گرماگی بیگاہ یے ءِ وھد اَت ، شمال ءِ گوات کشگ ءَ اَت بلے پیشی حساب ءَ نہ اَت کہ مردم یک دومی ءَ میم مہ کنت ۔
پدی زِر ءِ تیاب ءِ دپ
ءَ یکدارانی رِد زیبدار اَت۔ یک ءُ دو مید ( ماہی کُش) وتی یکدارانی تہا نشتگ ءُ
ماہو ر ساچگ ءَ مشکول اِتنت۔ بلے تیاب دپ ءَ وڑ وڑیں نیم براہنگیں زالبول،مردیں
آدم ،جنئک ءُ زہگانی سیل ءُ سواد ءَ چہ تیاب ءِ ندارگ پہک بدل بوتگ اَت۔
وتی ھیالانی زِر ءَ
بیگواہ یک ورنایے ہمے تیاب دپ ءِ اَرزُنیں ریکانی سرا نشتگ اَت ءُ زِر ءِ چولاں
سیل کنگ ءَ اَت ۔ اناگہ یک نیم براہنگیں جنئکے کہ آئی ءِ پُچّ آپ ءَ میچل اِتنت ءُ
جان ءِ بند بندے پدّر اَت آئی ءِ دیم ءَ اتک ءُ اشتات ءُ چارگ ءَ لگّ اِت ۔ جنئک
ءِ پت ءَ آئی ءَ را توار جت۔
”ارے بیٹا اس پاگل بلوچی کے پاس مت جاﺅ یہ مارے گا،یہ بلوچی پاگل ہے “
تیاب دپ ءَ ابید ئے ہمے ورناءُ یک ءُ دو میداں کہ وتی یکدارانی تہا نشتگ ءُ ماہور ساچگ ءَ اِتنت دگہ کس نیست اَت۔ دُرا درامدیں مردم اِتنت۔ بچک ءُ جنئک یک دومی ءَ گلائیش اِتنت،میار ءُ لج نیست اَت۔ درآمدیں مردمانی روچ پہ روچ ءِ گیشی ءَ چہ ہند وتی صورت ءَ مٹّ کنگ ءَ اَت۔
برے برے گمان گوستگ اَت کہ اے شمال بند ن ءِ پدی زِر نہ اِنت۔
”یہ پاگل ہے یہ بلوچی پاگل ہے۔“
یک برے پدا اے توار ءَ آورنا ءَ را گُڑینت بلے انچو گمان بوتگ اَت کہ گشئے آورنا وتی ہند ءُ زِرءِ درآمد بوہگ ءَ سک تکانسر اَت ءُ یک بے تواری یےءِ آئی تہا جاگہ کتگ اَت کہ یک مزنیں جاکے ءِ صورت ءَ ودی بوہگ ءَ مہتل اَت۔
آورنا ءَ سر چست کت ءُ ہمے جنئک ءِ نیمگ ءَ چاراِت ءُ پدا آئی ءِ پت ءِ نیمگ ءَ چارگ ءَ لگ اِت کہ آئی ءِ پِت ءُ پیرکی زمین ءِ سرانشتگ اِتنت ءُپدا آئی ءَ را بد گشُگ ءَ اِتنت۔ میرل ءَ را آئی ءِ ہبر باز توراِت ۔
”کیوں بیٹھے ہویہاں؟ چلو اٹھو شاباش بھاگو یہاں سے“
ہما جنئک ءِ پت ءَ آئی ءَ را ہکّل کت ءُ گشت بلے میرل ءَ آئی ءِ نیمگ ءَ چار اِت ءُ پدا کندگ ءَ لگ اِت ۔
”حرامی ہنستے ہوچلواٹھو ، نہیں تو ابھی فوج تمھیں ڈنڈا کریگا“
جنئک ءَ میرل ءِ کندگ ءَ چہ بد برُت ءُ چنکے ہاک زُرتے ءُ آئی ءِ سرا مانشانت ے۔ میرل سرا داں پاداں ہاک ءَ پُرّبوت بلے آئی ءَ ہچ نہ گُشت۔
” بیٹی یہ حرامی بلوچی ایسے نہیں اٹھے گا جب تک اس کو مار نہ پڑے“
پدا جنئک ءَ یک سنگے زُرت ءُ آئی ءَ را جت ۔
سنگ ءِ لگّگ ءَ گوں میرل
ءِ سر ہون ءَ پچ بوت ۔ آہژم گپت ءُپاداَتک ۔ جنئک ترس ءَ چہ تچگ ءَ لگ اِت ، میر ل
ءَ سنگے چست کت ءُ آئی ءِ پُشت ءَ تچگ بنا کت۔
٭٭٭
شمال بندن ءَ
