڈ ءَ ھم کار
ءَ اِنت۔
ایشی ءَ ھم وتی پت فیض محمد ءِ رندگیری ءِ جھد کت۔
بلے لھتے سوت "لیلہ ءَ ءُ لیلہ " ایشی گوشگ ءَ ماھر اَت ءُ ایشی ءِ گوشگ ءَ گوشندھی تہ ءَ اول اَت۔ ،
اے سوت ءِ گوشگ ءَ ایشی ءَ ترزنگاری ءِ تہ ءَ دنز کت ءُ ترزنگاری ءُ گوشندھی زندگ کت۔
بلے ایشی ءِ ھاندان ءَ اِے آ نگاہ ءَ نہ چار اِت ، ھاندان ءِ گیشتریں مردم کسمپرسی ءِ زند گوازینگ ءَ اَنت ۔
تاج محمد ءَ را ریڈیو پاکستان ءِ تہ ءَ نوکری واستا داشتگ اَت اِش بلے 2014 آ زبردستی چہ ریڈیو ءَ در کنگ بوت ۔
مئے نوکیں پدّریچ مئے اے مزنیں ازمکار ءُ گوشندھاں نہ زان اَنت ءُ سرپد ھم نہ اَنت۔
ھماھاں کہ مئے دود ءُ ربیدگ زندگ کرتگ ، زندگ ناں بلکیں سرجمیں دگنیا ءَ پجار اِش کنائینتگ۔
حکومت بلوچستان ءِ نیمگ ءَ مھپل ءُ مراگش رنگ رنگیں سمبھینگ بنت آھانی تہ ءَ ناچ ءُ سھبت بیت۔
بلے ھماھاں کہ ربیدگ گوں اِزمکاری ءَ زندگ کتگ اَنت ناں آھانی نام گرگ بیت ءُ نیکہ آھانی زند ءِ بابت ءَ چیزے دانک دیم ءَ آرگ بیت۔
داں مرچیگ ءَ آھانی ھاندان درد ءُ گمان گوں زند گوازینگ ءَ اَنت۔
ما آھانی سوتاں گوشدارین ءُ پھر کن اِیں بلے پہ آھاں ناں چیزے کن اِین ءُ ناں کنگ ءِ جھد کن اِیں۔
فیض محمد بلوچ ءِ لھتے مشھوریں سوت کہ آھاں ما مرچی ھم گوں شوک ءَ گوشدار اِیں
تئی سورت ئے زیبائی من گرپتارآں۔
رنگ ءَ مہ چار دوستی مہ کن ۔ مجنوں مہ بی دیوانگ دل۔
اَے ناز ھسنِ والا۔ دل منی برتگ لال ءَ
کُشتہ من ءَ گل ءَ ، اِے باگ ءِ بلبل ءَ ۔پاری چداں گل گوستگ۔۔۔!
مشکت ءِ مھرُک تئی مھبتاں گارآں۔۔!اولی سپ ءِ مزنیں گوشندہ ناکو فیض محمد بلوچ 6 مئی 1980 ماں شال ءَ اے کوڈھیں امروز ءَ یلہ کنت ءُ وتی مکیمی جاہ
ءَ روت۔
انا للہ وانا الیہ راجعون
آئی ءِ وش ءُ دلکشیں سوتاں مرچی ھم فیض محمد بلوچ ، ترزنگاری ءُ گوشندھی ءِ دنیا ءَ زندگ کتگ۔
ما وتی ازمکاراں باید بیھال مہ کن اِیں ءُ آھانی زند ءُ ازمکاری ءَ وتی ند ءُ کلمانی سر ءِ زیبائی بہ کن اِیں۔
وتی ازمکارانی یات کنگ ءِ شرترین رھبند ھمیش اِنت۔
دانکہ مئے ربیدگ آؤکیں پدّریچ ءِ واستا پشت بہ کپ اِیت۔
اے ھمے ند ءُ کلم اِنت کہ تئی گوستانک ءَ پھاز اِیت ءُ نوکیں پدّریچ ءَ سر کنت۔
بلوچستان ءُ بلوچی زبان زندگ بات۔
٭٭٭
سرپدی: ما اے نبشتانکءَچہ مہلب لائبریری فیس بک تاکءِ منتءَ شنگ کنگا ئیں، ادارہ
Post a Comment