درآمدانی آہگ ءُ جاہ منند بوہگ ءَ دگہ دروشمے آﺅرتگ اَت ۔ حمل جیئند تہنا یک کسّہ
یے جوڑ بوتگ اَت ۔ شمال بند ن آ شمال بندن نہ اَت جناح پور جوڑ اَت ۔ تیاب گیمرتگ
اَت ، شمال ءَ وتی پیسریگیں کشّگ یلہ کتگ اَت کوہ ءِ پیشانی مُجتگ اَت ۔ مغل
ءِ(ہمے کوہ ءِ بنداتی بہر) دیم ءَ نوداں نہ بستگ اَت ، گلزمین ءِ سینگ دردانی
یک امبارے جوڑ اَتءُدرابے ترک ءُ توار ملور اِتنت
شمال بندن ءِ مہلوک بے سد ءُ سما اَت ۔ بس یکیّں ھبر ءَ وش اَت کہ درآمدانی آہگ ءَ گوں مئے ملک دیمروی کنگ ءَ اِنت ۔سرکار ءَ مزنیں درمان جاہ،بحریہ وانگ جاہ ، کنٹومنٹ بورڈءُ لہتے ورناہاناں ماں نیوی ءَ شش ءُ ہشت ہزار والا پگار ءِ روزگاردات ۔
شش ءُ ہشت ہزار پگار ءِ روزگار ءِ عمل گشئے پراہاں دنیایے اَتءُ ہمیشاں چہ آ گل اِتنت کہ مئے ڈیھ دیمروی کنگ ءَ اِنت ءُ نوں کراچی ءُ اسلام آباد جوڑ بوہگ ءَ اِنت ۔
شمال بند ن ءِ مہلوک ءَ وھدے بلوچستان ءِ ایندگہ دمگانی ھال ہُش کتگ کہ فلاں دمگ ءَ مردم چست کنگ بوتگاں گار ءُ بیگواہ اَنت، جنئگ بوتگاں، لاش دور دئیگ بوتگاں ، فوجی جنئگ بوتگاں ، ہڑتال اِنت ،گڈا آہاں اللہ ءِ شکر گپتگ اَت کہ شرّیں شمال بند ن ءَ آزاد بلوچستان ءِ نعرہ ءُ کشُگ ءُ لاشانی دور دئیگ نیست اِنت ۔
تمامیں مہلوک بے سدءُ سما اَت بلے شہر ءِ تہا یکے اَست اَت کہ آئی ءَ را درآمدانی آہگ ءُ وتی ڈیھ ءِ صورت ءِ مٹّ بوہگ ءِ گم چو وروک ءَ ورگ ءَ اَت، آمیرل اَت۔
مروچی ءَ چہ 8 سال پیسر وھدے اے ورنا بی ایس او ءِ سیشن ءَ شال ءَ شُت تہ آئی ءَ سیاسی سرکلانی تہا بہر زُرت ۔ راج ءُ ڈیھ ءِ مہر ، زبان ءُ ربیدگ ءِ زندگ دارگءُ دگہ بازیں سر حالانی سرا آئی ءَ راسر پدی رست ۔ آئی ءِ دل ءِ تہا پہ وتی ماتیں گلزمین ءَ مہر ءُ محبت ءِ یک زِرے چول جنئگ ءَ لگ اِت۔
آئی ءَ مار اِت کہ ما غلامیں ءُ یک غلا میں پُسّگے ءِ کار تہنا ہمے بیت کہ پیسرا وتی ڈیھ ءَ آجو بکنت۔
وھدے آ سیشن ءَ چہ پد وتی ہند شمال بندن ءَ واتر بوت تہ آئی ءَ زوت مہلوک ءِ سر پدی ءِ کار بندات کرت ۔ ہر دیوان ءُ مجلسانی تہا وتی ڈیھ ءُ راج ءِ غلامی ءِ بابت ءَ ورناہانی ذہن سازی کت ۔
پدا میرل ءَ بازیں مردمے
تیار کت ءُ پہ وتی حقانی لوٹگ ءِ حاطر ءَ شاہدگ ءُچار راہانی سرا زہر شانی کت ءُ
روانک کشّ اِت۔
برے پہ بیگوائیں مردماں شُد کیمپے جتگ اَت ۔ وانگ جاہانی تہا بازیں نودر بر آئی ءِ نیمگ ءَ آہان بوتاں ۔
شمال بند ن ءِ تہا اے نوکیں راج دوستیں سیاست ءِ دروشم فوجی سرکار ءَ جوان لگگّ ءَ نہ اَت۔ سرکار ءَ چار اِت کہ آئی ءِ سی سالی پلاننگ چو مہ بیت کہ ہاکاں ہوار بہ بیت ۔
پلاننگ ءِ رِد ءَ آئی ءَ شمال بندن ءِ مہلوک غلام جوڑ کتگ اَت ءُ پدا میرل ءِ اے سیاسی چست ءُ ایراں سرکار پہک تکانسر کرتگ اَت۔ سر کارءِ یک مزنیں پلاننگ ے تیوگیں ”کوہ بُن“ ءِ آبادی ءَ چست کنگی اَت ءُ اود ءَ قبضہ کنگی اَت کہ شمال بندن ءِ یک میتگ ے اَت ءُ نیول بیس ءَ ڈُکّ اِتگ اَت۔ بلے میرل ءِ اے مہلوک ءِ تہا سرپدی ءِ سیاست ءَ آہاناں کمے تکانسر کرتگ اَت بلے سرکار ءَ چار اِت کہ ایشی ءَ پیش کہ مہلوک ءِ تہا گیش سرپدی بئیت ”کوہ بُن“ءِ قبضہ ءِ کارئَ پیسرا بکن۔
پدا سرکارءَ جار جت کہ ”کوہ بن ءِ درائیں مردم برو اَنت ءُ پنجگ ءَ جاہ بہ نند بباں ،درستانی لوگانی ءُ زمین ءُ ڈگارانی قیمت آہاناں دئیگ بنت۔“
اے جار ءَ چہ میرل ءَ
باز کوکار ءُ جاک کت۔ جلسہ ، ہڑتال ،روانک ءُ شدکیمپ ءُ زہرشانی کت کس ءَ آئی ءِ
گون ءَ ہمراہداری نہ کت۔
سرکارءَ تیوگیں مردماناں
زر دات ءُترسینت کہ وتی گِس ءُ جاگاہاں یلہ بکن اَنت۔ درائیں مردماں وتی دزنبشت
داتگاںءُوتی پت ءُ پیرکی جاگہ سرکارءَ را بخشتگءُ پنجگ ءَ شتگ ءُآباد بوتگاں کہ
سرکار ءِ نیمگ ءَ آہاناں ہمودا زمین دئیگ ءُ آباد کنگ بوت بلے میرل ءَ وتی گس یلہ
ندات۔
”من وتی پت ءُ پیرکی گس ءَ ہجبر یلہ ندیاں ،مرگ منا امبازیت بلے وتی زمین ءَ ندیاں۔“
یک شپے میرل ءَ را آئی ءِ گس ءَ چہ چست کنگ ءُ برگ بیت۔ آیک تیوگیں ماہے ءَ گار ءُبیگواہ بیت ءُپدا آئی ءَ را یلہ دئے اَنت۔ بلے بازیں لٹّ ئءُ کُٹّ ءَ چہ آ وتی ہوش ءُ سار ءَ رﺅت ءُ گنوک بیت۔
پدا آئی ءِ پیریں مات آئی ءَ را زوریت ءُ پنجگ ءَ کئیت پدی زِر ءِ نیم ءَ جاہ منند بیت ۔ میرل ءِ چست کنگ ءُ گنوک بوہگ ءِ حال ءَ پد ”شمال بندن “ ءِ حقیں راجدوستیں سیاسی پترّ چمدا چہ پیچگ بیت ۔
تمامیں مہلوک سرکار ءِ بہر جوڑ بیت ءُ وتی ڈیھ ، راج ، زبان ءُ ربیدگ ءَ شمشکار بیت بلے میرل انگت پدی زِر ءَ نندیت ءُ وتی زِر، زمین، مرُگ، کوہ ءُ دمگ ءِ ندارگاں چاریت۔
٭٭٭
تیر ءِ توار ءَ چہ
تیوگیں شہر جکس اِت ۔ پدا یکےدوسئےچارپنچ شش تیرانی یک رِدے اَت کہ گوارگ ءَ اَت ،
شہر تکانسر اَت کہ چے بوت؟؟
پداحال اتک کہ فوجیاں میرل جتگ کہ یک میجرے ءِ جنئک ءَ
را سنگے جتگ ے۔
میرل ءِ تیراں سُپتگیں
لاش تیاب دپ ءَ کپتگ اَت۔ ہونانی یک لکیرے دیم پہ تیاب ءِ آپاں ہوار بوہگ ءَ اَت ۔
چول آئی ءِ پاداں واس گرگ ءَ اِتنت بلے سنگ انگت آئی ءِ دستءَ اَت۔
٭٭٭
اے آزمانک ءَ ما بانک
صبیحہ کریم ءِ اجازتءَ گوں شنگ کنگائیں ، ادارہ
Post a Comment